Hkristu hta tsawra ai Nu Wa Hpu Nau ni,
Yawng kabu gara nga ga, dai ni gaw anhte Myitkyina sasana a matu sagu rem wa nnan
hpe saradaw shatai ai poi rai nga ai. Karai Kasang a hpung shingkang hpe Kabu gara ai
shakawn kungdawn nga ga, Karai Kasang a kaba dik ai shaman chyeju hpe mu mada
hkam la lu ai poi nhtoi rai nga ai. Myitkyina sasana a matu myit mada shara nnan bai
mu mada wa lu shangun ai nhtoi mung rai nga ai zawn, law la ai nawku hpung a sasana
magam yin gam hta kabu gara ta gindun let magam bungli jawm gunhpai sa wa na
matu, anhte hkum shagu hpe saw shaga ai nhtoi mung rai nga ai.
Akyu hpyi ai hte shaning law law anhte ala dingda lai wa saga ai. Akyu kade hpyi tim
mahtai nmu lu hkraw ai zawn byin ai majaw, anhte myit daw myit htum ai, anhte a akyu
hpyi ga ni hpe Karai Kasang nmadat ya sam ai, ngu nna pyin hkam sha lai wa saga ai.
Raitimung, tsawra ai hpu nau ni, Karai Kasang gaw shi a aten hta htap htuk dik ai lam
hpe lajang shabyin ya nga ai. Shi a aten du sai rai yang kadai mung dai lam hpe
jahkring shingdang da lu na nrai. Ya gaw Karai Kasang shi a aten du sai hte maren kaja
dik ai lam hpe lajang ya sai. Ya nanhte a man e du dung nga ai wa gaw nanhte a sagu
rem wa rai nga ai. Moshe a myit masin rawng ai wa, shagrit shanem ai, ngang kang ai
makam masham rawng ai, myit galu kaba ai, myit marai rawng ai, ngang grin ai myit
masin hte woi awn chye ai ning baw re.
Dai ni na nhtoi gaw anhte Myitkyina sasana a matu saradaw shatai poi san san sha
nrai, Myitkyina sasana a matu hkrun lam nna hkawm hpang na nhtoi mung rai nga ai,
synodal journey ngu ai, rau jawm pawng hkawm sa ra na hkrun lam rai nga ai. Lai wa
sai ten na, myit ga garan hkan ai, nhkrum nra re ai lam ni hpe shingdu de tawn kau da,
myit machyi hkat ai lam ni hpe tsin shamai kau rai nna, Madu Yesu hta langai sha myit
hkrum myitra let jawm hkawm sa na matu rai nga ai.
Jau ni hpe n gun jaw mayu ai:
- Ndai aten gaw, myit mada lam hte myit hkrum myit ra jawm shakut gawgap
hkawm sa ai aten rai wa u ga. Jubilee shaning hta, myit n gun nnan bai jahpring
la lu ai nawku hpung byin tai hkra shakut hkwm sa ga, nga nna saw shaga ai Wa
sarabyin Francis a myit masin hte myit hpawm let, jawm hkawm sa ga. Madu
Yesu hta kam hpa nga let, tsawra lam hte tara rapra ai lam ni hta ru jung npawt
gaw da ai myit hkrum gahkyin ai nawku hpung, byin tai hkra jawm gaw gap nga
ga. - Dai ni na nhtoi gaw, Karai Kasang jaw ya ai chyeju kumhpa hpe lu la nna kabu
gara nga ai nhtoi rai nga ai zawn, Karai Kasang ra sharawng saw shaga ai lam
hta hkawm sa na matu myit da ting ra na nhtoi mung rai nga ai. Dai gaw, anhte a
Myitkyina sasana hpe myit mada lam nhtoi, htoi dawn pru wa ai saradaw
ginwang byin tai hkra gram lai la ra ai ngu ai magam lam rai nga ai. Ndai magam
bungli hpe kabu gara jawm gun hpai na matu jin jin rai nga ga.
