Chyoi Pra Ai Kru Ya hpe Easter Vigil ngu nna mung shamying ga ai.

Yesu Hkristu si ai kaw na hkrung rawt wa ai gaw kaba dik ai mabyin rai nga ai. Si hkrung si htan a ntsa padang dip ai lam nan rai nga ai.

Bai hkrung rawt ai marang e, Yesu gaw hkrung ai hte si ai ni yawng a Madu re ai hpe madi madun nga ai. Shi gaw anhte hpe shalawt na hte shamai shatsai na daru magam atsam lu nga ai.

Daina de na Nawku Daw Jau Lamang hta;

Daw 1. Wan hpe shaman ai.

• (a) Paska Hpayawngdeng Kaba Shaman ai.

• (b) Paska Hpayawngdeng Kaba hpe Nawku Jawng nhku de hpai shang wa ai.

Daw 2. Paska Padang Mahkawn (Exultet)

• Paska Padang Mahkawn hpe Nawku Jawng kata de du nna shara la ngut ai hpang Jau mahkawn ai.

Daw 3. Chyum Mungga Hti Ai

Daw 4. Kashin Kamun Hkahtung Shaman ai, Shing n rai Shani Shagu Lang ai shaman ntsin hpe shaman ai.

Daw 5. Kashin Kamun Ga Shaka bai tawn da ai.

(Hpung masha shawa hpe shaman ntsin lapri bun ya ai.)

Daw 6. Muk hte tsabyi chyaru ap ya ai hpang, Missa Hkungga matut nawng ya ai.

Saradaw a Mungga:

Karai Kasang a chyeju, Paska awng padang chyeju nanhte hkum ding dek shagu hkam la lu u ga.

Daini anhte nanhte hpa baw hpe  hkrit  nga ai rai ta? Ruyak na hkrit ai, yawn hkyen na hkrit ai, jam jau na hkrit ai, matsan na hkrit ai, machyi na hkrit ai, nang hkrit ai lam ni yawng hta Madu Yesu nga taw ai hpe dum u.

Anhte shinggyim masha ni a matu, anhte a yubak mara a matu Wudang hta jen noi si hkam nna, masum ya lup makoi da hkrum nna daini bai hkrung rawt sai hkye hkrang la ai Madu Yesu gaw  hkrit hpa, tsang hpa lam  shara shagu hta nga ai hpe madun ai.

Daini Madu Yesu si ai kaw na bai hkrung rawt sai. Madu Yesu gaw awng padang lu sai majaw dai Madu hte anhte mung hkrung rawt sai kabu gara ga, awng padang hpe anhte hkam la ga. Karai Kasang hpe chyeju dum shakawn ga.

Bai hkrung rawt sai Madu Yesu anhte hpe jaw ya na chyeju ni hpe daini anhte gun la let  asak, prat ningnan hta hkawm sa ga. Karai Kasang a chyeju, Paska awng padang chyeju nanhte hkum ding dek shagu hkam la lu u ga.