Daini na Ja Chyum Mungga hpe hti sumru yu ai shaloi e, Bethani kahtawng kaw Yesu hpe Manam pyaw ai sau hte ru chya ya ai lam hpe na lu ga ai. Madu Yesu gaw shi nni nkri n hkam shi ai (6) ya ra ai shani hta e, tinang hpe galoi e mung hkap hkalum la ai Matha, Maria hte Lazaru yan nau ni a nta de sa du ai. Madu Ysesu hte ndai hkan nau ni gaw grai hku hkau ai ni re ai sha n ga, nta madu shan nau ni mung chyeju dum mayu ai majaw, shana shat daw jaw ai rai nga ai. Shingrai shannau ni masum hte mung Madu Yesu hte grai hku hkau ai re hpe mu mada lu ga ai.
Grau n na Maria gaw grai manu dan ai NADU sau jet jet manam hkawm ai hte, Madu Yesu a lagaw hpe chya ya nna, shi a kara singkaw hte katsut kau ya ai. Ndai Sau a manu gaw denari (300) manu nga ai. Dai manu gaw ya galaw ya sha re ai masha langai mi a laning mi shata shabrai hte bung nga ai. Ndai ram manu dan ai sau hpe Madu Yesu a matu sung lang ai hpe yu ga nga yang e, Shi gaw Madu Yesu hpe kade daram manu shadan ai. Shi a tsawra myit gaw grai dam lada la nga ai hpe mu lu ga ai. Shiga madat ni e tinang dang di lu ai hta grau nna, lu jaw ai gaw grai nan tsawm htap kaja ai sak jaw ai lam re. Ndai Maria zawn anhte mung Madu Yesu hpe myit masin mahka hte bawnu nyan marai mahka hte salum mahkra the tsawra lu hkra chyeju hpyi la nga ga law.
