Daini na Ja Chyum Mungga hpe hti sumru yu ai shaloi e, San Yawsep a bungli hte Yesu Hkristu shangai wa ai lam hpe na chye lu ga ai. Dai ni na kabu gara shiga hta e, Nu Maria a ningrum ningtau wa San Yawsep a shaga la ai lam hpe mu lu ga ai. Madu Karai Kasang gaw, Nu Maria hpe yu gawn lajang na matu hpyi shawn ai hpe yup mang hta mu mada nna, dai hpyi shawn ai lam hpe shagrit shanem ai myit hte hkap la sai. Shingrai Madu Yesu hte Nu Maria hpe yu bau makawp maga ai lam mu mada lu nga sai.

Dai hta grau ai gaw San Yawsep hpe dingman dinghpring ai wa ngu chyum laika hta ka da nga ai. Dingman dinghpring ai wa ngu ai hta, Madu Karai Kasang hpe mung, tinang hte ni htep ai ni hpe mung, manu shadan tsawra hkungga chye ai wa re. Bai masha ni yawng a sari sadang hpe hkungga chye ai wa re. San Yawsep gaw, Maria a sari sadang hpe mung hkungga ya chye ai wa re. Shingrai shi a ga hkaw mi hte Maria hpe manghkang n byin shangun mayu ai. Dai zawn sha anhte a prat hta e mung, Madu Karai a ra sharawng ai hpe chye na let, ta tut hkan galaw sa ai ni byin na matu, ni htep ai ni hpe mung hkungga la ra let, Karai Kasang jaw ya sai tinang a shaga la hkrum ai prat hpe hkap la nna, Madu Yesu hpe mungkan de jaw ai ni byin lu hkra shakut sa ga law.