Myit Hkrum Myit Ra Let Magam Bungli Rau Jawm Gun Hpai Na Matu Aja Awa Lajin Mayu Ai :
Saradaw nnan hpe lu la sai hte maren, myit hkrum myit ra let magam bungli rau jawm
gunhpai shakut sa wa ga. Anhte a buga hta ru ai rak ai lam ni law law nga nga ai,
raitimung, anhte myit hkrum ga ai rai yang dai yak hkak lam ni yawng hpe awng dang
kau lu na n gun anhte hta nga nga ai. “Wenyi a myit hkrum ai lam hpe ngwi pyaw ai
makyit sumri hte hkan shatup na larau ladau rai nga mu” (Ephesians 4:3) nga nna kasa
Pawlu shadum da nga ai. Lai wa sai ten na myit nhkrum nra re ai lam ni hpe tawn kau
da nna Karai kasang a amyu masha ni hpe daw jau ai lam hta myit hkrum gahkyin nga
ga, ngu nna wa jau ni hpe aja awa lajin mayu nngai.
Wa sarabyin Francis tsun ai, “Madu Yesu hte bung ai saradaw gaw, sagu hpung masha
ni hte ni ni htep htep nga ai, sagu ni hpe shi chye nga ai zawn sagu ni mung shi hpe
chye nga ai.” Saradaw nnan hpe madi shadaw la nga ga, lai wa sai ten na myit machyi
hkat lam ni hpe tsin shamai kau rai nna, myit hkrum gahkyin let saradaw nnan hte
magam bungli rau jawm gun hpai nga ga. Shaloi she anhte a saradaw ginwang gaw,
Madu Yesu a tsawra ai lam hpe shadan shadawng ya ai, myit hkrum gahkyin ai saradaw
ginwang tai wa na rai nga ai.
Tarahkaw sara/sarama ni hte hpung magam gun ni yawng hpe mung n gun jaw
mayu nngai:
Ndai sasana hta nanhte a magam bungli lit lamang ni gaw grai nan ahkyak nga ai.
Nanhte a shang lawm n gun dat ai magam bungli ni yawng gaw saradaw a yaw sing ai
masing masa lam ni, jau ginwang hte ginwang up jau ni a yaw sing ai masing masa lam
ni hte langai sha tai nga hkra shakut nga ga ngut nna n gun jaw da mayu nngai.
Hpung masha ni hpe mung n gun jaw dat mayu nngai:
Hpung masha ni ngu ai gaw, nawku hpung a ahkyak lung hkrung ni rai nga ai. “Hpung
masha ni ngu ai gaw nawku hpung hta lawu tsang masha ni nrai, nanhte gaw nawku
hpung nan rai nga ai” nga nna Wa sarabyin tsun ai. Nanhte a saradaw nnan hte myit
masin langai sha, myit hkrum gahkyin gumdin nga ga. Anhte yawng jawm shakut ai a
marang e, anhte a nawku hpung gaw, tsawra myit hkrum gahkyin ai nawku hpung, Kabu
gara ai shiga hte hkrak asak hkrung ai nawku hpung tai nga na rai nga ai. Myit hkrum
myit ra lam hpe gaw gap ai, simsa lam hpe shabyin ai nawku hpung mash ani byin tai
nga ga. Law la ai sasana magam bungli ni hpe Saradaw shi hkrai sha galaw gun hpai lu
na n rai, Mawshe zawn, myit su kam ram ai masha nkau mi hpe lata san la nna, shi a
magam bungli ni hpe gam garan gun hpai shangun na rai nga ai. Saradaw nnan hku
nna hpung masha ni a akyu hpyi garum ya ai lam, jawm madi shadaw n gun ya ai lam,
jau ni a rau jawm shang lawm magam bungli galaw ai lam ni hpe ra na rai nga ai. Anhte
a buga gaw majan hte kaga lam amyu myu a majaw mung cying sha ni ru yak jam jau
lam ni law law hkrum nga ai aten rai nga ai majaw, ndai zawn magam bungli ni hpe rau
jawm gam garan gun hpai ai lam galaw na matu hkyak hkyak ra kadawn nga ai.
