Daini na Ja Chyum Mungga hpe hti sumru yu ai shaloi e, masha kasha a du sa ai ninghtoi hte seng ai lam ni na chye lu ga ai. Si hkrung si htan ngu ai gaw n myit mada ai aten hta du sa wa na ra ai. Shinggyim masha langai mi a prat hta e, ningnan hpang ai hte ngut mat ai ngu ai hpan lahkawng nga nga ai. Dai hte maren ngai a prat hta e mung, shangai wa ai hte si mat wa ai ngu ai lam lahkawng nga nga ai. Anhte a sak hkrung nga ai mungkan ga gaw, Ningpawt Ninghpang chyum laika hte maren kalang mi sha hpan da hkrum nga ga ai. Shingrai dai mungkan ga gaw, dai ladaw mi bai htum mat wa na sha rai nga ai. Dai gaw galoi aten rai na ngu ai hpe gaw kadai wa  mung n chye dang di lu nga ai. Dai majaw anhte n myit mada da ai ahkying aten hta e si hkrung si htan lam gaw kadai wa kaw e mung du pru wa na gaw teng sha re. Dai re ai majaw anhte yawng gaw, dai hpang jahtum ninghtoi hpe e  galoi mung jin jin rai maja nga na gaw, nang ngai anhte shinggyim masha yawng a kaba dik ai lit langai mi nan rai nga ai hpe n mai malap nga ga ai re. Anhte yawng dai lit magam hpe tut e maja nga ra ga ai