Message of Peace for Myanmar in the Year 2025
2025 Ning A Matu Simsa Lam Hte Seng Ai Shaning Ningnan Mungga
RVA- Jinghpaw Shigga hpe hkap madat la nga ai Hkristu hta tsaw ra ai hpu, nau ni e,
Shaning Ningnan Hkying Lahkawng Hkun Manga de du kabye shang wa ai hte rau, simsa ai chyeju hpe hkam la lu mu ga ngu nna, nye a kraw dung salum kata kaw nna shakram dat nngai.
Daining gaw, laklai shaning, Jubali shaning, myit mada ai lam kaba a Wan shadaw, shing n rai, machya rai nga ai. Ndai Jubali shaning gaw, bai gaw gap ai, shada htingram hkat ai hte ningnan galai shai ai lam ni hpe galaw na matu anhte hpe saw shaga ai aten rai nga ai.
Dai majaw, Wa Sarabyin Francis a 2025 hkying lahkawng hkun manga Ning hte seng ai Simsa lam mungga hpe grai ahkyak da nna hkungga let gam garan dat lu nngai. Shi a mungga hta, Wa Sarabyin Francis gaw,
shada ga tsun bawng jahkrup ai,
matsan dum lama ai lam madun hkat ai,
tara rap ra ai lam ni gaw
shada myit hkrum rap-ra ai hte nga lu na matu, lam mahkrun madung ni rai nga ai ngu nna hpyi nem let tang madun ya ai.
Myit mada shara Jubali shaning hpe ndau shabra dat ai gaw,
masha shada kam shamyet hkat ai hpe gaw gap na matu,
shada da mara ni hpe raw dat ya hkat ai hpe n -gun jaw na matu,
masha marai hkum shagu, grau nna n-gun kya ai ni hpe ahkaw ahkang jaw ya na matu saw shaga ai lam rai nga ai.
Ndai Wa Sarabyin kaw nna Mungkan ting de hpyi nem ai mungga hta lakap nna, anhte Myanmar mung ting alawan ngwi pyaw sim sa wa na hpe myit mada let shi a mungga hpe bai kahtap len ya dat nngai.
Chyum Laika labau hta, Jubli shaning hpe
“myit mada lam mahkrun” ,
tara rap ra ai lam hpe bai lu la ai,
wunma ni hpe tsi shamai ai,
masha a sari sadang hpe bai lu la ai aten ngu nna sharin ya ai.
Ginding aga hte de a sut nhprang rai ni gaw masha yawng, nga mu nga mai lu na matu yaw shada ai rai nga ai. Myanmar mungdan gaw dai dinghta shingra tara hte tsawm htap nga nna, htunghking lai kaja ni hte hkum tsup nga timung, shaning law law wa, majan hte gasat gala ai lam ni a majaw wunma hkang ni kap mat masai. Dai majaw, Wa Sarabyin a mungga gaw anhte a matu asak sai lam zawn ahkyak la nga ai.
Anhte tsaw ra ai kanu, Myanmar mungdan gaw, mungchying sha ni a
tsun n dang ai machyi kaba hkrum lam ni,
masha shada daw sa ai,
nga shara shamat kau ai,
matsan chyaren hkrum ai,
ngu ai lit kaba hpe gun let hkrap madai nga ai;
myit htum myit daw ai lam gaw anhte a buga hpe n shamu lu hkra magra jum tek da nga ai.
Anhte a htoi tu kabrim ai myit mada shara rai nga ai ramma ni mung, shanhte a ahkaw ahkang hpe tawt lai hkrum ai, shanhte a yupmang shingran ni hpe kashun la raw kau ya hkrum nga ma ai.
Kun dinghku ni mung ayai aya rai mat masai,
masha wuhpung wuhpawng ni mung daw hka bra mat masai,
hpa mara n lu ai mung shawa ni mung, tara ai lam n nga ai shada daw sa gasat gala ai lam ni a majaw machyi hkrum nga ma ai.
Dai daw sa gasat gala ai lam ni hta awng dang ai wa kadai n nga ai.
Ndai zawn re ai ningsin kata hta pyi, Jubali shaning gaw, anhte hpe
“myit mada ai lam hpe shabyin ai ni” tai na matu,
sim sa lam hte tara rap ra ai lam hpe lu la mai ai ngu ai myit mada kam sham ai hpe bai shatu ai ni tai na matu saw shaga nga ai.
Chyeju hte hpring ai daining na Jubali shaning hta Myanmar Mungdan a sari hte myit mada ai lam hpe bai lu la hkra mahkrun lam masum hpe grit nem ai myit hte tang madun mayu nngai:
- Daw sa ai, gasat gala ai lam hpe tawn kau nna, gawng kya, n-gun n rawng ai ni hpe makawp maga ga.
Daw sa, gasat gala ai gawng hpe jahkring kau ra sai. Mung shawa ni, grau nna ma kaji ni hpe makawp maga na matu myit hkrum ra ga ai.
Dinghku ni hpe bai gawgap ya ra ai. Tsun shaga na n-gun, ahkaw ahkang n lu ai ni hpe madat ya ra ga ai.
