March 26, 2026
Myitkyina Saradaw Ginwang, San Luka Hkawlik, ( 2024 – 2026 ) Ning Hpaji Sharin Ladaw hta Shinggyim Bawngring hte Hpung Magam Gun Shapan Shalat ai ( Socio-Pastoral Formation ) hpe lahkawng ning tup sharin hkaja awng dang la lu sai, Jawngma ni hpe “EAPI ( Manila, Philippines ) hte San Luka Hkawlik a Joint-Diploma Shagrau Sha-a, Jawng Yu Poi” hpe ( March, 26, 2026 ) ya shani angwi apyaw hte galaw la lu sai.
Jawng yu poi lamang hpe jahpawt ( 6:30 ) aten chyeju dum Missa Hkungga galaw nna, ( 9:30 AM ) hta jawng ngut sai jawngma ni hpe jawng ngut masat shagrau lekmat jaw ai hte Janmau sha-gup ya ai.
Jawng yu poi hta e San Luka Hkawlik a ninghpum Saradaw, Manmaw Saradaw Ginwang Sagurem, Wa Saradaw Raymond Sumlut Gam, Myitkyina Saradaw Ginwang, Sagurem Wa Saradaw John Mung Ngawn La Sam, Wa Saradaw Francis Daw Tang ( Hkring sa ) ni hte jau ginwang shagu kaw na Wa Jau ni, Tara Hkaw Sara/num ni, jawngma ni kanu kawa nta masha ni, jinghku jingyu ni hte nawku hpung masha ni law law wa sa du shagrau lawm lai wa ma ai.
Lahkawng ning hpaji sharin hkaja la nna daini Janmau gup la lu sai jawngma ni yawng marai ( 54 ) rai nna, Lashio Saradaw Ginwang na marai ( 6 ), Manmaw Saradaw ginwang na marai ( 6 ), Myitkyina Saradaw Ginwang na marai ( 42 ) rai nga ma ai.
2026 – 2028 ning hpaji ladaw a matu du na May Shata kaw nna jawng bai hpaw na re lam San Luka Hkawlik Jawng Up, Wa Jau Dr. Bernard Dashi Tang Ji tsun ndau shana dat sai rai nga ai.
St. Luke’s College gaw Myitkyina Saradaw ginwang, Edin jau ginwang na lamu ga Eka ( 21 ) dam ai shara hta hpaw tawn da ai rai nna Sasana galaw na Sara/num ni hte ningbaw ningla tai na masha ni hpe shapan shalat ya ai chyum hkawlik rai nga ai. St. Luke’s College hpe Francis jau ni a prat hta Manmaw Saradaw ginwang na Nahlaing kaw shawng hpaw hpang da ai rai nna ( 1947 ) ning hta Columban Sasana jau ni Manmaw de bai hpaw da ai. Dai hpang ( 1957 ) ning hta Columban sasana jau, Wa Jau Bernard Hwe, Wa Jau Francis Zukdaw Lum D au, Wa jau Paul Lasang La, Sara Tsumhpawng Ja Li, Sara Felix Lum Ji ni woi awn nna Myitkyina Saradaw ginwang na Tanghpre nawku jawng wang hta San Luka Chyum Jawng bai htawt sit hpaw da sai rai nga ai.
Buga ginra masa lam, mung masa lam ni hta hkan nna ( 1978 ) ning hta ya na Edin San Luka jawng wang de bai htawt sit hpaw da ai. Edin San Luka chyum jawng hpaw hpang ai ten hta Wa Jau Gregory Lazum Naw Din, Sara kaba Peter Tsumhpawng Ja Li, Sara kaba Yawhan Nlam Gam Li, Duwa Johny Kareng La ni woi awn magam gun lai wa sai. Duwa Johny Kareng La gaw Edin San Luka chyum jawng wang lu hkra shakut ya sai hte chyum jawng wang hpe alu jaw ya sai nawku hpung a chyeju madu mung rai nga ai. San Luka chyum jawng gaw Columban jau ni shakut shaja gaw gap da ya ai sasana magam ni hta na apu asi langai mung rai nga ai.St.Luke Hkawlik gaw Socio -Pastoral ngu ai hte maren shinggyim bawng ring lam, sasana amu hte seng ai lam ni hpe gapyawn nna sharin achyin ya taw ai rai nga ai.
