Yesu, matsan ai Meshia
18. Ga Shaka Dingsa hta Karai Kasang gaw matsan mayan ni hpe grau kaba ai tsawra myit hte shanhte a hkrap ngu hkrap ngoi ai hpe madat na matu jin jin rai nga ai — dai hpe ngai kadun dawk tsun lai wa sai — gaw Nazaret mare na Yesu hta hpring tsup wa ai. Shi a shinggyim hkum hkrang hpe hkam la ai hku nna, “shi hkum shi nyet kau nna, mayam langai zawn dagraw la nna, shinggyim masha a hkrang bung sumla hte shangai wa ai” ( Hp 2:7 ), dai hkrang bung sumla hta anhte hpe hkye hkrang la ai lam jaw ya sai. Shi gaw, Karai Kasang a tsawra myit hpe anhte hpe hkum tsup hkra hpaw shadan dan na matu shi a sasana magam hta madung tawn ai, radical matsan mayan rai nga ai (cf. Yh 1:18; 1 Yh 4:9). San Pawlu tsun ai hte maren: “Anhte a Madu Yesu Hkristu gaw sut su nga ti mung, nanhte a matu mara matsan mayan hkrum nna, nanhte sut su wa myit ga, shi a chyeju hpe nanhte atsawm sha chye nga myit dai” ( 2 Kor 8:9 ).
19. Kabu Gara Shiga gaw Yesu a prat hta lam shagu hta matsan mayan hkrum nga ai hpe madun dan nga ai. Mungkan ga de shang wa ai aten kaw nna, Yesu gaw ningdang kau hkrum ai a n hkru n kaja ai mahkrum madup hpe chye nga ai. Kabu Gara Shiga hkaw tsun ai wa Luka gaw, ma shangai na aten du wa sai Yosep hte Mari yan Betlehem mare de gara hku du wa ai lam hpe myit npyaw hpa tsun dan da nga ai, “shan a matu manam shara n nga ai” (Lk 2:7) ngu nna tsun da ai. Yesu gaw shagrit shanem ai makau grup yin hta shangai wa nna, dumsu wakang hta tawn da ai; dai hpang, shi hpe sat kau na kaw na hkye la na matu, Egutu mung de hprawng mat wa ma ai (cf. Mt 2:13-15). Shi a sasana magam bungli galaw hpang wa ai aten hta, matsan mayan ni hpe kabu gara shangun na chyeju shi hta hpring tsup sai lam, Nazaret mare na tara jawng hta ndau shabra ngut ai hpang, mare kaw na shapraw kau hkrum ai (cf. Lk 4:14-30). Shi gaw lagut mamya zawn si hkam ai, Yerusalem mare kaw nna wudang hta jen da hkrum na matu woi pru wa ai (cf. Mk 15:22). Kaja wa nga yang, Yesu a matsan mayan lam hpe kaja dik htum tsun dan lu ai: matsan mayan ni, shinggyim wuhpawng kaw na shapraw kau hkrum ai ni a shinggyim nga pra masa zawn re ai n lawm ai lam hpe shi mung hkam sha lai wa sai. Yesu gaw ndai privilegium pauperum hpe madun dan ai lam rai nga ai. Shi gaw matsan mayan hkrum ai Meshia langai hku nna sha n-ga, matsan mayan ni a matu Meshia langai hku nna mungkan masha ni hpe madun dan sai.
