“Shaloi dai hpyen du wa gaw, Madu e, nye a nta magaw npu e, nang sa shang na gaw, ngai n gin ndan nngai: na ga hkaw mi sha tsun dat rit, shaloi nye ma mai na ra ai.” ( Mahte 8: 5 – 11 )
Tsawra dik ai shiga madat nu wa hpu nau ni, daini na lu ai Ja Chyum Mungga hta, Hpyen du kaba a shagrit shanem ai myit hte shi a hpyen ma wa kaw, tsawra myit nga ai lam hpe na la lu nga ga ai. Dai ten hkan e, Hpyen du ngu ai ni gaw, grai arawng lu ai ni re ai majaw, masha ni kaw garum hpyi hkawm ai nga, n nga ma ai. Masha ni she, hpyen du ni hpe hkungga tsawra ai majaw, hpyen du kaba ni ra ai hpe, jaw ya chye nga ma ai.
Daini na lu ai Chym Mungga na, Hpyen Du wa gaw, grai shagrit shanem ai hpe mu lu nga ga ai. Madu Yesu a shamai shatsai ya ai lam, shi hkum nan ra ai nrai ti mung, shi a hpyen ma a gawng malai, Hpyen Du wa shi a hpyen ma langai hpe shangun dat nna, Madu Yesu hpe, garum sa hpyi nga ai. Madu Yesu sa nna, shamai ya na matu, Hpyen Du wa a nta de du sa wa yang, Hpyen Du wa gaw, “Madu e, nye a nta magaw npu e nang sa shang na gaw, ngai n gin d ndan nngai: na ga hkaw mi sha tsun dat rit, shaloi nye ma mai na ra ai.” nga nna tsun lai wa ai. Hpyen Du wa a, shagrit shanem ai myit, Madu Yesu hpe kam hpa ai myit kaba ni hpe, mung mu lu nga ga ai. Hpyen Du wa a shagrit shanem ai myit hte kamhpa ai myit kaba ni a majaw, machyi taw nga ai, shi a hpyen ma Madu Yesu a shamai shatsai ya ai hkam la lu mat wa ai.
Bai nna, Hpyen Du wa gaw, Israela masha mung nrai nga ai. Jasam masha she rai ti mung, Madu Yesu hpe kam nga ai. Ndai lam hpe na la yang, Makam masham nbung ai ni hpe mung, Madu Yesu gaw, shaman ya nga ai lam na chye lu nga ga ai. Tengman ding hpring ai ni, Madu ra sharawng ai hku sak hkrung hkawm sa nga ai ni hpe, Madu a shaman chyeju jaw ya nga ai. Jasam masha ni hpe pi, dai ram shaman chyeju ni jaw taw yang gaw, anhte shi a kashu kasha ni, shi ra ai hku sak hkrung hkawm sa nga yang, shaman chyeju nhpaw nya jaw ya na rai nga ai.
Daini nlu ai Ja Chum Mungga hta na, Hpyen Du kaw nna, lu la mai ai, kasi ni gaw, shagrit shanem chye ai myit ni hte, madu hte ni htep ai ni, ra kadawn nga ai ni, hpe garum matsan dum chye ai ni, byin tai ra nga ai lam rai nga ai. Shagrit shanem ai myit ni gaw, anhte hkum ngau shagu kaw, rawng nga ra ai, kasi kaja rai nga ai. Shagrit shanem ai myit gaw, Madu Yesu ra sharawng ai lam rai nga ai. Hpyen Du wa a shagrit shanem ai lam a majaw, Madu Yesu gaw, Hpyen Du wa hpe shakawn da nga ai lam, chyum laika hta ka da nga ga ai. Anhte ni a prat hta mung shagrit shanem ai myit hte hkawm sa ra nga ga ai. Anhte ni shagrit shanem ai myit hte sak hkrung hkawm sa yang, Madu Hpyen Du wa hpe shakawn ai zawn, Madu Yesu a shakawn ai lam hte shaman chyeju ni hkam la lu na rai nga ga ai.
Anhte a makau grup yin hkan na, ra gadawn taw ai ni hpe, Hpyen Du wa zawn, garum matsan dum, tsawra chye ra nga ga ai. Madu Yesu gaw, garum ra taw ai ni hpe, tsawra matsan dum myit hte, galaw ya lai wa ai. Myi nmu ai ni, machyi kaba hkrum ai ni, si mat ai ni hpe bai sharawt dat ya ai ni, galaw ya lai wa ai. Anhte a makau grup yin hkan e, anhte a garum matsan dum la ai lam hpe, ra taw ai ni, law law nga nga ai. Dai re ai majaw, anhte dang dep ai daram, makau grupyin na, anhte a hpunau ni hpe, garum matsan dum la nga ga. Shagrit shanem ai myit ni, masha ni hpe tsawra matsan dum chye ai myit ni hte Madu Yesu a, jet ai sape ni byin tai hkra, shakut hkawm sa nga ga. Yawng hpe Madu Karai Kasang shaman ya nga u ga!