Daini na akyu hpyi sumru yu na ga baw hpe: “God prunes us in His Love, Karai Kasang gaw shi a tsawra myit hta anhte hpe hkai shatut ya nga ai,” ngu hpe la ga.

Shawng nnan Chyum mungga hpe madat la ga,

“Ngai hta asi n si ai lakung shagu hpe shi daw kau nna, asi si ai lakung shagu hpe, asi grau si lu hkra, shi hkai kau wu ai.” Yawhan 15:28.

Mungkan a sharin achyin ai lam gaw, anhte hkum tsup ai ni tai na matu kaya kahpa jaw ai lam re ngu nna sharin ya nga ai. Mungkan kaw na sharin achyin ai lam gaw, tsawra myit hta grau nna, tinang hkum hpe sha myit ai shara kaw nna, Karai Kasang hpe nawku ai hta grau nna hkum tsup ai lam hpe hkan tam ai kaw nna, myit masin hpe hkrang shapraw, hkrang shapraw ai hta grau nna, arawn alai kaja ai hkrang de woi sa na matu yaw shada ai. Ndai lam a majaw, anhte gaw sumsing lamu na Kawa a sharin achyin ai lam kaw na law law lang hprawng mat wa ga ai. Raitim, Hebre 12:5-6 hta, “Ngai sha e, dai Madu a sharin achyin ai ga hpe kaji kajaw hkum nawn et, shi sharin achyin ai shaloi mung hkum yawm et: kaning rai nme law, Madu gaw shi tsaw ra ai wa hpe sharin achyin ya nna, Shi hkap la ai kasha shagu hpe ari jaw nga ai.” Karai Kasang gaw anhte hpe tsawra ai majaw sharin shaga ai. Shi gaw anhte a matu mai kaja ai masing ni nga ai re majaw, anhte hpe ahkaw ahkang, n-gun atsam, Wenyi a atsam a matu jin jin rai nna, hkyen lajang da ai masha ni byin tai wa hkra, hkrang shapraw ra ai. Shi a sharin achyin ai lam gaw, anhte hpe jahten sharun na matu, kaya kahpa jaw na matu n re ai sha, law htam ai asak hkrung lam de woi sa na matu galoi mung yaw shada ai re. Karai Kasang anhte hpe sharin achyin mayu ai myit hpe anhte yu nga yang, shi a tsawra myit gaw na a myit masin hpe hpaw ya nna, nang hta jasan jaseng na, karum na, asi si na matu sha yaw shada ai hkai sun galaw ai lam de nang hpe woi sa wa na ahkang jaw u.

Yawhan 15:2 hta “Ngai hta asi n si ai lakung shagu hpe shi daw kau nna, asi si ai lakung shagu hpe gaw, grau nna asi si u ga, shi kraw kau wu ai” nga nna tsun da nga ai. Karai Kasang hta anhte grau nna asi si lu na lam langai sha nga ai, dai gaw shi anhte hpe hkai shatut na ahkang jaw ai lam rai nga ai. Mungkan hpe hkan shachyut ai hte myit tsang ai lam gaw Karai Kasang hta ru jung nga ai kaja ai, asi si ai lakung lakying ni kaw na malu masha hpe lagu la kau ya ai nli tum ni zawn rai nga ai. Karai Kasang a masing gaw anhte hpe mungkan ga hta nga ai raitim, mungkan hta n lawm ai masha ni hku nna, hkai shatut, shamai shatsai, galai shai kau ya na matu re (Yawhan 17:14-19). Shi a ga sadi ni a hkum tsup ai lam hpe anhte n hkam sha lu hkra pat shingdang da ai gumrawng gumtawng ai hte yubak mara a ngang kang ai shara ni hpe jahten kau na matu shi ra sharawng nga ai. Bai nna, anhte hpe kabu gara lam hpring tsup hkra galaw ya lu ai ahkyak ai hte htani htana asi si ai sak hkrung lam de woi sa na matu shi masing jahkrat da nga ai.

