Daini anhte jawm sumru akyu hpyi na ga baw hpe, Yesu Gaw Kaja Dik Rai Nga Ai ngu nna la ga.
Tsawra ai hpunau ni e, Wa Karai Kasang hpan tawn da sai “mauhpa lam ni yawng” hta – anhte Madu Yesu hte rau pawng-hpawm, kanawn mazum nga lu ai lam gaw dai kaga mauhpa lam ni yawng hta grau nga ai. Anhte chye lu ai lam ma hkra hta mung – Madu Yesu a lam, shi hpe chye chyang lu ai lam gaw kaba dik ai mauhpa hte kaja dik ai lam rai nga ai.
Dai lam hte seng nna, (Hebre 12:1-2) hpe hti yu ga:
“Ya ndai hte wa law la ai sakse ni gaw, anhte hpe sumwi zawn wang kawan da mi ai majaw, anhte mung, numdaw numdan re ai lit nlang hte hte, kap loi ai yubak hpe kau da nna, makam masham a npawt nhpang hte jahkum shatsup ya ai wa Yesu hpe azi yu let, anhte gat na matu san da ai lam hpe shakut sharang rai, gat shadu wa ga: dai Madu gaw, shi a man e ang wa ai kabu gara ai lam majaw, kaya kahpa hkrum ai hpe hpa zawn n nawn ai sha, wudang lam hpe hkam nu ai rai nna, Karai Kasang a tinyang hkra maga de wa dung nga sai.”
Ndai chyum mungga hpe anhte na la ai shaloi, anhte a myit hta kam sham, myit mada, tsawra ai chyeju ni law jat wa ai. Madu Yesu a tsawra ai gaw anhte hpe bai hkye mawai la ai, myit dik myit pyaw lam jaw ya ai, galai shai shangun hte shamai shatsai ya lu nga ai.
Masha a salum hta Madu lahkawng rawng na shara n nga ai. Mungkan lam ni hpe shara jaw jang, sumsing mungdan hte seng ai “Madu Yesu hpe” kanawng shapraw kau na ra ai. Shi hpe shara jaw na rai yang, Mungkan hte seng ai lam ni a matu, anhte a salum hta shara n nga ai.
Dai majaw, Mahte daw kaba kru: kaji hkun-lahkawng (6:24) hta Yesu tsun ai,
“Kadai rai timung, madu lahkawng kaw chyang lu na n rai; shi langai mi hpe n dawng nna kaga hpe tsawra na wu ai; shing n rai, langai mi hpe kasawt nna, kaga hpe n kaw n law di na wu ai: nanhte Karai Kasang hpe mung Mungkan a sut gan hpe mung, rau chyang lu na myit dai n rai” nga ai.
Ya, asim sha nga nna sumru akyu hpyi ga:
- “Madu lahkawng hpe kalang ta rau daw jau ai” ngu ai hpe sumru yu ga. Mahte (6:33-34) hta Madu Yesu tsun da ai hpe bai sumru yu u.
“Nanhte chyawm gaw shi a mungdan hte, shi a dinghpring ai lam hpe shawng tam nga mu; shaloi dai nlang, nanhte hpe kahtap jaw na marin dai. Dai rai nna, hpawt ni na matu myit hkum tsang myit; hpawt ni gaw shi a matu ru tsang na ra ai. Dai ni na rut sang ai gaw, dai ni na matu ram nga ai.”
- Mungkan a hpa lam ni hpe nang hkan shachyut nga ai kun sumru yu u. Karai Kasang hte seng ai lam ni hpe sha jaw na shara hpe Mungkan a lam ni hpe jaw da ai shara nga ai kun? Roma daw kaba shi-lahkawng: kaji lahkawng (12:2) hta ning nga tsun da nga ai,
“Dai hta n-ga, ndai dinghta ga a myit n hkan dagraw ai sha, Karai Kasang a mai kaja ai, sharawng awng ai hte hkum tsup re ai myit mang lam hpe nanhte chye ginhka lu myit ga, myit nnan lu la na hku, arawn asam galai nga mu.”
- Sumsing mungdan hte seng ai lam ni hta sha, hkawm sa lu na matu Karai kasang kaw akyu hpyi u. Mungkan lam ni hta grau nna Karai Kasang myit ra sharawng ai lam ni hpe sha, hkan sa lu na shingran hpe hpyi u.
Dinghpring ai lam ni hta hkan sa nna shi hte ngang kang ai kanawn mazum lam hpe lu hkra shakut na ngu nna myit hkut daw dan da u.
Yawhan a shagun laika langai, daw kaba lahkawng: kaji shi-manga kaw nna shi-sanit (1 Yawhan 2:15-17) hpe sumru yu ga,
“Dinghta ga hte dinghta ga e nga ai arai hpe, hkum tsawra myit. Marai langai ngai dinghta ga hpe tsawra a yang gaw, dai Kawa a tsawra myit gaw, shi hta e n rawng nga ai.
Kaning rai nme law, dinghta ga hta e nga ai, hkum shan kayut ai lam, myit marin ai lam hte ndai prat na grang ai lam nlang hte gaw, dai Kawa kaw nna pru ai n rai: dai gaw dinghta ga kaw na pru ai rai nga ai.
Dai dinghta ga hte de a marin ai lam chyawm gaw, lai mat lu ai rai timung, Karai Kasang a myit ai hku hpe hkan galaw ai wa gaw, htani htana e anga nga ai.”
Anhte gaw, Mungkan ntsa e sak hkrung hkawm sa nga ga ai; rai tim, ndai Mungkan hte n seng ga ai; anhte a mungdan hte dum nta gaw “sumsing mungdan” she rai nga ai (Yawhan 15:19).
Madu Yesu hte shi a mungdan sha, anhte a matu ahkyak dik hte kaja dik sutgan rai nga ai majaw, anhte mung, Mungkan a lam mahkra hpe ap nawng kau nna, shi a ga-matsun ni hpe hkan shadik ra ga ai. De a matu ra nga ai Wenyi a atsam chyeju ni hpe mung shi Madu nan anhte hpe jaw ya nga ai.