Hkristu Madu hta tsawra ai hpunau ni e, Kabu Gara ai Paska Poi rai u ga, Happy Easter, ngu nna shakram dat nngai!
Daini na Nhtoi gaw anhte a matu Myit mada lam kaba hte Shamai shatsai ya ai Nhtoi rai nga ai. Ndai Myit Mada Lam hte hpring nga ai Jubali Shaning hta anhte gaw yawn hkyen ai ngu ai hpe n hkrum yu ai nisa du hpawng ai ni n rai ga ai. Jamjau jamhkau ni hta baptisma (Kashin Kamun) hkam la nna, bai hkrung rawt ai wan hta Nnan bai shangai ai ni rai ga ai.
Majan a majaw ngam taw ai dap, nga shara ni shamat kau ai, shing-ra Tara hpyen a majaw hten run htenza lam kaba ni, yawn madai ai lam ni a lapran kaw nna, “Lup mahka na nlung hpe shachyai kau sai. Madu gaw bai hkrung rawt wa sai. Anhte a Myit Mada Lam gaw Hkrung nga ai” ngu nna teng man ai lam hpe gwi gwi jahtau garu ga ai.
Lam Mali (3) hpe jawm myit yu ga:
- Karai Kasang na ya ai, Shi mu mada nga ai, Shi anhte hpang de yu hkrat wa ai (Pru mat wa ai Laika 3:7)
Daina anhte na la sai shawng na Chyum Mungga hta, Karai Kasang tsun ai, “Nye a Amyusha ni a ru yak shoihpa lam ni hpe ngai mu se ai. Shanhte a hkrap ai nsen hpe ngai na ya ni ai, shanhte hpe hkye mawai la na matu ngai yu hkrat wa ni ai”.
Wan grung ai sumwum kaw nna sai hte galu ai Yesu a Wudang du hkra laman, anhte hpe teng man ai lam langai hpe sha Chyum mungga shaleng ya ai: dai gaw,
Karai kasang gaw, matsan mayan hkrum ai ni a nsen hpe madat ya ai, adip arip hkrum ai ni a nni nkri hpe shi chye ya nga ai, shi a myiman hpe shanhte kaw na galoi n gayin mat wa ai ngu ai rai nga ai.
Ahpye alam rai nga ai Myanmar Mungdan hta hkrat ai myi-pwri si gahte shagu hpe shi mu ya ai. Zingri zingrat hkrum ai masha ni shanhte a lawt lu lam mahkrun hta Karai Kasang hkan lawm nga ai ngu ai gaw Paska mungsung rai nga ai.
Karai Kasang gaw, htaw! Matsaw ningtsang shara mi hta dung nga nna anhte a jamjau lam ni hpe yu dung nga ai wa n rai. Shi gaw – wan grung ai de mung yu wa ai, yawnhkyen hkrum nga ai ni kaw mung du ai, hpyen yen dabang ni de mung du ai, masha shada gasat ninggyet hkat ai shara ni de shang nna Lawt lu lam hte simsa lam hpe jaw ya ai. Shi gaw, anhte hpe sa gawan yu ai sha n rai, anhte zawn machyi makaw hkam la sai.
- Hkristu gaw Anhte a Wunma ni hta shang nga ai
Kade nna shi ai ten, anhte hta byin mat wa sai lam ni gaw n htum ai Wudang hpai ai lam she rai nga ai. Masha langai mi, tsun yu ai: “Myanmar mung masha ni a matu Lusha Gam ladaw gaw nhtoi 40 ya sha n rai, 365 ya she rai nga ai” da.
Law la ai anhte a manghkang ni hpe chye madat hkra anhte shakut ai zawn, Madu Yesu a Nni Nkri lam ni hpe mung sumru yu nga ga ai. Madu Yesu gaw, tara agyi wa zawn anhte hpe yu taw ai n rai; anhte a myit kaji myit daw ai lam hta, shi hkumnan mung machyi hkrum let anhte a manang tai ya nga ai.
