Wa Sarabyin Leo XIV gaw, Laban shani, San Petru square hta, nawku bu hkawm sa ai masha 20,000 daram hpe ga shaga ai shaloi, mungkan ting na mungdan law law hta, dai ni Madu Sumsing lamu de lung wa ai poi hpe galaw nga ai hpe mu mada lu ai.
Ndai poi kaba hpe myit sumru let, Wa Sarabyin tsun ai hta, Yesu hpe ga ntsa kaw nna sharawt la nna sumsing lamu de lung wa ai gaw, ndai Mau hpa hungshingkang lam gaw anhte the tsan shangun ai zawn rai tim, tengman ai lam gaw grai ahkyak nga ai, hpa majaw nga yang, “anhte gaw Yesu hte rau hkum hkrang langai a daw shan ni hku nna kahkyin gumdin nga ga ai” Madu gaw shi hpe Kawa hte rau “hkum tsup ai kanawn mazum lam de woi sa wa ai.”
Lung wa ai lam a shamu shamawt lam
Wa Sarabyin tsun sang lang dan ai hta, Hkristu a prat tup gaw shinggyim nga pra masa hku nna Madu gaw “mungkan ting hpe hkap tau la nna, shinggyim masha ni hpe shanhte a yubak mara kaw na sharawt la nna hkye hkrang la ai” ngu ai hpe sang lang dan ai.
Paska ladaw I hta tsun da ai hte maren, Madu gaw ” shawng de nsin sin ai, n tara ai hte myit daw myit hten ai shara ni hta nhtoi hpe jahtoi ya ai, mara raw ya ai lam hte myit mada shara ni hpe la sa ya ai, Karai Kasang a Kasha gaw, si hkam ai nna, ‘anhte a si hkrung si htan hpe bai jahten kau ya sai, shi a bai hkrungrawt ai lam hta anhte mung shanglawm lu saga ai.
Sumsing hpung shingkang de woi sa ai
Wa Sarabyin tsun ai hta, Sumsing lamu de lung wa ai lam gaw anhte hpe “hpring tsup ai matut mahkai lam” a lam tsun dan ai rai nna, dai gaw anhte hpe mung “sumsing lamu na hpung shingkang de woi sa wa ai, ndai prat hta anhte a shingran hpe sharawt ya nna jat wa shangun ai hte anhte a myit sawn sumru ai lam, hkam sha ai lam, galaw sa wa ai lam ni hpe Karai Kasang a myit masa shadawn shadang hte grau ni htep hkra lam madun ya nga ai.” Ndai lung wa ai lam hta, Shi a prat, kasi ningli, sharin achyin ai lam ni hpe anhte chye na la lu ga ai.
Wa Sarabyin tsun ai hta, ndai sumsing lamu de lung wa ai lam hpe, Chyoi Pra ai Nu Maria a prat hte chyoi pra ai ni a prat hta mu lu ai, “Nawku hpung hpe mungkan ting hpe kasi ningli hku nna jaw ya ai hpe mu lu ai.”
Wa Sarabyin Francis gaw, ndai kasi hpe anhte a hpunau nauna ni, ‘makau grup yin na chyoi pra ai ni’, “kawa ni, kanu ni, kaji kawa ni, asak aprat hte masa lam shagu na masha ni, kabu gara ai hte ap nawng ai myit hte, Kabu Gara Shiga hte maren, myit masin masin hte sak hkrung hkawm sa na matu shakut shaja ai ni hta mu lu ai” nga nna ayan tsun ai hpe bai shadum ya ai.
Kahkyin gumdin lam hte simsa lam a asi ni
Shada da madi shadaw akyu hpyi ai hte, “anhte mung shani shagu sumsing lamu de lung wa na matu sharin la lu na re” nga nna, San Pawlu tsun ai hte maren, tengman ai, tara rap ra ai, tsawra myit rawng ai lam hpa hpe raitim myit maju jung na matu, Wa Sarabyin tsun shadut dat nga ai.
Kashin Kamun hta hkam la lu ai Karai Kasang a asak gaw, “anhte hpe tsaw dik ai shara de, Kawa hpang de tut nawng woi sa wa ai, anhte a kata hte grup yin hta rawt jat galu kaba wa lu ai, mungkan hta kanawn mazum lam hte simsa lam a manu dan ai asi ni hpe shabra ya lu ai” nga nna tsun ai.