20. Yesu a shinggyim nga pra masa hte seng nna, clues nkau mi nga ai. Shawng nnan, shi gaw lata hpaji (hte) laksama bungli galaw ai (cf. Mk 6:3). Ndai ni gaw lata bungli hte lu sha tam ai masha ni rai ma ai. Lamu ga n lu ai majaw, hkai lu hkai sha ai ni hta grit nem ai ngu sawn la hkrum ma ai. Ma hkum Yesu hpe Yosep hte Mari yan Nawku Htingnu de ap ya ai shaloi, shi a kanu kawa ni gaw hkrudu lahkawng hpe nawng ya ma ai (cf. Lk 2:22-24), dai gaw Jaw Jau Laika hta tsun da ai hte maren (cf. 12:8) matsan mayan ni a hkungga rai nga ai. Kabu Gara Shiga hta grai ahkyak ai mabyin langai mi hta, Yesu gaw shi a sape ni hte rau, yi hkauna hku lai wa ai shaloi, mam baw ni hpe sha na matu shinggyin la ai lam hpe tsun dan da ai (cf. Mk 2:23-28). Matsan mayan ni chyu sha ndai hkauna pa hta nlim gut la na ahkang lu ma ai. Dai hta n-ga, Yesu shi hkum shi tsun ai gaw: “Chyahkyawn ni nhkun lu ma ai, ntsa malen pyen ai u ni mung, tsip lu ma ai: Masha Kasha chyawm gaw baw tawn na shara n lu ai” (Mt 8:20; Lk 9:58). Shi gaw, teng sha nga yang, hkawm sa hkawm wa ai sara langai rai nna, shi a matsan mayan hte arawng sadang n-nga ai lam ni gaw, Kawa hte shi a matut mahkai lam a kumla ni rai nga ai. Sape lam hta shi hpang hkan mayu ai ni a matu mung kasi ni rai nga ai. Ndai hku nna, sutgan hte mungkan a shim lum lam ni hpe kau da ai gaw, Karai Kasang hte shi a lajang ya ai lam hpe kam hpa ai lam a dan dawng ai kumla tai wa nga ai.
21. Yesu gaw shi a sasana magam bungli hpe galaw hpang ai shaloi, Nazaret mare na tara jawng hta myihtoi wa Esaia a laika hpe hti let, myihtoi wa a ga hpe shi hkum shi jai lang let dan pru wa ai: “Matsan mayan ni hpe kabu gara shiga hkaw tsun na matu, Madu a Wenyi ngai hpe namman chya ya ni ai” (Lk 4:1f.1). Shingrai, dai aten hta, Karai Kasang a tsawra myit hte ni htep ai lam hpe shabyin ya na matu du sa nna, shi hkum nan hpe hpaw shadan dan nga ai, dai gaw yawng hta grau nna n hkru n kaja ai lam a bawng masha ni a matu, gawng kya ai ni hte matsan mayan ni a matu lawt lu ai magam bungli rai nga ai. Yesu a hkaw tsun ai lam hte rau nga ai kumla ni gaw, shanhte a masa a majaw, shinggyim wuhpawng hte makam masham nga ai masha ni pyi, shingdu tawn da hkrum ai machyi masha ni, matsan mayan ni hte mara kap ai ni hpe Karai Kasang tsawra myit hte matsan dum lama ai lam hpe madun dan ai lam rai nga ai. Myi kyaw ai ni a myi hpe hpaw ya ai, manggang kap ai ni hpe shamai ya ai, si mat ai ni hpe bai jahkrung ya ai hte matsan mayan ni hpe kabu gara shiga hkaw tsun ai: Karai Kasang gaw makau kaw nga ai, Karai Kasang gaw nang hpe tsaw ra nga ai (cf. Lk 7:22). shi hpa majaw ndai hku ndau shabra ai lam hpe sang lang dan nga ai: “Matsan mayan ni e, nanhte a lu myit dai: Karai Kasang a mungdan gaw nanhte a mungdan rai nga myit dai” (Lk 6:20). Karai Kasang gaw matsan mayan ni hpe grau ra sharawng ai lam madun dan ai: Madu a myit mada shara hte lawt lu lam a ga ni hpe shawng nnan shanhte hpe tsun ai. Dai majaw, matsan ai, gawng kya ai aten hta pyi, kadai mung kabai kau hkrum ai ngu n hkam sha ging ai. Bai nna, Nawku hpung gaw, Hkristu a Nawku Hpung tai mayu ai rai yang, kaji kadun ai ni hpe shara jaw nna, matsan mayan ni hte rau matsan mayan rai hkawm sa ai, matsan mayan ni hpe ahkaw ahkang lu jaw ai shara, Kabu Gara Shiga ni a Nawku Hpung rai ra ai (cf. Yak 2:2-4).