Dai majaw Karai Kasang anhte hpe gara hku hkai shatut na ahkang jaw na kun? Shi a shamai shatsai ai lam hte galai shai ai lam hta gara hku shang lawm mai na kun? Anhte hpe shi tsawra ai tsawra myit a sung htum ai lam hpe mu lu ai kaw nna yawng hpang wa ai. Shakawn Kungdawn 103:2-4 hta, “Nye a myit masin e, dai Madu hpe shakawn kungdawn u, shi a chyeju yawng mayawng hpe hkum malap kau et, shi gaw na a yubak yawng hpe raw dat kau ya nna, na a ana ahkya mahkra hpe shamai ya ai, na a asak hpe nhkun kaw nna hkye la ai, tsaw ra ai hte matsan dum ai hte nang hpe janmau gup ya ai.” Karai Kasang a sharin achyin ai lam gaw mungkan hte grai shai ai, hpa majaw nga yang, dai yawng gaw anhte hpe shi a mau hpa re ai tsawra myit hta ru jung nga ai. Shi a tsawra myit hte sharin achyin ai lam hta tut nawng shang lawm lu na matu, shi a tsawra myit hpe tut nawng hkrum katut ra ai. Anhte a mungkan ga ntsa na kawa law law a tsawra myit n rawng ai sharin achyin ai lam hte shi a sharin achyin ai lam hpe garan ginhka lu na matu, sumsing lamu na Kawa a yawng hpe tsawra ai myit masin hte aten jawm la ra ai. Shi a sharin achyin ai lam gaw galoi mung anhte a akyu a matu sha rai nna, anhte a akyu a matu sha rai nga ai. Shi a sharin achyin ai lam hpe anhte hkum tsup hkra hkan nan lu na matu, shi anhte hpe tsawra ai tsawra myit a sung htum ai lam hpe matut manoi anhte ni hkam la lu na gaw ahkyak nga ai.

Bai nna mungkan a lam ni hta shi a lam ni hpe lata la ra ai. Shi tsun ai ahkyak ai lam a matu anhte a ahkyak ai hpe kau da ra ai. Roma 12:1 hta “Dai re ai majaw hpu nau ni e, Karai Kasang a matsan dum lama ai hte, nanhte a hkum hkrang hpe Karai Kasang a man e hkrung nga ai, chyoi pra ai hte sharawng awng ai hkungga zawn nawng ya na matu, ngai nanhte hpe hpyi nem ma de ai, dai gaw nanhte a wenyi nawku daw jau ai lam rai nga ai.” Shi a sharin achyin ai lam gaw, nang kaba wa ai mungkan hte n bung ai hku sharin ai majaw, hkra machyi na re.Shi gaw anhte a hkrung ai hkungga hpe mungkan a ningmu ni hpe la nna, shi a ningmu hpe sha manu shadan ai masha ni hku nna anhte hpe galai shai kau ya na re. Anhte law malawng gaw mungkan a lai ladat ni hte ningmu ni hpe grai manu shadan ai majaw, shanhte hte tsan gang nga ai gaw tsep kawp maigan masha zawn, hkrit hpa zawn hkam sha nga ai. Dai majaw ahkyak ai (sh) manu dan ai ngu anhte chye na da ai lam ni hta Karai Kasang hpe kam hpa na matu lata la ra ai. Bai nna, shi gaw anhte yawng hpe kaga masha ni a ningmu hte jinghku jingyu lam hta grau nna ahkyak shatai nna shi hte hku hkau lam nga ai prat de woi sa wa na re. Hkai sun galaw ai lam a daw shagu gaw yak hkak ai. Raitim, Chyoi Pra ai Wenyi hpe myit hkrum nna hkan sa ai shaloi, dai lam hku nna nang gaw shawng na hta grau nna myit dik ai, kabu gara ai, lawt lu ai, n-gun atsam lu ai, asi si ai hku pru wa na re. Hebre 12:11 hta “Dai sharin achyin ai lam yawng mayawng gaw, ya aten hta pyi pyaw ai hta, machyi ai zawn rai nga ai, rai ti mung, hpang de gaw, dai hte sharin hkam la ai ni a matu, dinghpring ai ngu ai ngwi pyaw ai asi si wa na ra ai” nga nna tsun da nga ai. Mungkan a lit hpe kabai kau ai hpang, shi a lit npu hta nang gara hku nga lai wa sai kun ngu myit yu na re.