A Visionary Bishop for Kachin: A Land of Hope Amid Crises
Saradaw nnan a ga lashum ga manoi gaw, “Shi mungdan hte shi a ding hpring ai lam
hpe shawng tam nga mu” ngu ai rai nga ai. Ndai gaw anhte a buga hpe bai gram gaw
gap na matu saw shaga ai lam rai nga ai. Ru ai yak ai lam ni law law hkrum nga ga ai a
lapran, Karai Kasang a mungdan anhte a ka-ang e dik wa hkra shakut na matu saw
shaga ai lam rai nga ai. Anhte a shawng lam hta, hkrum lu wa mai ai ru yak lam ni law
law nga nga ai, dai lam ni hpe la kau ya na matu anhte akyu hpyi ga ai nrai, dai ru yak
mang hkang lam ni hpe gun hpai lu na n gun atsam anhte hpe jaw ya na matu she
anhte akyu hpyi ga ai. Ndai akyu hpyi ga gaw, saradaw nnan a matu anhte hpyi ya ra na
akyu hpyi ga mung rai nga ai.
Anhte wunpawng sha ni hkrum nga ai ru yak mang hkang lam ni gaw grai nan hkrit
tsang hpa lam ni rai nga ai zawn, grai ran la yak ai yak hkak mang hkang lam ni mung
rai nga ai.
- Hpyen yen tsin yam lam:
Anhte a buga hta, majan mang hkang a majaw tinang a mare buga hta shanu nga n mai
mat ai. Masha yawng mayawng tinang a mare buga hpe kau da nna, hprawng yen
hkawm nga ra ai. Hpyen yen tsinyam dabang ni hkan garen gari shanu shing byin nga
ra ai, tinang a buga dum nta de bai wa lu na aten hpe galoi mung myit mada ala nga ra
ai. Israel amyu masha ni nam mali zai bru jang hta bu hkawm lai wa ra ai zawn, dai ni
anhte myu sha ni mung bu htawt hkawm nga ra ai, nawku hpung nan mung hpeyn yen
tsin yam hkrum nga ai. - Ramma ni myit daw myit hten hkrum ai:
Anhte a buga hta ramma ni law law myit mada shara nnga ai zawn hkam sha nga ma
ai. Laika hpaji sharin hkaja la lu na ahkaw ahkang ni nlu ai, kan bau bungli madung nlu
mai ai, Ndai zawn re ai masa lam a majaw ramma ni law law myit daw myit hten nga ma
ai hte, nkau mi nga yang nang hpam malu masha hta hkrat sum mat wa mat ai, nkau mi
gaw masha ni a maw shat mat sha ai, yam sha hkrum ai ni tai mat ma ai. - Ka ni nanghpam du hpaga galaw lam:
Anhte a buga gaw, ka ni nanghpam du hpaga galaw lam ngu ai n hkru ai nsin shing nip
ga-up da hkrum nga ai. Ndai gaw anhte yawng hpe gasat shamyit jahten nga ai katsin
majan nan rai nga ai. - Law la ai yak hkak mang hkang lam ni:
Shaning law law byin nga ai majan mang hkang lam ni a majaw, matsan jam jau ai,
galaw lu galaw sha nmai ai, ngu ai tsin yam lam ni hpe masha law law hkrum kadup nga
ma ai. Ndai yak hkak lam ni kaw nna lawt lu na matu gaw, majan mang hkang lam ni
hpe shazim kau ra ai ngu ai lam sha nrai, ndai zawn byin pru shangun ai lam ni a ru
npawt ni hpe gram lai lam ni galaw kau ra na rai nga ai.