Gaida jan a garen gari ai hta shi lawm nga ai zawn, hprawng hkawm ra ai ma kaji shagu hte mung rau hkawm nga ai. Machyi hkrum ai ni hte ndaw n hka rau nga ai tsi sarama ni, tinang a hpung masha ni hpe n kau da ai sha lakawn nga ai Mama ni, Jau ni a makau e Yesu hputdi let rau nga nga ai.
“Anan hta akan” nga ai hte maren – jahten sharun atsam kaba la ai Nnang Nawn kaba du ai kaw nna, jamjau ai hte si hkrung si htan gaw anhte amyusha ni hte n daw n hka nga taw ai manang she rai mat sai.
Ratim, lahkawng ngu na Chyum mungga hta, Madu Yesu a si ai lam hta baptisma (Kashin Kamun) hkam la sai ni anhte gaw, Shi Madu a bai Hkrung Rawt ai hta mung shang lawm lu na ga ai nga nna gasadi jaw da nga ai. Dai gaw anhte a makam masham rai nga ai.
Luke 24:5-6 hta Lamu kasa yan gaw, Yesu a lup de sa ai numsha ni hpe, “Hkrung ai masha hpe si ai ni a lapran hta nanhte hpa rai tam nga myit ta; shi nang e n nga ai, shi bai hkrung rawt sai” nga nna hkap tsun ma ai. Easter, Paska ngu ai gaw si ai lam yawng a jahtum re. Myit Mada let sak hkrung ai lam a jahpawt manap ninghkaw Jan rai nga ai.
Bai hkrung rawt ai ngu ai gaw lamik kumla langai sha n rai nga ai, RAWT MALAN AI lam rai nga ai. Lup mahka na nlung gaw sit mat ai sha n rai, “adup ga ayai kau hkrum sai.” Lup sunghku gaw tsawra myit hpe n gyit hkang da lu ai. Nsin gaw nhtoi hpe n magap kau lu ai.
Myit masin salum hta machyi hkrum nna, hkrit tsang ai lam a kata rawng nga ai Myanmar mungchying sha ni yawng hpe Yesu n-gun jaw nga ai:
- “Hkum hkrit myit; ngai nanhte hte rau rai nga nngai”.
- Karai Kasang gaw, anhte hpe hkrit tsang myit hpe jaw ya ai n rai, n-gun atsam, tsawra ai, myit gring ai hpe jaw ya ai (2 Timothy 1:7).
- N tara ai hku dawdan hkrum ai, dip da hkrum ai ni hpe, “Nang hpe ngai n malap da ai” ngu nna kahte tsun nga ai.
- “Ma kanu gaw, shi a kasha hpe malap kau ai rai tim, ngai nang hpe n malap da nngai. Na a mying hpe nye a lata lahpan hta ka matsing da ni ai” (Isaiah 49:16).
- Nawku Hpung Gaw Myit Mada Lam Nga ai Amyusha Ni Rai Nga ai
Romans 8:11 hta n-gun jaw da ai gaw: “Yesu hpe si ai kaw na bai jahkrung sharawt la ai Wenyi nanhte hta nga nga ai rai yang gaw, nanhte a si chye ai hkum hpe mung asak jaw na ra ai” nga ai.
Dai majaw, Myanmar Mung Nawku Hpung e, jan rai rawt tsap u – myit hkum daw, sakse hku nna rawt tsap u. Myit machyi ai hte n rai, bai rawt na ngu ai myit mada lam atsam hte rawt u.
Ndai lam ni hpe anhte myit dum nga ga:
Anhte gaw kau da hkrum ai ni n rai, namman hte chya hkrum ga ai.
