CHYUM DAW NI:
Daw 1= Isaiah 2:1-5
Daw 2= Roma 13:11-14a
Kabu gara= Mt 24:37-44
Mungga: Fr. Thomas Brang Awng
Daini gaw shaning (A) na Advent a shawng na Laban shani rai nga ai. Shingra tara hku nna, anhte yawng simsa lam hpe ra sharawng ga ai, hpa majaw nga yang, anhte a wenyi hte arung arai rawt jat galu kaba wa na matu ra kadawn nga ai. Ndai simsa lam hpe anhte akyu hpyi nga ga ai, ndai aten ladaw htum wa de anhte a myit masin, dinghku hte mungkan de simsa lam a hkawhkam Yesu la sa ya na hpe myit mada nga ga ai.
Advent ngu ai ga si gaw Latin ga si lahkawng Ad-ventus kaw na pru wa ai rai nna, “du wa na” ngu ai lachyum rai nga ai (sh) Ad-venire ngu ai lachyum gaw “du sa wa na” ngu ai lachyum rai nga ai. Anhte Hkristan ni a matu, grau nna Kahtawlik ni a matu, Madu du sa na hpe myit mada ai lachyum rai nga ai. Advent gaw Nawku hpung a nawku daw jau lamang nnan hpe hpaw hpang wa ai aten rai nga ai. Hkrismat du hkra bat mali tup hkyen lajang ai aten rai nga ai.
Dai majaw, ndai Advent a shawng na Laban shani hta, Karai Kasang a htani htana simsa ai shara de aten galu hkawm sa nga ai dai shara de kade nna yang du wa wa na re majaw, kabu gara nga na matu nawku hpung gaw anhte hpe kabu shangun nga ai. Simsa ai prat gaw ni wa sai. Dai majaw tinang a prat, dinghku, amyu sha ni hta Hkristu hpe hkap la lu na matu yup hprang nna jin jin rai nga ra ga ai. Daw 1 hta myihtoi Esaia tsun ai ga hku nga yang: “Sinpraw maga na lamu ntsa e madun dan ai, bum ntsa na Madu a nawku htingnu hpe anhte mu lu ga ai.” Myihtoi wa gaw simsa lam hpe gun sa ya Meshia du sa na hpe shi anhte hpe shingran jaw da ya nga ai.
Ndai aten hta anhte myit mada nga ai Meshia gaw anhte hpang de simsa ai hte du sa wa ai. “Shi gaw ahkang aya hte” raitim, anhte hpe dip gamyet sha ai (sh) zingri zingrat ai lam n galaw na re. De a malai, Shi gaw anhte a majan gasat ai htunghking hpe simsa ai htunghking de galai shai kau ya na ra ai: “…Shanhte gaw shanhte shanhte a nhtu ni hpe hkaulan mam htu ai nhtu ni shatai na mara ai: amyu langai mi gaw amyu langai mi hpe nhtu hte gasat na n rai, majan gasat sharin ya na n rai.
Kaja wa myit n pyaw hpa gaw, ndai chyum daw hte New York mare na Mungkan Wunpawng Hpung a bunghku hpe mawn sumli da ai raitim, shi woi awn ai hta mungkan simsa lam n lu jaw ya nga ai. Myit hkrum myit ra ai hku rau nga pra na malai, garan ginhka ai lam, kahkyin gumdin lam hte jinghku jingyu ni hten za ai lam ni grau law wa ai hpe mu lu ai. Hpa majaw nga yang, mung kan ting na “secularism hte humanism a npawt nhpang arawn alai rai nga ai wenyi lam n lawm yang n mai byin nga ai. Masin salum, amyu shagu hta Hkristu up hkang ai lam sha, grin nga lu ai simsa lam hpe jaw ya lu ai.
Ndai simsa lam hpe awng dang hkra hpaw hpang na matu, daw 2 hte kabu gara shiga gaw, jin jin rai nna, yup hprang nga na matu saw shaga nga ai. Pawlu, anhte a Hkyela Madu, simsa lam a Hkawhkam wa hte ni htep ai lam hpe asan sha ndau shabra nga ai: “Anhte a hkye hkrang la ai lam gaw, anhte kayin wa ai shaloi Shi hta grau ni htep nga ai.” Shi shadum ya nga ai: “Aten du wa sai.”
Advent aten gaw anhte a prat hta Madu nga nga ai lam hpe grau nna chye na hkawn hkrang wa ai aten rai nga ai.
>> Advent aten gaw yubak mara a yup pyaw nga ai kaw nna chyeju hte shaman chyeju hpring ai asak hkrung lam de rawt jat wa ai aten rai nga ai.
>> Advent aten gaw, n-gun kya ai lam a ga nhpu hpe yeng seng kau nna, grau nna myit rawt ai hte zet tsang ai aten rai nga ai.
Daini chyum mungga ni a madung lam gaw, Hkristu a Lahkawng Lang Na Du Sa Ai Lam gaw gara aten hta raitim byin wa lu ai majaw, anhte langai hte langai hpe, sadi maja let hkyen lajang nga na matu Yesu sadi jaw ai lam rai nga ai.
Tinang hkum hpe jep joi yu na matu saw shaga ga ai….
>> Ngai gaw nye a wenyi prat hpe atsawm n myit mada ai sha, nye a prat hpe aten jahtum kau nga ai kun?
>> Ngai gaw prat a grau tsaw ai lam ni hpe n myit mada ai sha, kaman lila aten hpe pyaw pyaw hte jai lang nga ai kun?
>> Ngai gaw lagawn lamawn ai hte n dum n dam yup pyaw nga nna, Hkristan lit magam ni hpe gun hpai na malap taw nga ai kun?
Daini tsun mayu ai aten gaw, mungkan ga aten (“chronos”) n rai, Karai Kasang a aten (“kairos”) rai nga ai. Karai Kasang gaw shi a amyu masha ni hpe hkye la na matu, myit ru myit tsang hkrum nga ai myit masin, dinghku, hpaga lam, amyu bawsang yawng hpe simsa lam bai jaw na matu masat da ai aten rai nga ai. Dai majaw, Pawlu anhte hpe ndai hku hpaji jaw ai: “Masha ni shani aten hta galaw ai zawn, anhte mung kaja ai arawn alai hte asak hkrung nga ga… gasat gala ai lam n nga ai sha, manawn masham ai myit n nga ai sha, nanhte a hpyen hking gaw Madu Yesu Hkristu rai nga u ga.”