Ndai paska laban 5 ngu na shani hta, Nawku hpung gaw anhte kadai ni re ai hpe shadum ya nga ai: “Hkristu hte rau up hkang na hkawhkam hkinjawng aya hpe lu la ga ai. dai ni anhte gaw Hkristu nawng jau ai hkungga zawn nawng jau na matu, anhte zuphpawng nga ga ai.
Daini na daw 1 hta, kam sham ai hpung masha ni hpe yu lajang na matu, deacon marai sanit hpe lata san da ai lam rai nga ai. Ndai lam kaw na lawu na lam ni hpe sharin la lu ga ai. Langai, anhte a buga masha ni a shinggyim nga pra masa (sh) arung arai ra kadawn ai lam ni hpe n yu lajang ai (sh) karum shing tau ai lam nnga ai. Shanhte hpe n yu lanu lahku ai sha tawn da yang, Karai Kasang a magam bungli hpe hkra machyi shangun chye nga ai.
Lahkawng, anhte a wenyi lam hte arung arai ra kadawn ai lam lahkawng yan gaw ahkyak ai majaw rap ra ra ai. Masum, anhte kadai re ai hpe n malap ai, anhte a madung shaga la ai lam hpe n gawn n sawn di kau ai. Anhte a sasana magam hte shaga la ai lam kaw na, shinggyim masha ni a shinggyim nga pra masa gaw anhte hpe n shadut kau ging ai ngu ai hpe Petru teng sha tsun da ai: “Anhte gaw lusha garan jaw na matu Karai Kasang a mungga hpe n hkan sa ai gaw n mai byin ai, ndai lit hpe anhte ap kau nna, akyu hpyi ai hte Karai Kasang a mungga hpe daw jau ai hta ap nawng na ga ai.”
Anhte gaw arung arai ra kadawn ai lam ni hpe grai myit maju jung yang, wenyi lam hta hkra machyi na gaw teng sha re. Anhte hkrai sha yawng hpe n lu galaw ai. Anhte hpe karum ya ai hku nna kaga ni hpe shanhte a lit hpe galaw shangun ra ai. Hpang jahtum, Karai Kasang a sasana magam bungli a matu sasana magam gun ni hpe lata ai shaloi hpaji rawng ai hte akyu hpyi ra ai. Shanhte gaw “mying kaja lu nna, Chyoi Pra ai Wenyi hte hpaji byeng-ya hte hpring tsup ai ni” rai ra ai.
Daw Lahkawng hta, Petru gaw anhte teng sha kadai ni re ai hpe shadum ya nga ai: “Karai Kasang hpe shakawn kungdawn na matu, lata la hkrum ai amyu, hkawhkam hkinjawng hpung, chyoi pra ai amyu, Karai Kasang hpe shakawn kungdawn na matu san da hkrum ai amyu rai nga ai.” Ndai shara hta, Petru gaw “masha yawng (sh) hkinjawng aya” hku nna Hkristu a hkinjawng aya hta anhte shang lawm ai lam hpe madi madun da ai. Ndai lam gaw anhte kashin kamun hkam ai lam a majaw rai nga ai (CCC1268). Kashin kamun hkam ai gaw anhte hpe “hkinjawng” tai na matu hkrang shapraw ya ai.
Shing rai, Petru gaw, “Hkristan Sakramentu (kashin kamun, chyoipra hkum, hte N-gun shaja ai Sakramentu) ni anhte ni a ntsa e, akyu nga ai lam hpe madi madun da nga ai. anhte a hkinjawng hte hkawhkam sali wunli hpe shadum ya nga ai. Karai Kasang hkap la ai hkungga ni hpe nawng ya ai hku nna, Karai Kasang hpe ra sharawng ai hte Karai Kasang a matu wenyi nta tai wa ai.
Dai ni na kabu gara shiga hta, Yesu gaw shi a mungdan hta shara langai mi nga ai hpe myit mada lam jaw nga ai: “Nanhte myit hkum ru myit, nye wa a nta hta gawk law law nga ai majaw, ngai nga ai shara hta nanhte mung nga lu na myit dai.” Dai gaw, kashin kamun hkam la ai marang e, anhte teng sha Karai Kasang a kashu kasha ni rai nga ga ai hpe madun dan nga ai. Ndai lam a majaw shi nga ai shara kaw nga na matu anhte hpe ging dan ai ngu sawn la ai.
Kaja wa myit n pyaw hpa gaw, anhte law malawng gaw anhte kadai re ai hpe n chye ai (sh) Hkristu anhte a matu lajang da ya ai tsawm htap ai shara nga ai ngu n kam ai. Ndai lam gaw anhte law malawng a hkinjawng hte hkawhkam atsam hpe n lu galaw ai majaw mung rai nga ai. Hkinjawng agyi ni hte hkawhkam amyu bawsang kaw na pru wa ai masha ni hku nna, anhte hkum anhte kaja ai hku tsun shadut ra ai. Dai hpe galaw lu na matu makam masham ra ai.
Sharin la mai ai lam ni: Yesu hpe Lam, Tengman ai, Asak hku hkap la ra ai:
1) Tsawra myit hte shagrit shanem ai, sak jaw daw jau ai, shi a lam kaji hta hkawm sa let Yesu hpe Lam hku hkap la ai.
2) Chyum Laika hte Nawku hpung a sharin achyin ai lam ni hta jaw da ai hte maren, shi anhte hpe sharin ya ai lam ni hpe sharin la nna tatut galaw ai hku nna Yesu hpe Tengman ai lam hku hkap la ga ai.
3) Yesu gaw Karai Kasang a Karai Kasang a Asak hpe Shi a Nawku hpung hku nna, hkap la ga ai. 4) Ndai lam yawng hpe a) Misa hta myit lawm hkum lawm the shang lawm nna, Hkristu a Hkum hte Sai hpe hkam la ai; b) kaga Sakramentu ni hpe ging dan ai hku hkam la ai; c) myit sumru let, Karai Kasang a mungga hpe shani shagu hti ai; d) Nawku hpung kata hte anhte a kata e shanu nga ai Chyoi Pra ai Wenyi hpe lam madun, n-gun shaja ya na ahkang jaw ai; Asak Npawt Karai Kasang hte matut mahkai ai hku nna, tinang hkrai hte dinghku hta akyu hpyi ai hku nna anhte galaw nga ga ai.
Dai majaw, anhte a Madu Yesu Hkristu a Kawa Karai Kasang kaw, hkawhkam hkinjawng hpung masha ni hku nna asak hkrung lu na matu akyu hpyi ga. Bai nna, ndai hpung shingkang hte chyeju hpring ai Paska aten hta, Karai Kasang anhte a matu galaw ya ai lam ni a matu: “Madu hta kabu gara nga ga” Haleluya, aleluya!