Daini na Ja Chyum Mungga hpe hti sumru yu ai shaloi e, Nazaret Mare Masha ni Yesu hpe n hkap la ma ai lam na chye la lu ga ai. Madu Yesu nga ai shara kaw na myu mare masha ni gaw, Yesu a dum nta masha ni a shingdu labau hpe chye nna, yu kaji nga ma ai. Dai majaw shanhte a salum chying hka ni pat da nna, Madu Yesu a ntsa kam sham lam n nga ma ai. Anhte ni a wenyi hkrun lam hta e mung, lapran hpat wat hta nga ai Madu Karai Kasang hpe n mu lu ai. Dai majaw lak mi alai re ai hkrang kumla ni hku nna, mu mada hkam sha lu na myit mada nga chye ga ai.

Raitim Madu Yesu gaw, shagrit shanem ai wa re. Kam hpa ging ai Madu mung shi re. Bai n myit mada da ai lai ladat ni hku nna, kam sham ai myit ningmu hku nna, mu lu ai ladat ni hte, anhte hpang de shi du sa wa chye ai re. Dai re majaw shiga madat nga ai ni yawng hte e, anhte a shani shagu sak hkrung nga sa lam ni hta, Madu Karai Kasang anga nga ai lam hpe makau grup yin ni hta e mung, anhte ni yawng mung shani shagu hta, mu mada hkam sha lu na matu mung, shi madu hpe ninghkap ningdang kau ai lam n nga hkra, Shi Madu kaw tut nawng e, ja ja akyu chyeju hpyi la nga ga law. Madu Karai Kasang hpe tut nawng hkap la kam sahm ai kashu kasha ni tai nga hkra shakut sa ga law.