- Karai Kasang a mungdan hpe rau jawm tam gaw gap ai:
Ru yak mang mang lam ni law law hkrum nga ai a lapran, shu la dan la ra ai magam yi
ngam law law nga ai majaw magma bungle galaw na matu Kabu gara ai shiga anhte
hpe saw shaga nga ai. Anhte a buga hta galaw ra ai magam bungli yin gam ni law law
nga nga ai.
Ramma ni: Saradaw nnan a lam woi matsun ai lam ni gaw, ramma ni a myit daw myit
hten lam ni hpe myit sharawt ya ai lam tai wa u ga. Ramma ni hku nna, machye
machyang lam ni hte myit dingman san seng ai lam ni hpe hkan tam nna, anhte a buga
hpe simsa ai tara rapra ai buga byin tai wa hkra gaw gap ai masha ni tai nga ga.
Kun dinghku ni: Anhte a kun dinghku shagu gaw, akyu hpyi ai lam hta shakut ai,
tsawra ai, makam masham ngang kang ai, ru ai yak ai lam ni hpe mung rau jawm gun
hpai la chye ai kun dinghku ni tai nga ga.
Nawku hpung: Anhte a nawku hpung mung, tsinyam hkrum masha ni hpe hkalum
la chye ai, nchye nchyang matsan mayan re ai masha a maga tsun tsap shaga ai ya ai
nawku hpung, myit daw myit hten ai ni hpe shalan shabran lam jaw ya ai, myit mada
lam jaw ya ai nawku hpung tai nga u ga.
Saradaw gaw anhte hpe woi awn la na re, raitimung ndai gaw synodal journey ngu ai
“rau jawm hkawm sa ai hkrun lam” re. Madu Yesu a hkum hkrang zawn langai sha tai
nna rau jawm hkawm sa ra ai hkrun lam rai nga ai. Akyu hpyi ai lam hta myit hpawm ai,
magam bungli rau jawm galaw ai, myit hkrum sai ninghtan ai. Anhte yawng myit hkrum
myitra rau jawm shakut hkawm sa ga ai rai yang, nhkru ai lam ni ma hkra hpe anhte
dang kau lu ai, Karai Kasang a simsa ai lam, tara rap ra ai lam ni shanu nga ai buga
anhte gaw gap lu na ga ai.
Jahtum hku nna tsun mayu ai gaw,
Tsawra ai hp unau ni, anhte jawm galaw gun hpai sa wa ra ai magam bungli ni law law
anhte ashawng e anhte hpe ala nga ai. Dai ni anhte galaw nga ai poi gaw myit mada
lam hte anhte galaw gun hpai sa wa ra na magam lam ni hpe ta tut galaw gun hpai sa
wa na matu saw shaga ai lam rai nga ai. Anhte a saradaw nnan gaw, myit marai rawng
ai, matsan dum lama chye ai, anhte a buga hpe mai kaja ai maga de galai shai woi awn
lam galaw na matu ra nga ai makam masham rawng ai wa rai nga ai.
Anhte rau jawm hkawm sa nga ai ndai hkrun lam hta, Karai kasang mungdan hte shi a
ding hpring ai lam hpe shawng tam nga ga. Myit mada shara kaba hte, magam bungli
galaw hpang na matu yawng jin jin rai nga saga. Karai Kasang the rau rai yang, yang
mayang byin mai ai, ngu ai lam hpe mung myiut dum nga ga.
Yak hkak lam ni law law anhte ashawng e nga nga ai rai tim, dai lam ni yawqng hta
anhte a makam masham gaw grau kaba nga ai. Galaw ra ai magam yi ngam lam ni law
law nga nga ai, shada da tsawra myit hkrum myit ra let, anhte a buga hpe gaw gap ai
magam bungli hta yawng shang lawm gun hpai sa wa ga.