Anhte gaw tsinyam hkrum ai ni n rai, awng padang lam hpe gun da ai ni rai ga ai. Anhte gaw sharung shayawt nga ai ni sha n rai, Yesu lup kata hta n nga sai lam hpe ndau shabra ai ni rai nga ai. N tara ai lam shagu hpe “Nang daw dan shagu jaw ai n re” ngu tsun ga. Yawnhkyen ai lam shagu hpe “Nang rawt galu kaba wa na ndai” ngu tsun ga. Lup sunghku shagu hpe “Nang jahtum n re” ngu tsun ga.
Anhte a mungdan hta myit mada lam a wan hpe wut shagrung ga.
2025 Ning ladaw hpe yu dat ai shaloi, kanu mungdan gaw grai yak ai hkrunlam hpe hkawm ra nga ai hpe mu lu ai: mung masa n pyaw ai majaw hkrit tsang ai hte nga ra ai, sut masa n kaja ai majaw matsan hkrum ai, masha wuhpung wuhpawng hta shada n ru n ra, daw hka ai lam ni byin ai.
Dai hta jat nna sawng dik ai nnang nawng gaw anhte shada a myit hkrum ai lam hpe chyam dat ai, shaning law law yak hkak ai lam ni a majaw tsam taw sai dum nta ni hpe mung ashun anawn daw ganga kau shangun sai.
Raitim, Easter gaw ang sha-a, aten hkrak, anhte hte wa hkrum nga ai. Wut daw chyen sumpum ni a lapran, tak n chye ai shawng lam, sum machyi ai lam kaba ni a lapran kaw nna asak hkrung ai lam hpe ndau ya nga ai. Myit mada lam kaba hte anhte bai rawt wa na ga ai.
Easter ngu ai gaw ngamu ngamai ai lam ni a matu galaw ai poi n rai.
Si hkrung sihtan, myit daw hten ai, hten za ai lam ni hpe ninghkap ai lam rai nga ai. Ndai zawn re ai masa ni a lapran hta Karai Kasang a nsen hpungtang gashaw nga ai: ga npu e ashun awam rai nga tim, anhte kau da n hkrum ga ai. Bai rawt tsap na matu shaga nga ai. Bai gaw gap na matu shaga nga ai. Manap Jan a nhtoi hpe ala nga ai mungdan a matu nhtoi hpe hpai ladawn ai ni tai na matu shaga hkrum ga ai.
Daining na Hkajaw Poi hte Chyoi Pra ai Laban Bat gaw Bat mi a laman hta rau ang nga ai. Majoi ang wa ai sha gaw n rai na re. Anhte hpe shadum ya, n-gun jaw ya ai lam rai na re.
Simsa lam nli tum hpe jawm hkai ra saga ai. Marai langai hkrai hku sha n rai, wuhpung wuhpawng, amyusha langai hku nna jawm gaw gap ra saga ai. Shada da mara raw hkat nna htingram hkat ra saga ai. Shamai shatsai ai hpe tam ra ga ai. Lup mahka na nlung kaba hpe shachyai kau lu ga ai rai yang, dip gamyet ai lam, shada yam sha hkat ai ngu ai lung-bawng ni hpe mung gawt kabai kau lu na ga ai.
2025 Ning a Paska poi gaw poi langai sha n rai u ga, nnan bai hpang la ai chyoi pra ai shaning rai u ga. “Lam shagu ashun ai ten hta shanhte yawng rau jawm tsap ma ai, shanhte grau n-gun ja wa ai, sumnung ai, matsan dum lama ai lam hta grau myit hkrum ma ai, hpa majaw nga yang, “tsawra ai gaw si ai hta grau n-gun ja ai, myit mada ai gaw kaman lila n rai” ngu ai hpe shanhte kam ma ai ngu nna masha ni tsun shajang mu ga. Simsa lam hta npawt gaw ai Tara rapra ai mungkan de sit sa wa na matu anhte a Mungdan su hprang wa nu ga law.
Myit mada lam a Madu, bai hkrung rawt sai Hkristu e, anhte a lapran de du sa rit.
Yawng hpe Happy Easter! Kabu Gara ai Paska Poi rai u ga!
Amen. Alleluia.
