Yh 6:16-21
N chye ai hpe hkrit ai kun? Nsin hpe hkrit ai kun? Kabu gara shiga hta lawm ai sape ni gaw n chye ai lam hte nsin sin ai lam lahkawng yan hpe hkrit tsang nga ma ai. Shanhte gaw panglai ntsa e nsin sin ai shara hta nga nna, hka leng ni a majaw htingnut mat wa ai majaw, shanhte hkrit tsang ai gaw jaw ai lam rai na re.
Nbung laru kaba ai panglai ntsa hta nsin chyip rai nga ai. Kabu gara shiga hta lawm ai sape ni gaw Yesu shanhte a sanghpaw li de sa wa ai hpe mu jang hkrit kajawng mat ma ai. Yesu hpe chye ai hpe myit yu nna hpa majaw hkrit tsang nga ma ai kun? Lama na, shanhte hpang de sa wa ai panglai ntsa e Yesu hpe n chye ai majaw, Yesu hpe nat ngu nna shut ai hku masat kau ai rai na re.
Ndai mungkan hta anhte sak hkrung nga ai aten hkrum katut na chyam dinglik lam ni, manghkang ni nga na re. Raitim anhte a chyam dinglik lam, manghkang ni hte hkrit tsang ai lam ni a lapran hta mung anhte a prat hta Yesu tut nawng nga nga na hpe galoi mung kam sham nga ga ai. Anhte hkrum sha nga ai (sh) hkrum sha na chyam dinglik lam ni hte manghkang ni a hka leng ni hpe n yu ai sha, Shi gaw anhte hte rau galoi mung nga nga ai hpe kam sham myit hte yu ra ga ai.
Anhte galaw ra ai gaw Shi hpe shaga la ai shaloi she anhte mai tsai wa na re. Anhte n chye ai hpe hkrit tsang n ra sai hte nsin hpe pyi n hkrit ra sai. Prat a chyam dinglik lam law law, nsin sin ai hte hkrit tsang ai lam ni hpe lai di lu ai shaloi, anhte hpe karum na matu hte hkye la na matu galoi mung jin jin rai nga ai Yesu anhte hta nga ai ngu ai asan sha kam sham na matu re.
