Kasa 2:14,22-33
1 Pet 1:17-21
Lk 24:13-35
Ndai Easter a masum ya ngu na Laban shani hta, Karai Kasang anhte hpe tsawra ai tsawra myit hpe matut nna manu shadan nga ga ai. Daini, Nawku hpung gaw anhte hpe matut nna kabu gara nga na matu matsun da nga ai. Ndai lam gaw, Hkristu gaw shi a manu dan ai asai hte anhte hpe hkye hkrang la ai sha n rai nga ai. Bai nna, chyum laika, Chyoi Pra ai Missa hkungga a madung rai nga ai chyoi pra hkum hpe shabyin ai, hkam la ai daw (Eucharist) hta mung anhte hte rau matut nna nga nga ai.
Daini na daw lahkawng hpe myit sumru nga ai shaloi, lai wa sai shaning masum ning daram hta gawng malai jahpu jaw ai lam hpe tsun dan ai mabyin hpe bai myit dum wa ai. Ndai mabyin hta, Saradaw ginwang langai mi hta, manu n yawm ai sha, lawan ai hku gumhpraw lu na matu loi dik ai ladat re ngu sawn la ai, n hkru n kaja ai masha nkau mi gaw, Jau langai hpe rim woi mat wa ai lam tsun da ai. Dai hpang shanhte gaw rim hkrum ai Jau a Saradaw hpe matut mahkai nna, shi a Jau langai mi hpe shanhte rim tawn da ai lam tsun dan ma ai. Shanhte gaw jau hpe n dat dat shi yang, gawng malai jahpu hku nna gumhpraw law law hpe hpyi shawn ma ai. Shanhte a hpyi shawn ai lam hpe aten dep n lu galaw yang, Jau hpe sat kau na re nga nna matut tsun ma ai. Dai hpe htai ai shaloi, Saradaw gaw shanhte hpe ndai hku sumnung shingdi ai hku tsun ai: “Nye a tsawra ai kasha ni e, nanhte rim tawn da ai dai wa gaw Karai Kasang a Jau rai nga ai, shi hpe atsawm sha bau maka ai majaw ngai chyeju dum ai. Gawng malai jahpu hte seng nna gaw, shi a gawng malai jahpu hpe Yesu Hkristu jaw ngut sai re majaw, shi a matu kaga gawng malai jahpu hpe ngai n lu jaw sai.” Saradaw n hkan sa yang, Jau hpe sat kau na ngu ai jahkrit shama ai lam hpe saradaw gaw hpang jahtum ndai hku bai tsun ai: “Nye a tsawra ai kasha ni e, dai Jau gaw, shi hpe aya dang ai aten hta, Hkristu hte rau si mat sai. Dai majaw, shi hkrung nga ai rai tim, si mat ai rai tim, shi gaw Hkristu the seng sai rai nga ai. Chyeju hte shi hpe atsawm sha yu lajang ya rit.” Nhtoi loi mi na ai hpang, Jau gaw mau hpa zawn lawt wa lu ai. Teng sha nga yang, Saradaw sum mat ai rai yang, shi a Saradaw ginwang gaw bankrupt byin mat na madang rai nga ai. Kaja wa nga yang, dai ni anhte hkrung nga ai asak hkrung lam gaw, shi a si hkam ai hte bai hkrung rawt ai hku nna anhte hpe hkye hkrang la sai Hkristu a asak hkrung lam rai nga ai. Dai majaw, anhte a Hkrung rawt sai Madu Yesu Hkristu a manu dan ai asai hte maren (sh) grau kaja ai gawng malai jahpu n lu jaw ga ai.
Ndai Laban shani na daw 1 hta, “Pentecostal Experience” ngut ai hpang, Petru gaw hkrung rawt nna hpung shingkang lu la sai Hkristu a lam, shi a hkrung rawt ai atsam, Hkristan ni hpe si hkrung si htan mungdan kaw nna asak hkrung ai mungdan de galai shai wa ai atsam hpe matut nna sakse hkam nga ai. Shi gaw, Hkristu hpe si hkrung si htan a atsam hta bawng dung nga na matu n mai byin ai zawn shi a manu dan ai asai hte hkye hkrang la (anhte) ni mung hkrit tsang ai hte si hkrung si htan a atsam ni hta bawng dung nga na matu n mai byin ai ngu tsun shadut da ai. Dai majaw, ndai lam gaw kabu gara lam hpe shabyin ya nga ai, hpa majaw nga yang, Shakawn Kungdawn Sara Dawi gaw, Hkristu a Paschal Mystery hku nna anhte a matu mari la ai ndai asak nnan hte seng nna, shawng de myihtoi ga tsun da sai: “Nang gaw ngai hpe asak lam madun dan nit dai, nang zawn kabu gara ai hte ngai hpe jahpring ya na rin dai.” Rai sa, ya gaw anhte hpe hkye hkrang la ai Hkrung rawt sai Hkristu a man hta anhte nga nga ga ai. Ndai lam a majaw, tsawra aihpunau ni e, hkrit tsang ra ai lam n nga sai, hpa majaw nga yang: “Tsaw Htum ai wa a man/shingbyi shara hta nga ai ni gaw, Chyahtum Chyalai N-gun Rawng ai wa a shingnip kata e ban sa nga na mara ai” (Shk. 91:1). Anhte hpe zingri zingrat ai ni hte dip gamyet sha ai ni – matsan mayan, machyi makaw, hkam sha lam, yak hkak ai lam, , hkrit tsang ai lam, yubak mara ni hte si hkrung si htan ni pyi anhte a ntsa e atsam hte uphkang lu na n rai sai .
