Dai ni Yesu anhte hpe tsun nga ai gaw: “Anhte a matu n mai byin ai lam hpa mung n nga ai (Mahte 17:20).” Anhte a myit ung ang ai lam law law a lapran hta Yesu gaw anhte a matu n mai byin ai lam hpa mung n nga ai, hpa majaw nga yang Shi hpe kam sham ai ni a matu yawng mayawng byin mai ai ngu ai hpe anhte hpe shinglet hte tsun nga ai.

Makam masham gaw anhte yawng grai shakut shaja ra ai lam langai mi re, anhte yawng kam sham lu na kun? Makam masham gaw lata la hkrum ai masha nkau mi a matu sha rai a ni? Yesu gaw anhte kashin kamun hkam ai shaloi makam masham jaw da sai rai nna, anhte galu kaba wa ai hte maren Shi jaw ai makam masham mung galu kaba wa na hpe myit mada nga ai.

Raitim anhte law malawng hta n byin wa ai, hpa majaw nga yang anhte kaba wa ai hte maren anhte a makam masham hpe tawn kau da ai, malap kau ai madang rai mat ai. Ndai tawn kau da ai makam masham a matu kadai hpe mara shagun na kun? Anhte a kanu kawa ni kun? Nawku hpung masha ni kun? Raitim yawng gaw n sum mat shi ai, hpa majaw nga yang, ndai tawn kau da ai makam masham hpe anhte hta shaga la na ahkaw ahkang naw nga ai.

Anhte galaw ra ai gaw, anhte kashin kamun hkam ai shaloi, Shi anhte hpe grai tsawra myit hte jaw ya ai makam masham kumhpa hpe kalang bai jaw ya na matu Yesu kaw hpyi nem ra ai. Anhte n malap na matu, ndai mungkan hta masha langai a hkrun lam hta makam masham gaw ahkyak nga ai. Dai n lawm yang anhte gaw lam madun ai hte yaw shada ai lam n nga ai sha hkawm sa nga ai zombie ni zawn sha rai nga ai.

Akyu hpyi ga:

Oh Tsawra ai Yesu anhte a yup pyaw nga ai makam masham hpe jahkrung sharawt ya na matu shagrit shanem let akyu hpyi nem ga ai. Hpa majaw nga yang, makam masham n lawm yang anhte gaw, lam madun ai lam n nga ai sha, yaw shada lam n nga ai sha, hkawm sa nga ai zombie ni zawn rai nga ga ai. Myit mada shara nga na matu makam masham hpe jaw ya rit, yaw shada lam nga na matu makam masham jaw ya rit bai nna ndai mungkan hta anhte hkrum katut wa ai manghkang ni hpe hkam sharang lu na matu makam masham jaw ya rit. Amen.