Tsawra myit rawng ai sumsing Kawa hte rau hkai sun galaw ai lam hta shang lawm u. Na a myit masin hpe hpaw nna, shi nang a matu lajang da ai law htam ai asak hkrung lam hte bungli ni a matu nang hpe pat shingdang da ai bunghku ni hpe jahten kau na ahkang jaw u. Shi a tsawra myit hpe mu nna, na a myit masa hte sak hkrung lam ni hpe kau da ai hku nna bai htang u. Nang gaw Chyoi Pra ai Wenyi a woi awn ai lam hpe hkai sun galaw ai lam hku nna sha hkan sa yang, dai ni nang hpe shamai shatsai, galai shai ya, lawt lu shangun na masing ni nga ai.

Ya, asim sha nga nna sumru yu ga.

1. Karai Kasang nang hpe hkai shatut mayu ai myit hpe myit sumru yu u. Karai Kasang a sharin achyin ai lam gaw shi a tsawra myit hta galoi mung ru jung nga ai hpe myit yu u. Karai Kasang nang hpe sharin achyin mayu ai myit hte mungkan masha ni hte shingdaw yu u. Shi a myit masin hte n’galaw ai rai yang, lai wa sai aten hta nang hkam la ai kaga sharin achyin ai lam ni hte shi a ra sharawng ai lam hpe garan tawn u.

“Dai sharin achyin ai lam yawng mayawng gaw, ya aten hta pyaw hpa n re ai sha, yak hkak ai zawn rai nga ai, rai ti mung, hpang de dai hte sharin hkam la hkrum ai ni a matu, dinghpring ai ngu ai ngwi pyaw simsa ai asi si wa ai.” Hebre 12:11 hta mu lu ai.

2. Wenyi hpe myit masin hpaw nna, Karai Kasang a asi n si ai na a prat daw ni hpe gang je kau na matu shi hpe hpyi nem u. Karai Kasang ra sharawng ai law htam ai asak hkrung lam hte n hpring tsup ai na a prat masa daw ni hpe myit yu ai shaloi shi a woi awn ai lam hpe hkan nang u. Na a ningmu, aten (sh) hku hkau lam ni hta shi hpa hpe galai shai mayu ai kun? Nang grau lawt lu ai, n-gun ja ai hte asi si ai hku sak hkrung lu na matu shi nang hpe hpa galaw na (sh) kau da na matu tsun nga ai kun? Wenyi a ga hpe ra ai daram aten la nna madat mara u.

“Anhte a dinghpring ai hku galaw ai amu a majaw n rai, shi a matsan dum ai majaw, chyoi pra ai Wenyi a kashin kamun hte bai shaprat ai hte, anhte hpe hkye la mi ai.” Titu 3:5 hpe hti yu ga.

3. Shi nang hpe woi awn ai lam shagu hpe shi a hkai shatut hte hkan sa ai lam hpe myit hkrum u. Shi nang hpe hpaw shadan dan ai lam yawng hpe na a prat kaw na dawm kau na matu masing jahkrat u. Karai Kasang nang hpe jaw da ai sharin achyin ai lam hpe nang hpe hkan sa na matu manang langai hpe shaga nna, lit la na matu hpyi shawn u. Karai Kasang gaw sumsing lamu na Kawa hta law htam ai asak hkrung lam de lam madun ya ai hta, nang hpe hkra machyi shangun nga ai na a prat hta gara shara hpe raitim, matut manoi galai shai ya lu na matu, sharin achyin ai lam hta matut manoi shang lawm na matu ga sadi jaw u.

“Dai re ai majaw, hpu nau ni e, Karai Kasang a matsan dum ai myit hte, nanhte a hkum hkrang hpe, chyoi pra ai hte Karai Kasang kaw sharawng awng ai hkungga zawn, nawng ya na matu, ngai nanhte hpe hpyi nem ma de ai: dai gaw nanhte a wenyi nawku daw jau ai lam rai nga ai.” Roma 12:12.

Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!