Myit mada lam Jubali shaning a lam hte seng nna Wa Sarabyin Francis gaw myit mada shara hte makam masham a galai shai shangun lu ai lam ni hpe myit sumru yu let kam sham ai nawku hpung masha ni tinang a asak hkrung prat hpe Karai Kasang ra sharawng awng ai hku nga sa na lam n’gun jaw tsun lai wa ai.
Jubali gaw myit mada shara hte Karai Kasang hpang de bai gayin wa na lam anhte hpe saw shaga nga ai. Myit mada lam hte Karai Kasang hpang de gayin wa ai gaw galai shai ai lam rai nga ai . Anhte a prat hta anhte mu mada ai lam ni hpe galai shai ya lu ai. Ndai ningmu galai shai wa ai lam gaw myit mada shara hpe shabyin ya ai lam rai nga ai. Dai zawn galai lam gaw kalang mi hte sha byin wa lu na n re, myit masa dingsa kaw na n kaja ai mu mada lam ningmu ni hpe kau da nhtawm myit mada shara jaw ai kaja ai mu mada lam ningmu ningnan ni hpe hkap la nna byin mai ai lam hta matut manoi galai shai na lam tsun ai.
Tsinyam tsindam hte shut shai ai lam law la nga ai ndai Mungkan hta myit mada shara n nga, tinang langai hkrai sak hkrung lu na n mai byin nga ai. Tinang hkum grai kamhpa ai hte gumrawng gumtawng ai myit jasat gaw n myit mada ai hkrang hku dan pru wa ai hkrung rawt sai Madu Yesu hpe mu chye lu na matu pat shingdang da ya nga ai.
Shagrit shanem ai hte galai shai wa ai lam gaw kaga masha ni hpe hkap la nna myit mada shara pru wa ai myit hpe sharawt ya lu ai. Myit mada ai lam gaw kyang lailen ni hpe galai shai shangun nna Karai Kasang hpang de bai gayin wa ai lam rai nga ai. Tengman ai makam masham gaw matut manoi galai shai wa ra ai nga nna Wa Sarabyin Francis Jubali shaning a lam hte seng nna kahtap n’gun jaw tsun lai wa sai. Jubali shaning hta Karai Kasang a matsan dum lama ai hte shamai shatsai hkrum ai ni, myit mada shara hte galai shai ai ni anhte tai nga ga.