Daini na Ja Chyum Mungga hpe hti sumru yu ai shaloi e, Manggang kap ai marai shi hpe Yesu shamai ya ai lam na la lu ga ai. Nu wa ni chyeju dum ai lam gaw, grai kaja ai lam nan re. Chyeju dum ging ai ni hpe chyeju dum ai lam galaw ai (sh) chyeju dum ga tsun ai lam ni gaw, teng sha galaw ra ai lit mung lu ga ai. Dai hte maren, Manggang kap ai masha marai (10) gaw Madu Yesu kaw sa wa ai lam kaw nan ana mai tsai mat nga ai raitim, Samaritan masha langai mi chyu sha Karai Kasang a hpung shingkang hpe shakawn let chyeju dum nga ai.

Dai prat hta e Juda masha ni gaw, Samaritan masha ni hpe mara lu ai ni ngu nna, garan ginhka da ma ai. Raitim Madu Yesu gaw, amyu ru sai hpung, madang gin hka ai lam n nga ai. Shi gaw masha a myit kraw dung hpe sha yu mada chye ai wa re. Dai re ai majaw Samaritan masha wa a chyeju htang chye ai myit jasat hpe madi madun ya ai lam mung rai nga ai. Shing rai anhte yawng mung Madu Karai jaw da ai asak, ninggun atsam marai hte ahkaw ahkang hpaji lam ni yawng a matu shani shagu Karai Kasang hpe chyeju dum na matu hte dai hkam la lu sai chyeju ni a matu chyeju dum chye na mung grai ra ahkyk nga ga ai.