Daini na Ja Chyum Mungga hpe hti sum ru yu ai shaloi e, mungkan sutgan hpe Karai hpe zawn myit jung nga ai gaw, hkrit hpa kaba rai nga ai lam hte seng nna, anhte hpe shadum ya nga ai. Hpa majaw ning nga tsun shadum nga ai gaw, mungkan shinggyim masha ni a myit masa arawn alai ni gaw, mungkan sutgan ni hta sha myit manoi nga ai hpe shadum ya nga ai. Sut su ai wa Karai Kasang a mungdan de shang na hta, gawla-uk gaw samyit na hku gale na mahtang grau loi nga ai ngu Yesu chyum mungga hta dan dan leng leng tsun shadum ya sai. Na mau na zawn n loi la nga ai.
Anhte shinggyim masha ni a matu mau hpa wa, n byin mai ai raitim mung, Karai Kasang gaw mahkra hpe shabyin ya lu nga ai. Karai Kasang yawng mayawng hpe dang di lu ai wa re. Shingrai Karai Kasang tsun ai gaw, nye a matu hte kabu gara shiga a matu, dum nta kahpu kanau kajan ni, kanu kawa ni kashu kasha ni hte lamu ga ni hpe kau da ai wa kadai raitim, ndai prat hta htam latsa nlu ai kadai n nga na ra ai. Bai htawm hpang prat e mung nhtum nwai ai asak lu la na ra ai. Shing nga tsun da sai hte maren, mungkan sutgan ladu lai myit marin ai lam hpe, koi yen nga sa lu hkra shakut let, htawm hpang prat hta nhtum nwai ai asak lu la hkra shakut sa nga ga law.
