Daini na Ja Chyum Mungga hpe hti sum ru yu ai shaloi e, Tiberia nawng makau e sape ni hpe Yesu shadan dan ai lam na chye lu ga ai. Shana tup shakut timung Nga langai mi pyin lu ai Kasa ni, Madu Karai Kasang a ga madat ai hte langta Nga Unawng uwa lu rim la ma ai. Madu Karai a shirin shaga ai ga hpe madat nna, shi Madu garum ya ai hte lam shagu hta mai kaja ai lam lu la nga ai. Yak hkak nga ai raitim, dai mayak hpe hparan lu na n’gun atsam lu nga ai. Dai majaw Madat mara ai lam a ahkyak ai lam hpe lu sharin la nga ai. Dai gaw makam masham hte madat mara ra ga ai re.

Nga hkwi ai lam hta grai kung kyang ai kasa ni, Madu Yesu tsun ai Hkali a hkra maga de sumgawng jahkrat dat ai. Hpa lachyum nga na gaw n rai nga ai. Raitim Karai Kasang a ladat lam ni gaw, anhte shinggyim masha ni hte hpa mung n bung lu nga ai. Dai majaw, Madu Karai lam madun ai shaloi, anhte n chye madat ai raitim anhte hkan sa ra na gaw, anhte a lit nan re. Kalang lang Karai Kasang gaw, anhte a matu lachyum n nga ai zawn re ai lam ni hpe galaw na gyin lajang ya chye ai. Nga hkwi kung kyang ai kasa ni hpe shangun ai zawn, anhte mung hkrum katut chye ga ai. Jahtum chyalai Karai Kasang hpe myit masin mahkra hte kam sham u. Tinang a nyan atsam marai hpe hkum kam hpa. Anhte sa ai shara shagu de, Madu Karai hpe myit dum nga. Shaloi jang na a hkrun lam mai kaja ai hku shading ya na ra ai.