Daini na Ja Chyum Mungga hpe hti sumru yu ai shaloi e, Maria Madalena kaw Yesu dan pru ai lam hpe na lu ga ai. Dai ni Paskaladaw a bat lahkawng ya shani hta Maria Madalena gaw lup wa hta Madu Yesu a moi mang hpe n mu mat ai majaw, myit n pyaw garen nga ai ten hta, Madu Yesu hkum nan hpe mu ai raitim, shi n matsing mat nga ai. Shingrai Maria ngu Madu Yesu a shaga ai nsen na ai shaloi e shi Madu re ai hpe chye nna, Madu e ngu bai htan dat nu ai. Dai shaloi jang shi a myit ru lam ni hkoi mat nna, kabu pyaw mat lu ai. Dai zawn sha anhte ni a prat hta e mung Madu Yesu hpe hkrang nsam ladat hkum sumhpa hte mu chye lu ga ai.

 Raitim mung anhte a salum hta n ju n dawng ai, namak lawhpa ai, myit marin ai, dai zawn n yawt ai myit masin sha hpring taw nga ai  rai yang gaw, Karai Kasang hpe mu chye hkrum katut hkam sha lu na re. Dai ni na chyum mungga daw (1) hta, kasa Petru a shawng ningnan na hkaw tsun ai kabu gara shiga a majaw, masha dingsa, prat ding sa hku nna n nga ai sha, myit malai lu nna, myit masin ningnan hte kam sham ai masha ni byin tai wa ai. Ndai myit malai lu ai ngu ai gaw, Mara lu ai ngu yin la hte Sorry ngu tsun lu ai sha n rai, tinang jashut galaw hkrup ai hpe dawm kau nna, dai madang kaw na galai shai mat ai hpe tsun ai rai nga ai. Dai zawn galai shai mat lu ai ni chyu sha, Madu Karai Kasang a bai hkrung rawt ai shaloi kabu gara lu ai sak se ni tai nga na re.