October 26 ya, Laban shani na Angelus hta Wa Sarabyin Leo gaw, Hparishe wa hte kang hta ai wa a ga shadawn hpe myit sumru yu let, kam sham ai hpung masha ni hpe Karai Kasang hte kanawn mazum ai lam hta shagrit shanem ai myit hte san seng ai myit masin rawt kaba na matu saw shaga dat ai.

Wa Sarabyin Leo XIV gaw, Synodal wuhpung ni a matu Jubilee Missa hkungga ngut ai hpang, Kasa Htingnu kaw nna tsun shaga ai shaloi, Shi gaw, tinang hkum hpe dinghpring ai hte makam masham hpe hpaga yumga galaw ai hta ru jung ai Hparishe a gumrawng gumtawng ai akyu hpyi ga hte, myit masin hpaw ya ai ahkun hkanse hta ai wa a shagrit shanem ai matsan dum lama ai lam hte shingdaw dan ai.

Wa Sarabyin gaw shagrit shanem ai lam gaw tengman ai lam hte shamai shatsai lam de du wa na lam hpe madi madun let, shi a yubak mara hte mying gumhkawng ai lam ni nga tim, Karai Kasang hpang de teng man ai hku sit sa wa ai ahkun hkanse hta ai wa a nden marai hpe shakawn shagrau ai. Tengman ai hkye hkrang la ai lam gaw, tinang a kaja ai lam hpe gumrawng gumtawng ai, mara hpe makoi magap da ai kaw na n re ai sha, Karai Kasang a man e myit masin mahkra hte ngang ngang tsap ai kaw na lu la ai re, nga nna tsun ai.

San pra ai Augustine a ga hpe lakap nna, Wa Sarabyin Leo gaw, yubak mara hpe gumrawng gumtawng let makoi magap ai, machyi makaw hpe makoi magap ai hte shingdaw nna, shagrit shanem ai gaw, mai tsai wa na matu hkala nba ningma ni hpe hpaw dan ai hte bung nga ai.

Kam sham ai hpung masha ni hpe anhte a shut ai lam ni hpe n hkrit n tsang ai sha yin la na matu, Karai Kasang a matsan dum lama ai hta ap nawng da na matu tsun shadut ai. Ndai shagrit shanem ai lam gaw, myit masin kraw kata na ningma ni hpe shamai shatsai ai lam hpe lu la nna, “gumrawng gumtawng ai ni a matu n rai, shagrit shanem ai ni a matu re” nga nna wa sarabyin tsun shadum dat ai.