Daini anhte jawm sumru akyu hpyi na ga baw gaw:
The Prince of Peace (Simsa Lam a Hkawhkam) ngu ai rai nga ai.
Ndai ga baw hte seng nna Myithtoi Esaia Daw kaba jahku: daw kaji kru (9:6) hta rawng ai hpe jawm madat yu ga:
“Anhte a matu kasha shangai nna, anhte hpe shadang sha jaw na mi ai…Shi a ahkang aya hte, shit tawn da ai ngwi pyaw lam gaw law htam wa nna, htum ngu ai n nga na sai; Dawi a ting-nyang ntsa e dung let, dai mungdan hpe shi shagrin tawn da nna, tara hte ding hpring ai hku hkan ai majaw, dai gaw htani htana prat dingsa e grin nga na ra ai. Zawnawng zawwa up ai Yawe a nsu nnawn myit dai lam shabyin nu ai.”
Ndai dinghta ga gaw, anhte hpe myit puba, lit li lam n nga, ru tsang lam n nga, myit daw hten ai hte n hkrum na, ngu nna hkam dahka n jaw lu ai. Anhte nawku ai Karai Kasang chyawm gaw, kaning re ai masa lam hta rai tim, anhte myit simsa ai hpe jaw lu ai. Dai majaw, Karai Kasang hta kamsham ai ni a laklai ai masat gaw – Mungkan madang hta dawn jan ai simsa lam rai nga ai.
Karai Kasang gaw simsa ai hpe shabyin ai, jaw ya ai, shangang shakang da ya ai wa rai nga ai. Dai majaw Madu Yesu Hkristu hpe lakap nna Myithtoi Esaia tau tsun da sai rai nga ai, bai madat yu ga:
“Anhte a matu kasha shangai nna, anhte hpe shadang sha jaw na mi ai; Shi a ahkang aya hte, shi tawn da ai ngwi pyaw lam gaw law htam wa nna, htum ngu ai n nga na sai; Dawi a ting-nyang ntsa e dung let, dai mungdan hpe shi shagrin tawn da nna, tara hte ding hpring ai hku hkan ai majaw, dai gaw htani htana prat dingsa e grin nga na ra ai. Zawnawng zawwa up ai Yawe a nsu nnawn myit dai lam shabyin nu ai.”
Anhte simsa ai hte asak hkrung na lu na matu, Karai Kasang a simsa ai nmaw nsam hpe anhte chye da ra nga ai. Langai Korinhtu, Daw kaba shi-mali, daw kaji sumshi-masum (1 Korinhte 14:33) hta:
“Karai Kasang gaw kashuk kashak lam a Karai Kasang n re ai sha, ngwi pyaw lam a Karai Kasang she rai nga ai” ng anna tsun da ai.
Bai, Roma Daw kaba shi-mali: daw kaji shi-sanit (14:17) hta mung, “Karai Kasang a mungdan gaw, sha sha, lu lu rai na hku n re ai sha, Chyoi Pra ai Wenyi e, dinghpring ai, ngwi pyaw ai hte kabu gara ai, rai nga ai” nga nna Kasa Pawlu shaleng da nga ai.
Bai, Hpilipi Daw kaba mali: daw kaji jahku (4:9) hta mung,
“Ngai kaw e, nanhte sharin la nna hkap la ai hte, na yu nna mu yu ai lam hte hpe, hkan galaw nga mu: shaloi ngwipyaw ai a npawt Karai Kasang gaw, nanhte hte rau anga nga na ra ai” nga nna sanglang dan nga ai.
Anhte gaw Karai Kasang a kashu kasha ni rai ga ai. Dai majaw shi a kasha ni sha, hkam la gying ai ngwipyaw simsa ai hpe shi jaw mayu ai. Karai Kasang, Madu Yesu, shi hkumnan simsa lam rai nga ai. Shi anhte hta nga nga (rawng nga ai) rai yang, kaning re ai masa lam ni hta rai tim, anhte simsa nga na rai nga ai.