Myanmar Mungdan kata hta nga ai, kadai marai langai mi mung asak n si sum mat u ga,
gara wuhpung wuhpawng mung shagrit kau n hkrum u ga,
sim sa lam gaw majoi myit chyai ai shingran sha n rai, tatut shabyin lu ai lam re ngu ai hpe kam ga.
- Ramma ni hta arang bang ga.
Myanmar Mungdan a shawng lam gam maka gaw ramma ni a lata hta rai nga ai. Shanhte a yaw shada, myit mada da ai shingran ni hpe hkrit ai hte myit daw myit htum ai lam ni e ka-up kau ya ai kaw na makawp maga ya ra ga ai.
Shanhte hpe hpaji hpa-rat sharin shakung ya ai,
shim lam shara jaw ya ai,
ahkaw hkang ni jaw ya lam gaw, shanhte a prat hpe gaw gap la na matu atsam jaw ya ai;
dai hta grau nna, anhte a kanu mungdan hpe gaw gap ai mung tai nga ai.
Ramma gaw, sim sa lam hpe gaw gap ai ni, Myanma Mungdan hpe tara rap ra ai, rau myit hkrum gaw sharawt na ni rai nga ma ai.
- Tara rap ra ai lam n nga yang mai tsai ai lam n nga lu ai;
shada da kam shamyet ai lam n lawm yang, shada htingram hkat ai mung ru jung ngang kang na n rai nga ai.
Dai majaw, shada da a ningmu hte nsen ni hpe hkungga la ra let aten la nna madat hkat na matu hkrum zup bawngban ai shara nga ra ai.
Shada hka bra nga ai kaw nna shada myit hkrum kahkyin gumdin ai de, myit htum myit daw ai lam ni kaw nna myit mada ai lam de sit sa wa ra ai.
Shada prinem hkra htingram ai lam gaw mahkrun langai mi sha n rai, tinang lata la ai lam langai mi rai nga ai – machyi hkrum nga ninglen tsaw ra ai, hten run htenza hkrum ai kaw nna gaw sharawt ai lam hpe lata la ai lam rai nga ai.
Jet ai hte ngang grin ai sim sa lam
Jet ai sim sa lam ngu ai gaw majan nhpan n nga sai ngu ai hta grau lachyum sung nga ai. Dai hta,
yawng a matu tara rap ra ai,
shim lum ai hte sari sadang hpe makawp maga ya ai lam ni lawm ra nga ai.
Sim sa lam hpe masha shada da kam shamyet hkat ai lam hta ningpawt gaw da nna,
matsan dum lama ai lam hte bau ya let,
myit mada ai lam hte madi shadaw shangang shakang da ya ai.
Sim sa lam gaw grai tsan ai shawng lam a bandung hte shingran n rai,
anhte yawng magrau grang let shanglawm ginlawm nna, ngang kang ai myit daw dan lam hte jawm gaw de sa wa na matu Karai jaw ai lit magam langai mi rai nga ai.
Myanmar Mungdan a matu Akyu Hpyi Ga
2025 (Hkying Lahkawng Hkun Manga Ning) gaw,
Myanmar Mungdan jut shara shagu hte dai shara hkan shanu shingbyi nga ai mungchying sha shagu a salum hta sim sa ai chyeju pu tsawm wa u ga.
Majan koi yen hkawm nga ra ai ni shim lum ai shara lu la mu ga, nta buga de alawan bai nhtang wa lu mu ga,
dip da hkrum ai the makau de kanawng da kau hkrum ai ni, lakawn lanawn la hkrum mu ga.
Ramma ni mung, shanhte myit mada ra sharawng ai, ging dan ai, shawng lam bandung ni hpe ngang kang ai myit mada lam hte rau magrap jum let galu kaba wa mu ga.
Myit kraw hta machyi ai lam ni naw nga ai rai yang mung, mara dat kau ya ga, myit wunma kap nga ai ni mung mai tsai wa mu ga,
hten run mat sai shara hkan mung bai gaw sharawt ga.
Jamjau jamhkau, machyi hkrum nna hkrap ngu hkrap ngoi nga ai hpu, nau, shu-sha ni a nsen hpe htan ya ga:
shanhte a prat hpe galai shai ya lu ai – matsan dum lama ai myit,
sum machyi mat sai lam ni hpe bai lu la hkra galaw ya lu ai bungli,
yawng hpe kahkyin myit hkrum shangun ai tsaw ra myit ni hpe gin shalat la ga.
Ndai Jubali a ninghtoi hta anhte tsap nga let,
“…ga ntsa e, shi sharawng awng ai ni hta, ngwi pyaw sim sa ai gaw nga nga u ga!” ngu ai Hkrismat a kabu shiga gaw anhte a myit hkut daw dan lam hpe n-gun ban ya u ga.
Shada ngwi pyaw ai hte rau jawm nga nna,
Masha a sari sadang hpe hkungga ai,
myit mada lam ni hte hkum tsup htoi tu nga ai wan shadaw zawn Myanmar mung hpe rau jawm pawn sharawt sa wa ga law.
Mungchying sha ni yawng a
“dip da hkrum ai kaw na bai rawt tsap wa lu ai atsam hte mai kaja ai myit” hta kam shamyet let,
+ Cardinal Charlse Maung Bo, SDB