Ya aten machyi sawng nna tsi rung rawng taw nga ai Wa Sarabyin Francis gaw shi hkum nan n hkamja taw ai raitim shi a matu akyu hpyi ya ai ni hpe chyeju dum ai lam, Myanmar Mungdan hte mungkan ting simsa lam lu wa na matu akyu hpyi ya nga ai lam tsun dat nga ai.

Wa Sarabyin Francis gaw nsa sa lam hte seng ai sinwawp bum ana sawng ai masa byin taw ai majaw Roma mare na Gemelli tsi rung hta tsi rung rawng tsi tsi hkam la taw ai bat lahkawng jan na sai rai nga ai.

Asak ( 88 ) ning rai sai Wa Sarabyin Francis gaw ya na zawn shi hkum nan machyi tsin yam hkrum taw ai raitim majan byin nga ai Myanmar mungdan hte Ukraine, Palestine, Israela, Lebanon, Sudan, Kivu mungdan ni a matu akyu hpyi ya ga” nga nna tsun dat ai lam Vatican shiga dap March 03, 2025 ya shani ndau shana ya nga ai. Wa Sarabyin a ndau laika hta Shi a hkam kaja lam a matu akyu hpyi ya ai ni hpe mung chyeju dum ai lam tsun ai.

“ Nanhte akyu hpyi ya ai majaw chyeju dum ai . Ngai mung nang a matu akyu hpyi ya ai.

Grau nna, simsa lam lu na matu ndai shara kaw nna ngaiakyu hpyi nga nngai”

Ya aten Wa Sarabyin Francis mai tsai hkam kaja wa na matu mungkan ting na nawku hpung masha ni akyu hpyi ya taw ai rai nga ai.