Dai majaw, Lahkawng Htesaloni, Daw kaba masum: daw kaji shi-kru (2 Htesaloni 3:16) hta:
“Ya, ngwipyaw ai a npawt, dai Madu nan, nanhte hpe tutnawng e lam shagu hta ngwipyaw ai, a jaw nga u ga. Dai Madu gaw nanhte nlang hte rau a nga nga u ga law” nga nna Pawlu tsun ai.
Dai simsa ai Karai Kasang hte anhte hkrum jang, Mungkan a lit ni gaw hpai ka-aw kau ya ai zawn tsang mat nga ai. Ya jang pyi anhte dai simsa ai hpe hkam la lu ga ai.
Simsa ai hte sumru akyu hpyi ga:
Simsa ai Karai Kasang ai “nmaw asam” hpe sumru yu ga.
“Ya, ngwi pyaw ai a npawt, dai Madu nan, nanhte hpe tutnawng e lam shagu hta ngwi pyaw ai, a jaw nga u ga. Dai Madu gaw nanhte nlang hte rau a nga nga u ga law” ngu ai shaman ga hpe bai sumru yu ga (2 Htesaloni 3:16).
Nang hpe myit n pyaw shangun ai – masa, masha hte myit tsang lam ni gaw gara ni rai kun?
“Anhte a matu kasha shangai nna, anhte hpe shadang sha jaw na mi ai…Shi a ahkang aya hte, shit tawn da ai ngwi pyaw lam gaw law htam wa nna, htum ngu ai n nga na sai; Dawi a ting-nyang ntsa e dung let, dai mungdan hpe shi shagrin tawn da nna, tara hte ding hpring ai hku hkan ai majaw, dai gaw htani htana prat dingsa e grin nga na ra ai. Zawnawng zawwa up ai Yawe a nsu nnawn myit dai lam shabyin nu ai” (Esaia 9:6) ngu ai chyum mungga hpe bai dum ga.
Na a Kawa rai nga ai Karai Kasang hte hkrum zup ai shaloi, Shi a Salum kaw na pru ai simsa ai hpe hkam la u.
Shi a mai kaja ai, shi nang hte ni htep ai, shi a atsam ningja hte galoi mung garum na jin jin rai nga ai lam ni hpe kam let, na a myit-ru tsam-pu lam ma hkra hpe shi hta ap da kau u. Kasa Petru anhte hpe n-gun jaw nga ai:
“Shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu” (1 Petru 5:7).
Ngwipyaw Simsa lam ngu ai gaw, anhte lata la ai hta mung hkan nga ai. Mungkan lam ni hpe – Sumsing lamu hte wenyi lam mu-jut maga hku yu ai n rai yang, dai lam ni gaw anhte hpe ahtu hkra machyi shangun nga ai.
Hpilipi Daw kaba masum: daw kaji matsat (3:8) hta,
“Gaja wa nye a Madu Hkristu Yesu a chye chyang lam a chyahtum chyalai re ai a jaw e, yawng mayawng sum mat ai lam arai nga ai, ngai nawn nga nngai” nga nna Kasa Pawlu tsun ai.
Dai majaw, Karai Kasang hta kam shamyet ai hta sha lu la mai ai “simsa ai” hpe Mungkan lam ni a majaw hkrum ai pu-ba lam ni e kashun la kau ya na n hkang hkum jaw.
Roma Daw kaba shi-manga: daw kaji sum-shi-masum (15:33) hta,
“Ya, ngwi pyaw ai a npawt Karai Kasang gaw, nanhte yawng mayawng hte rau anga nga u ga law” nga nna San Pawlu anhte hpe n-gun jaw nga ai.
Simsa lam a Hkawhkam Wa Madu Yesu Hkristu gaw, mungga madat nga ai ni yawng hte rau anga nga u ga law.
By Cardinal Charles Bo