‘Guilt of conscience’ mara lu dum myit gaw anhte hta nga ai grau sawng ai hpyen wa re, hpa majaw nga yang anhte n’mu shi ai sha shi gaw anhte hpe matut nna myit ru myit tsang shangun nga ai.

Hkawhkam Herod gaw Yesu a lam na ai shaloi Yawhan si ai kaw na hkrung rawt sai ngu myit la ai. Shi hpa majaw Yawhan hpe myit nga ai kun? Yawhan a n ging dan ai si hkrung si htan lam a matu shi lit nga ai re majaw, Yawhan hpe shi galaw ai n tara ai lam gaw shi hpe tut nawng myit ru myit tsang shangun nga ai.

Dai gaw shi hpe aten grai na hkra zingri nga ai, dai majaw Yesu a mying gumhkawng ai lam hpe na ai shaloi shi grai hkrit kajawng mat ai, hpa majaw nga yang Yesu hpe Yawhan re ngu myit la ai majaw re.

Lai wa sai aten hta anhte galaw shut ai lam ni gaw, shing na zawn anhte a shing du kaw hkan nang nga na re. Dai hpe shamai shatsai na matu kaja ai lam n galaw yang, aten shagu bai shadum ya na re.

Kadai hpe mung hkra machyi shangun ai lam ni hpe koi yen kau ga, mai kaja ai lam hpe galoi mung galaw let galoi mung shagrit shanem let simsa nga ga. Bai nna, marai langai ngai a hkam sha lam hpe hkra machyi shangun ai (sh) hkam sha ai rai yang, mara raw ya na matu alawan galaw ga.