Readings: 1st: 12, 13. 16-19; Ps 85, 5-6. 9-10.15-16; 2nd: Rom 8, 26-27; Gos Mtt 13, 24-43
Anhte a tut nawng hpyi shawn ai lam, anhte a gawng kya ai hpe matsan dum lama ai hte mara raw ya ai lam ra kadawn nga ai hpe myit dum let, Chyoi Pra ai Kanu Nawku Hpung gaw ndai pranwan ladaw 16 ngu na Laban shani hta, mungkan ga anhte hpe ninghkap ai lam yawng a lapran hta myit malai lu nna sadi dung let nga nga yang, mara raw ya ai, Matsan dum chye ai hte tara rap ra ai Tara agyi Madu hpang de anhte a myit masin hpe nhtang wa shangun nga ai. Shi mung, laksan hku nna, anhte a gawng kya ai lam hpe hpyi nem ai shaloi, anhte hpe karum na matu galoi mung jin jin rai nga ai Chyoi Pra ai Wenyi hte matut mahkai na matu shaga nga ai.
Daini na daw 1 hta, Hpaji byeng-ya gaw Karai Kasang hpe tara rap ra ai tara agyi, lanu lahku chye ai Kawa re ai majaw shakawn shagrau ai: “Nang gaw galoi mung n tara ai hku tara jeyang ai n rai, na a tara rap ra ai lam gaw n-gun atsam hta npawt nhpang rai nga ai.” Ndai gaw anhte a Karai Kasang rai nga ai, Shakawn Kungdawn Sara tsun ai ga hpe shadik shatup let anhte a yubak mara ni hpe yu maram nga ai tara rap ra ai tara agyi wa: “Madu e, anhte a yubak mara hpe nang masat da yang, kadai wa lawt lu na kun?” (Shk 130, 3). Dai majaw Karai Kasang gaw matsan dum lama ai kawa langai hku nna anhte hpe galoi mung n-gun jaw ai. Anhte a hkam kaja lam a matu ra kadawn ai hku myit tau ya ai. Raitim, kalang lang gaw, ari jaw ai lam lawm chye ai. Raitim, tara rap ra ai hte anhte a akyu a matu re. Anhte a lahkam ni hpe bai hkan tam nna, gram lajang na matu shara law law jaw ai.
Dai majaw, Hpaji byeng-ya gaw Shi a lam hpe ndai hku tsun ai: “…mara galaw ngut ai hpang myit malai lu na matu, na a kasha ni hpe dinghpring ai myit mada shara jaw nit dai.” Ndai lam kaw na anhte hpa hpe galaw ra ai, sharin la ra ai kun? asan sha re! Karai Kasang gaw tara rap ra ai hte anhte hpe mara raw dat ya na matu jin jin rai nga ai majaw, teng man ai hku tsun ga nga yang chyeju rai nga ai, anhte mung kaga masha ni hpe dai zawn galaw ra ai. Madu gaw anhte hpe tara jeyang ai shaloi matsan dum chye ai zawn, anhte mung hpunau nauna ni hpe dai zawn galaw ra ai: “…Ndai hku galaw nna, kaja ai masha wa gaw shi a shinggyim masha ni hpe gara hku matsan dum chye ra ai hpe na a amyu masha ni hpe sharin achyin ya sai!” maga mi hku tsun ga nga yang, anhte a kawa hku nna Karai Kasang kaw na sharin la ra ai, anhte a htingbu htingbyen ni hpe n-gun ja ai hku n tara jeyang na matu. Ndai lam gaw Karai Kasang a grai tsaw ai tara jeyang ai lam hpe kasi la na matu ra nga ai.
Daini na daw lahkawng hta, anhte a prat hta Chyoi Pra ai Wenyi a grai ahkyak ai magam bungli langai hpe Pawlu madi madun da nga ai. Ndai lam hpe si chye ai hte n-gun kya ai masha ni hku nna, prat hta anhte hkum anhte n lu karum ai aten ni teng sha nga ai hpe myit dum ai lam rai nga ai. Greek ga si πνεῦμα (Wenyi) hpe Roma 8 hta 21 lang mu lu ai, dai hta na lahkawng sha (v 15a, 16b) hta Chyoi Pra ai Wenyi hpe n tsun ai re. Hkristan makam masham kata hte Hkristan ni a matu Chyoi Pra ai Wenyi a magam bungli gaw ndai shalan shabran dik ai daw hta madung shara la nga ai. Chyoi Pra ai Wenyi gaw anhte a gawng kya ai lam hta du sa nna karum la nga ai. Anhte a ndai gawng kya ai lam hpe lam amyu myu hku nna shadan dan ai raitim, law malawng gaw, akyu hpyi ai aten hte akyu hpyi ai hta shadan dan nga ai. Ndai shara hta anhte Karai Kasang a kashu kasha ni re ai hpe sakse hkam ai hta n-ga, Chyoi Pra ai Wenyi mung anhte hpe karum na matu shang wa ai (Rom 8, 14-15). Maga mi hku tsun ga nga yang, Karai Kasang a Wenyi gaw anhte hpe n-gun jaw, atsam jaw ya nna, teng sha nga yang, Karai Kasang a man e anhte a matu tsun shaga ya nga ai. Hpa majaw nga yang, anhte gaw gawng kya ai hte “akyu hpyi na hpe n chye ai”, shi chyu sha anhte hkrat sum ai shara shagu hta awng dang lu ai, hpa majaw nga yang, Shi chyu sha Karai Kasang chye na ai ga hpe tsun shaga ai: “…Wenyi shi nan anhte a hpyi nem ai lam hpe ga the galoi mung n tsun shapraw ai sha tsun shapraw dan ai…Karai Kasang gaw Shi ngai hpa galaw ai hpe atsawm sha chye nga ai.” Kanu langai mi gaw shi a gawng kya ai hte karum shingtau lam ra nga ai ma a hkrap ngu hkrap ngoi ai lachyum hpe chye na nna, dai hpe jaw ya ai zawn, Karai Kasang mung anhte a malai Chyoi Pra ai Wenyi a ga hpe chye na ya nga ai.
