Daini gaw, Your Father Gives Good Gifts (Na a Wa Gaw Kaja ai Kumhpa Ni Jaw ai) ngu ai hpe bai sumru akyu hpyi ga. Dai ga-baw hte la-kap nna, chyum mungga daw mi hpe shawng madat yu ga:
Kasa Yaku a shagun laika, daw kaba langai, kaji shi-sanit hta (1:17)
“Kaja ai kumhpaw nlang hte hte, hkum hkum re ai kumhpa yawng hte gaw, ntsa de na rai nga ai hte, nhtoi hkum ni a Kawa kaw na yu hkrat wa ai rai nna, shi hta e gale galau re ai hte kayin kaye re ai shingnip rawng nga lu ai n rai.”
Karai Kasang anhte hpe mauhpa chyeju kumhpa ni hpe jaw mayu nga ai ngu ai gaw shi a salum a tsawm htum, kaja htum daw langai mi rai nga ai.
Shi nang hpe grai tsawra ai majaw, nang hpe hkum tsup ai kumhpa jaw na matu mahkrun tam nga ai.
Dai gaw – shi nang hpe tsawra nna manu shadan nga ai ngu ai lachyum rai nga ai. Shi anhte hte n tsan ai, anhte a ka-ang e nga nga nna, nhpaw n-ya re ai kabu gara ai, simsa ai hte asak sindan jaw ya na matu bungli galaw nga ai.
Mahte daw kaba sanit, kaji shi-langai (7:11) hta Madu Yesu tsun ai hpe bai dum ga: “Dai rai nna, nanhte pyi n hkru nga myit dai mi, tinang a kasha ni hpe kaja ai kumhpa chye jaw myit yang gaw, dai hta grau n-ga, sumsinglamu na nanhte a Kawa gaw, shi hpe hpyi ai ni hpe kaja ai kumhpa jaw na n rai hka!”
Karai Kasang gaw shi hkum hpe anhte a tsawra ai Kawa hku nna madun dan ai gaw tsawra ging nga ai. Anhte a shinggyim kanu kawa ni a tsawra ai hpe tau yu nna, Karai Kasang anhte hpe kade wa tsawra nga ai ngu ai hpe anhte chye madat hkam sha lu ga ai.
Kaja ai kawa gaw kasha hpe shaman ya ai zawn Karai Kasang mung nang hpe shaman ya mayu nga ai. Raitim, Karai Kasang gaw shinggyim kawa ni ma hkra hta grau mai kaja nga ai. Nang shi kaw na hpa baw kumhpa, shaman chyeju hpyi mayu ai rai?
Shi jaw na kumhpa gaw Hkrismat aten hta anhte jaw hkat ai kumhpa zawn gaw n rai na re, raitim, nang ra nga ai hte hkrak gaw rai na re.
Manang kaja ra ai i? shi a kashu kasha ni a wuhpung de nang hpe woi sa na ra ai.
Tsawra hkrum mayu ai i? Na a ntsa shi tawn da ai tsawra myit hpe madun na matu, Kasha shingtai Yesu hpe shangun dat nna, na a matu si hkam shangun sai. Ya jang, na a kraw kata de shi a tsawra ai hpe Chyoi Pra ai Wenyi hte rau/hku nna ru bang ya mayu nga ai.
Kasang Kasang nang hte rau shanu nga ai hpe chye mayu ai i?
Na a prat tup hta Karai Kasang shamu shamawt bungli galaw ya nga ai hpe mu chye na matu Chyoi Pra ai Wenyi kaw garum hpyi u; moi mung, ya mung, htawm hpang de mung nang hte rau anga nga ai mahkrun ni hpe madun dan rit ngu nna hpyi u.
Ja Gumhpraw ra nga ai kun? Nang galaw nga ai sut masa/ kan bau magam bungli ni hta lam madun myit jahtoi ya na matu, Chyoi Pra ai Wenyi kaw garum hpyi u.
Nang ra kadawn nga ai lam hpa mi raitim, Karai Wa kaw hpyi u.
Shi jaw ya na re;
“Anhte a hpyi mahpyi hpe shi madat mara nga ai, anhte chye ga yang gaw, shi kaw anhte hpyi nga ai lam hpe anhte lu la gaw ai, anhte chye nga ga ai” nga nna Yawhan a shagun laika langai, daw kaba manga, kaji shi-manga (1 Yawhan 5:15) hta tsun da nga ai.
Dai majaw, nang hpyi ai hpe shi madat ya nga ai; grau nna, hpring tsup ai hku bai htan ya na ra ai.
Shi jaw ai kumhpa ni gaw shinggyim kanu kawa ni jaw ai hta grau kaja nna, asak jaw ya ai.
Tsawm la ai manap Jan hpe jaw ai; hpa majaw nga yang, nang yup rawt ai hte tsawm htap ai hpe azi yu mayu ai hpe shi chye da nga ai.
Shi a shanu nga ai hpe jaw ai; hpa majaw nga yang, shi chyu sha jaw ya lu ai simsa ai hpe nang ra ai ngu ai hpe shi chye nga ai.
Manaw manang ngu ai hpe jaw ya ai; hpa majaw nga yang, masha gaw tinang hkrai nga garen hkawm na matu hpan da hkrum ai n re.
Ja gumhpraw sutgan jaw ya ai; nang ra ai lam shagu hpe shi chye nga ai; grau nna nang hku nna kaga masha ni hpe mung jaw ya/ shaman ya mayu nga ai.
Akyu Hpyi Ga
- Asim sha nga nna, Karai Wa nang hpe jaw ya, shaman ya sai chyeju mahkra hpe bai dum shingran yu u.
- Dai chyeju ni mahkra a matu Karai Wa hpe chyeju dum shakawn u – manaw manang ni a matu, dinghku nta masha ni a matu, magam bungli ni, nawku hpung – nang tsawra ai ni mahkra a matu chyeju dum u.
Dai na a chyeju dum ai myit salum gaw, sumsing lamu na, na Kawa hpe grau chyechyang tsawra ai myit hpe alun ya u ga. Hpa majaw nga yang, “dai gaw Hkristu Yesu hta e nanhte a lam Karai Kasang a myit ra ai hku rai nga ai” nga nna Kasa Pawlu tsun da ai.
(Langai Htesaloni, daw kaba maga, kaji shi-matsat (1 Thes 5:18).
- Ya, Karai Kasang na a matu zing da ya ai kumhpa ni hpe mu mada, hkam la lu na matu, na a mi yan salum hpe hpaw ya rit ngu nna Chyoi Pra ai Wenyi kaw garum hpyi u.
Hpa majaw nga yang, kumhpa langai ngai Karai Kasang kaw na sa ai re hpe mu chye hkam sha lu na matu Chyoi Pra ai Wenyi hte myit hpan bung ra nga ai. Ga shadawn;
U-gum Jan shang wa ai (Sunset) gaw,
“ngai hpe Karai Kasang tsawra ai lam tsun nga ai” ngu ai hpe chye madat hkam sha lu na matu –
“nye a prat hta Karai Kasaang galoi mung lawm nga ai, shaga nga ai” ngu ai hpe adum nga ra ai.
Ndai mungga hpe madat la ai ni yawng mung Wa karai kaw na hkum tsup kaja dik kumhpa ni hpe hkam la lu myit ga law.
