Wa Sarabyin Leo gaw shi a General Audience hta, Yesu a hkrung rawt myit mada lam gaw “anhte a ningmu hpe tsep kawp galai shai kau ya ai” hte “myit ru myit tsang ai lam hpe jahpring ya lu ai myit mada lam hpe shabyin ya ai” ngu ai hpe madi madun dan ai.
October 22 ya shani na General Audience hta, Wa Saradaw Leo XIV gaw, Hkristu a hkrung rawt ai lam hpe myit sumru let, “Psaka mung sung lam gaw myit sumru yu n htum ai” ngu tsun ai. Shi tsun ai hta, Hkrung rawt ai lam a makoi magap da ai lam hpe sung sung sawk sagawn ai gaw, kam sham ai ni hpe “hpring tsup ai n-htoi lam de shalen ya ai.
Yawn hkyen ai lam gaw kabu gara ai lam a lagut re .
Wa Sarabyin gaw Hkrung rawt ai lam hpe dai ni na aten na yawn hkyen ai lam hpe shamai shatsai ya ai. Yawn hkyen ai lam gaw “sak hkrung lam a lachyum hte n-gun atsam hpe lagu la kau ya lu ai” n-gun rawng ai ngu nna tsun dan ai. Ema-u mare de sa wa ai lam hta sape ni a myit mada shara nnga mat ai zawn rai nga ai, myit daw myit hten nga ai—rai tim, hkrung rawt wa sai Hkristu hte hkrum katut ai gaw kabu gara lam hte yaw shada lam hpe n-gun bai jat ya lu ai lam hpe mung tsun dan ai.
Yesu gaw sape ni a “angawk ai” myit masin hpe daru kau nna, shanhte hte rau muk garan jaw ai shaloi, shanhte a “myit masin myi” hpaw wa nna, myit mada shara bai lu wa ai. Ndai hkrum katut ai lam gaw, Hkrung rawt ai lam gaw ga si langai mi sha n rai, tengman ai, hkam sha lu ai mabyin langai mi re—Yesu gaw si hkrung si htan hpe wudang hta jen da hkrum nna bai hkrung rawt wa ai gaw awng dang lam a sak se rai nga ai.
Hkrung rawt sai Hkristu gaw myit ru myit tsang lam hpe shaprai kau ya lu nna, ningmu hpe galai shai ya lu ai, yak hkak ai aten hta pyi myit mada shara nnan hpe jaw ya lu ai hpe dum na matu Hkristan ni hpe n-gun jaw ya nga ai. Hkrung rawt ai lam hpe yu yang, “labau hta myit mada shara kaja lam law law naw nga ai.” ngu ai hpe Wa sarabyin hpaw shadan dan nga ai.