Kabu gara shiga hta Yesu gaw “Karai Kasang a mungdan” gaw gara hku re ai hpe sha n-ga, Karai Kasang a tara jeyang ai lam kade daram myit hpaw nna tara rap ra ai hpe, ga sadi jaw da ai hpe mung, ga shadawn masum lang nna tsun dan ai. Ndai ga shadawn masum gaw Karai Kasang a mungdan hpe kade daram hkap tau hkalum la ai hte hkap hkalum la ai lam hpe madi madun nga ai. Raitim, nli tum ga shadawn gaw, ga shadawn masum yawng hta na, langai sha hta Karai Kasang a shingra tara, Shi a Mungdan hte, Shi a tara rap ra ai tara jeyang ai lam a lam yawng hpe tsun da nga ai. Karai Kasang, “madu” ngu ai sun, hte nli tum hpe mung, tsing hpun hpe aten garai n du yang baw kau na ngu ai myit masa hpe n rawng ai. Dai tsing hpun hpe mam hpun a makau the rau tu kaba wa na aten jaw ai.
San Pra ai Augustine of Hippo shi a laika buk Civitate Dei hta ka da ai gaw, chyoi pra ai ni mung, mara kap ai ni mung lawm ai mungkan hta anhte nga nga ga ai, shan lahkawng rau nga nga ma ai. Anhte a arawn alai a n-gun atsam hte Chyoi Pra ai Wenyi a karum shingtau lam hpe kahkyin gumdin ai gaw, chyoi pra ai ni hpe mara kap ai ni hte garan ginhka ya na re. Karai Kasang gaw aten garai n du shi yang ndai lam hpe chye da ai raitim anhte a matu garan ginhka ai mungkan lahkawng hpe n hpan da ai. De a malai, anhte yawng hpe rau nga na matu ahkang jaw ai. Langai hte langai gaw kaga langai hpe tinang a daw hpe galaw ai. Chyoi pra ai ni gaw, mara kap ai ni a tsin-yam tsindam hpe mu nna, shanhte a sharin achyin lam ni hpe sharin la nna, kaja ai lam hta naw nga lu na matu matut nna shakut shaja nga ma ai. mara kap ai ni gaw chyoi pra ai ni a awng padang hpe mu nna, shanhte a tsin-yam tsindam hte yubak mara kaw na lawt lu na matu maren sha shakut nga ma ai. Dai majaw, mam hpun hte tsing hpun ga shadawn gaw, tara rap ra ai hte matsan dum chye ai tara agyi Karai Kasang shi nan shi hpan da ai ni yawng hpe gara hku matsan dum myit hte galaw ai lam hpe madun dan nga ai. “Shi a tara dara ai lam gaw teng man ai hte tara rap ra ai rai nna, hkyehkrang la ai lam gaw shi a matu rai nga ai,” ngu nna, “kaja ai ni hte n kaja ai ni a ntsa e shi a jan hpe htoi tu shangun nna, shi a marang hpe htu shangun nga ai.” Ndai tara rap ra ai tara agyi wa gaw shi a dan hkung ai nhtoi kaba hta anhte langai hte langai hpe hpa galaw na hpe chye nga ai.
Ndai “hkrit tsang hpa” hte “mau hpa” rau nga pra ai lam hpe ahkang jaw ai hta, Karai Kasang gaw anhte hpe myit malai lu na matu, dan la na shani kaba a matu hkyen lajang na matu ahkaw ahkang law law jaw ya nga ai. Gardner langai mi hku nna, shi gaw gara gaw mam hpun rai nna, gara gaw, tsing hpun re ai hpe chye ai. Shi gaw dai hpaga lam hta mahkrum madup nga ai wa rai nna, hkai lu hkai sha na matu shi matu kungkyang ai majaw, dai ni hpe garan ginhka lu na matu “power myiset” n ra ai. Dai majaw, tsing hpun ni kaw na lawt lu hkra karum ya ai Gardner a hpaji byeng-ya ra ai zawn, ndai mara hte gawng kya ai mungkan hta anhte hpe lawt lu hkra karum ya lu ai lam ni gaw: Anhte a arawn alai a n-gun atsam, anhte a manang ni hte matut manoi kanawn mazum ai lam, anhte a n-gun atsam hte matut manoi kanawn mazum ai lam ni lawm nga ai. ga hte n tsun shapraw lu ai hkrapngu hkrapngoi ai hte anhte a matu hpyi nem na matu galoi mung jin jin rai nga ai Chyoi Pra ai Wenyi, Kawa Karai Kasang – tara rap ra ai hte matsan dum chye ai tara agyi wa hte shi a hpung hta lawm ai ni sha chye na la lu ai. Shakawn kungdawn sara wa tsun ai ga hpe bai kahtap tsun ga: “Madu e, nang gaw kaja ai hte mara raw ya chye n dai!”