Myit N’gun Atsam Hte Hparan Ai Lam

Anhte masha shagu ngu na daram hta, mayak lam ni hpe hparan lu na matu, ra kadawn wa sai nga yang shawng ningnan hparan ra na gaw, myit n’gun atsam nan rai nga ai, dai myit n’gun  atsam gaw, nmu lu ai sha, hparan lu ai lam gaw, kraw kata na byin pru wa ai n’gun langai a atsam marai a majaw re ngu shawng tsun dan mayu ai. Dai myit n’gun ni gaw, dai zawn atsam rawng nga ga tim,masha shagu hta gaw, myit n’gun atsam hpring hpring nnga nga ga ai, rai yang, myit n’gun ni gaw gara kaw na sa wa ai, myit n’gun lu na matu, hpa ni galaw ra na, myit n’gun gaw kaja wa lu galaw lu ai atsam ni nga nga na kun?

Myit n’gun atsam ngu ai gaw, kaja wa nga yang, ngang grin ai masat shagrin da ai lam langai rai nga ai, dai zawn jahkrat ngut sai nga yang, byin hkra galaw na ngu ai myit langai nan rai nga ai, myit n’gun atsam ngu ai gaw kraw kata hta byin pru nga taw chyalu rai nga ai, raitimung dai myit n’gun atsam ni hpe, nshaw la chye yang gaw, galoi ma praw pru byin tai wa lu na gaw nrai nga ai. Laga lam yan langai gaw myit n’gun byin chye ai makau grupyin hta nga ai masha ni a shadut jasu ya ai lam ni a majaw lu la ai myit n’gun atsam rai nga ai,bai langai gaw, myit n’gun ban ya lu na laika ni hti nna, myit n’gun ni jahpring la lu mai nga ai, tinang maga dai zawn myit n’gun atsam ni hpring wa nga sai nga yang, mayak mang hkang lam ni hpe hparan lu nga sana mung rai nga ai

Ndai hta masha langai hte langai a hparan ai ladat hkrang ni gaw n bung lu nga ai zawn, myit n’gun byin wa ai masa lam mung nbung lu nga ai. Mang hkang mayak lam gaw, kaba nga yang, hparan na ra wa nga ai myit n;gun ni mung hpring hpring nga taw ra na ra nga ga ai. Dai ra kadawn ai myit n’gun ni mung mayak lam ni hpe galoi ngu na daram hparan taw nga yang, htum mat wa dat, bai ban la dat rai galaw nga yang she kaja nga na mung rai nga ai. Myit n’gun gaw masha shagu a matu nnga yang nmai ai lam ngu na mung mai tsun nga ai, sak prat hkrun lam ting prinem ai shani hkrai hte sak hkrung tawt lai lu nga ai ngu ten tup nlu nga ai zawn, mang hkang mayak ni hte nhkrum ai ngu ai masha mung nnga nga ai dai majaw hkrum wa na mayak lam ni hpe ganing re ai myit n’gun atsam ni hte kade ram du hkra pri nem hkra hparan lu na ngu ai lam ni hpe sha myit sawn ra na ra nga ga ai

Kaja sha tsun ga nga yang, Mayak mang hkang shagu a jahtum hta mahtai nga ai zawn tinang a matu ra kadawn ai myit n;gun atsam ni gara kaw na lu la mai ai  ngu ai hpe chye na ra nga ai ngu tsun shadum mayu ai re. Sak prat ting hkrum kadup wan a mayak lam ni gaw galaoi mung ngut mat na nrai nga ai zawn, dai mayak lam ni hpe hparan lu na matu ya sha tsun ai myit n’gun atsam ni mung aten tup hpring nga taw na ra kadawn nga ga ai, dai rai yang sha mang hkang mayak lam ni hpe yak hkak lam nnga hparan wa lu na ready rai na re ngu tsun n’gun jaw mayu ai.bai kahtap nna tsun mayu ai gaw, anhte ramma ni hta, shawng kaw galaw sa mat wa sai magam lam ni a mahtai ni hpe bai sawn dinglik yu chye ai akyang mung nga rag a ai dai zawn nchye galaw yang tinang hkum nan gara shara mabyin masa hta du taw nga ai ngu ai hpe chye lu na nloi nga na re, ramma ni hku nna galaw mayu ai myit a woi awn sa ai lam a hpang sha galaw sa nga  nna, mahtai hpe nchye taw nga yang tinang galaw nga ai magam bungli a madang hpe tak sawn lu na matu mung yak nga na re.

Sak prat ting hta yaw shada lam nna sha galaw sa taw nga ai ngu ai lam hta hkawm sa nga ai lam anhte ramma ni hta nga nga na sha re, kalang hte sha galaw sa nna awng dang mat wa ai ramma ni nga  nga tim dai lam gaw nau nlaw nga ai, dai zawn ramma ni a galaw shakut mayu ai myit gaw n shayawm ai atsam marai ni hte shakut nga taw yang sha awng dang ai asi apu ni hpe hkam sha lu na rai nga ai. Ramma ladaw ten gaw kadun la nga ai zawn, shinggyim sak prat ting a aten  ladaw mung kadun la nga ai, ramma ten hta  mai byin ai hku sha hkawm s alai wa nna, htawm hpang a matu  mahkyen ni nnga tawn da yang ngam nga ai sak prat ting hta mung ra kadawn nhpring tsup lam ni hte hpring chyat nga taw na sha rai nga ai.dai majaw tinang galaw ai lam yan ni hpe yaw shada lam nga tawn da na ra nga ai zawn, dai mahtai ni hpe mung ten shagu sawn dinglik yu ra na rai nga ai dai zawn mahtai ni hpe yu nna, shanwg de bai matut hkawm sa grin ai n’gring ai lam ni hpe hkyen tawn da lu na rai nga ai. Dai hta mahtia shagu mung ten tup kaja taw na nrai ai zawn, sawng ai lam de byin wa ai ten ni hta mung gara hku ladat ni hte bai grau kaja wa hkra shakut na ngu ai masa lam ni hpe jahkrat da na ra nga ga ai.

Tinang madung tawn yaw shada da ai galaw sa ai lam ni hta,mahtai kaja ni nlu wa ai ten, tinang hta hpa ni ra kadawn shi nga ai kun ngu ai hpe sawn dinglik mahtai tam ra nga ga ai, sak prat ting a matu ,kaning re ai lam yan ni rai rai, tinang galaw lai wa ai mahtai ni hpe galoi mung sawn dinglik yu nna chye tawn da yang hpang bai galaw sa na magam lam ni hta tau hkrau tak sawn loi nga sana re ngu

#youth

#rvakachinservice