Daini na anhte a akyu hpyi sumru lamang a matu ga baw hpe,
Being a Person of Peace, Simsa ai Masha Langai Tai na Matu ngu nna la ga.
“Myi a matu myi; wa a matu wa” ngu ai tara hte ka-up da ai Mungkan hta Hkristan ni gara hku, alak mi san san rai nga lu na rai ta? Loi sung a hku jawm dinglik yu ga.
(Mt 5:9) hta Madu Yesu tsun ai,
Ndai Yesu a ga hpe na dat ai shaloi: anhte Hkristan ni hpe sha-ang nna tsun nga ai hpe dum lu ai. Dai rai yang, mungga madat nga ai hpunau ni a myit kraw lawang hta kaning ngu hkam sha ai rai?
Karai Kasang anhte hpe shaga la ai lam law law nga ai hta, shada ningget, ga law hkat ai ni a lapran hta hting-rai hting-rat, hting-ram ya ai bungli, simsa prinem lam tam ya na gaw tsaw dik ai shaga la ai lam rai nga ai.
Ndai Mungkan gaw, simsa lam n nga ai hta n-ga, simsa lam hpe mung n jaw lu nga ai. Masha ni gaw, shanhte myit ra sharawng ai lam ni hpe lu hkra, shanhte a lapran hta shada da majan baw ga ma ai; shanhte kaw na simsa lam lu na anhte myit mada lam hpa n nga ai. De a majaw, simsa lam hpe lu la ya hkra, shabyin lu hkra, kade yak tim, jahpu manu kade kaba tim nang, ngai hta lit nga nga ai.
Dai majaw mung, Madu Yesu tsun ai, “Shangwi shapyaw chye ai ni gaw, a lu ma ai; kaning rai nme law, shanhte hpe Karai Kasang a kasha ni, ngu nna shamying na maru ai.”
Karai Kasang a kasha ni tai na matu gaw, tinang a makau grup-yin na masha ni tinang hpe gara hku mi galaw ai rai tim, shanhte hte htuk manu hkra kanawn mazum ra ga ai. Madu Yesu gaw shinggyim masha hte shi a Kawa Karai a lapran hta pyi simsa lam hpe lu hkra htingrai htingrat ya sai.
Chyum laika hta anhte a shut hpyit mara ni hpe jeyang dawdan ai gaw, anhte hpe Karai Kasang a simsa ai kaw na jahka kau ai rai nga ai. Sumsing mungdan a simsa lam a matu anhte shakut ra ga ai.
Dai majaw, (1 Petru 3:9-11) hta tsun ai,
“N hkru ai a matu n hkru ai bai n tai na hte, roi rip ai a matu roi rip ai bai n tai ai sha, shaman ya na mahtang gaw, a daw nga mu; kaning rai nme law, shaman ya da sai Sali wunli hpe hkam la lu myit ga, nanhte hpe shaga da manit dai. Dai rai nna, “Asak hkrung ai tsawra nga ai hte nhtoi kaja mu mayu ai wa kadai mung, shi a shinglet hpe n hkru ai kaw na, shi a nten hkalem ai kaw na, jahka la u ga. N hkru ai hpe koi kau nhtawm, kaja ai gaw law nga u ga, ngwipyaw ai hpe tam nna, hkan sa nga u ga.”
Anhte hpe masha ni n kaja ai hku galaw ai, roi rip ai hpe anhte matai bai n htang jang, anhte gaw sumsing lamu hpe kinding aga de, anhte a makau grup-yin de dun shayu ga ai. Simsa lam a Madu hte rau n rai yang, kadai mung tinang a prat hpe simsa ai hte asak n hkrung lu ai.
Mahte daw kaba manga: kaji sumshi-matsat kaw nna mali-shi-lahkawng hta (Mt 5:38-42) Madu Yesu tsun ai,
Nang hpe tara dara nna, na a lawng hkoi la kau mayu ai wa hpe, na a palawng hpe mung hkum ndang u: nang hpe dip nna mai (mile) langai mi sa shangun ai wa hte rau, mai (mile) lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe hkum gang kau u.”
Ya, asim sha ng anna sumru akyu hpyi ga:
- Anhte hpe simsa lam a matu bungli galaw na Karai Kasang shaga nga ai hpe myit yu ga.
Mahte daw kaba manga: daw kaji jahku (5:9) hpe bai dum ga, “Shangwi shapyaw chye ai ni gaw, a lu ma ai; kaning rai nme law, shanhte hpe Karai Kasang a kasha ni, ngu nna shamying na maru ai.”
- Simsa ai masha langai tai na matu nang hpe dingbai dingna jaw ai lam gaw hpa rai kun?
Shakawn Kungdawn, daw kaba sumshi-mali: daw kaji shi-mali (34:14) hpe dum ga,
“N hkru ai hpe koi nna, kaja ai galaw u, ngwi pyaw ai hpe tam nna hkan sa nga u.”
- Madu Yesu n tara ai hku galaw hkrum ai shaloi, shi bai htang ai lam ni hpe dum u. Shi tsun ai ga ni hpe bai sumru yu u,
“Myi a matu myi, wa a matu wa bai htang lu na, nga nna tsun dan ai ga gaw nanhte na yu manu ai. Ngai mahtang nanhte hpe tsun made ai gaw, n hkru ai wa hpe hpa mung hkum tai mu: na a hkra shabyi bye ai wa hpe, maga mi naw jaw ya u.
Nang hpe tara dara nna, na a lawng hkoi la kau mayu ai wa hpe, na a palawng hpe mung hkum ndang u: nang hpe dip nna mile langai mi sa shangun ai wa hte rau, mile lahkawng naw hkan sa u. Nang kaw hpyi ai wa hpe jaw u; nang kaw nna hkoi shap mayu ai wa hpe hkum gang kau u.”
Simsa ai hpe hkan galaw na matu loi ai nga nna, Chyum Mungga hta galoi n tsun ai; shi hkrai shi rai wa na (byin wa na) re nga nna mung n tsun da ai. Simsa ai hte nga lu hkra shakut ai gaw Chyoi Pra ai Wenyi hte, shi a apu asi yawng hte, hpring ai sak hkrung lam rai nga ai.
Shiga madat nga ai hpunau ni mung, tinang a makau grup-yin hta Chyoi Pra ai Wenyi a simsa ai hpe gaw gap lu mu ga law. Mungkan, mungdan simsa lam hpe gaw gap ai amu ni hta mung shakut ap nawng lu mu ga.
Yawng hpe Karai Kasang shaman ya u ga.