Daw Lahkawng hta, Hkristu a manu dan ai asai hte si hkrung si htan hpe dang kau lu ai majaw byin wa lu ai anhte a prat masa nnan de nga pra na matu Petru shaga nga ai. In order words, Karai Kasang hpe teng sha anhte a kawa hku nna lu la ai rai yang, mara n kap ai prat, chyoi pra ai prat hpe shakut ra ai, hpa majaw nga yang: “Madu a mying ningsang hpe shaga ai ni gaw, n hkru n kaja ai lam kaw na pru mat wa ra ai,” ngu ai asak hkrung lam gaw, hkrung rawt wa sai Madu hpe sakse hkam ai lam hte teng sha, kaja ai magam bungli ni hpe galaw ai lam, Chyoi Pra ai Wenyi hta anhte a atsam hpe madun dan ai lam hte galoi mung masat da ai asak hkrung lam rai nga ai. anhte gaw Hkristu hta, Hkristu hte rau teng sha hkrung nga ai hpe madun dan nga ai. Hpa majaw nga yang, ya anhte Hkristu hta asak hkrung nga ai asak nnan gaw, Sagu Kasha a manu dan ai asai a marang e byin wa lu ai majaw rai nga ai.
Daini na kabu gara shiga gaw anhte a Hkristan prat hte nawku daw jau ai lam hta grai ahkyak ai hpe myit maju jung shangun nga ai – Missa hkungga (Mungga daw hte Hkristu a Hkum hte Sai hpe hkam la ai daw). Ndai Ema-u mare de saw a lam hta sape ni hte rau Hkristu galaw ai lam ni hpe hkan sa na matu ahkyak nga ai, hpa majaw nga yang, Missa hkungga a madung daw ni hpe asan sha madun dan nga ai. Shawng nnan, Hkristu gaw shanhte a myit masin hpe chyum laika (liturgy of the Word) hte htoi tu shangun ai: “Dai hpang Mawshe kaw nna hpang nna, myihtoi ni hku nna, shi gaw shanhte hpe chyum laika hta lawm ai daw ni hpe sang lang dan mu ai.” Ndai lam byin ngut ai hpang, Hkristu gaw shanhte hte rau shi a hkum hte asai (Eucharist) nawku daw jau ai lam hpe galaw na matu lahkam mi sit sa wa ai: “Shanhte hte rau sha ku kaw naw dung nga yang, muk hpe shi la nna shaman ya nhtawm, dai hpe ahkyep alep nna shanhte hpe ap ya wu ai.” Bai nna, grai ahkyak ai lam langai byin wa ai! Hpa rai ta? “…Shanhte a myi hpaw wa nna, shi hpe chye mat ma ai…” Ndai lam gaw, “Ngai hpe myit dum na matu ndai hku galaw mu” ngu ai Hkristu a hkang da ai ga a ahkyak ai lam hpe asan sha madi madun dan nga ai.
Hkristu shi nan shanhte a prat nnan hpe ka-up da nna, chyam dinglik nga ai hpe chye na ya ai, dai hpe ndai ahkyak ai nawku daw jau ai lam lahkawng hpe galaw na ahkyak nga ai. Kaja wa nga yang, shi a manu dan ai asai, shi a Paschal Mystery ting hku nna anhte hpe hkye hkrang la nna asak nnan jaw ya sai. Raitim, mungkan hta manu dan dik htum ai hte mari la ai ndai asak hkrung lam nnan hpe n-gun jaw, bau maka lu na matu, shi hkum nan ndai ahkyak ai Chyoi Pra ai Missa hkungga (Mungga hte Ukaristi) a lusha shadu ladat lahkawng hta anhte hpe tawn da ya sai. Dai majaw, “Liturgy gaw Asak re!” Lachyum gaw, Hkristu shi nan galaw ai ndai nawku daw jau ai lam ni hpe malap kau yang shi hta anhte a prat nnan hpe malap kau ga ai. Hkristu gaw dai ni, ndai nawku daw jau ai lam ni hpe ging dan ai hku galaw shagu, shi anhte hte rau galoi mung nga nga ai hpe chye na na matu anhte a myi hpe hpaw ya ai hpe shadum ya na matu rai nga ai. Bai nna, chyum laika hta lawm ai ga si ni hte shi hpe myit dum let muk ahkyep ai hku nna, anhte a prat hpe n-gun ja shangun nna, shani shagu nnan shatai ya nga ai hpe shadum ya nga ai. Dai majaw, Missa hkungga sa du ai shaloi, anhte a prat hta Hkristu hpe nnan chye na hkam la ai majaw, asak nnan nnan lu la ga ai. Ndai lam gaw, anhte a prat hpe nnan bai gram lajang na matu, manu n daw dan lu ai manu dan ai gawng malai jahpu hku nna, Misa hkungga hta Hkristu shi hkum nan hpe jaw ya ai majaw rai nga ai. Dai majaw anhte hpe hkye hkrang la nna, shi a Mungga, Hkum hte Sai hku nna matut nna anhte hte rau nga nga ai Hkrung rawt sai Hkristu hpe anhte a myi hpaw ya nna, “asak lam hpe madun dan ya” na matu hpyi nga ga.
