Kahtawlik Nawku Hpung, Myitkyina Saradaw Ginwang a lit hkam Wa Saradaw John Mung Ngawn La Sam gaw ( 20 September 2026 ) ya jahpawt Lawa Jau Ginwang kaw na hpyen koi yen hpung masha ni shanu shingbyi nga ai Namti St. Teresa Catholic IDPs Camp de sa du kawan nna Laban Missa Hkungga nawng jau ya ai hte nawku hpung masha ni marai ( 7 ) hpe N’gun Shaja Chyeju Kumla jaw ya sai.
Ginwang up Wa Jau Peter Lazum Naw Bawk hte hpung masha ni kaw nna mung Wa Saradaw hte Wa Jau ni hpe kabu gara hkap tau hkalum la ai.
Wa Saradaw hte rau Edin ginwang up hte St. Luke Collage lit hkam Wa Jau Bernard Dashi Tang Ji, Myitkyina Karuna ( KMSS ) Director Wa Jau Paul Tiwa Zau Sham ni mung sa du kawan Missa Hkungga nawng jau ya sai.
Wa Saradaw hpung masha ni hpe hkaw tsun ai mungga hta;
“Anhte kam sham ai madu Karai Kasang gaw anhte hpe shaman chyeju jaw n jin ai Karai Kasang rai nga ai. Anhte hpe shaman chyeju jaw na matu galoi mung ala taw nga ai. Kalang lang anhte hpe chyeju hpe e lu nga ai, lu ging ai Karai Kasang a kashu kasha ni rai nga ninglen anhte Karai Kasang myit ra ai hku asak hkrung let n hkawm sa ai aten hta shaman chyeju n lu ai.
Mani, ma ni sha Hkrsitan tai wa nna kaja ai magam bungli galaw ai ni gaw Karai Kasang a shaman chyeju hpe grau lu ma ai.
Htaw shangai ai kaw nna hkristan tai ai, Catholic tai nna shaman chyeju lu na ngu ai hkum myit, Karai Kasang myit ra ai hpe Madu Yesu a matsun maroi ga ni hpe hkan shatup yang she tai na re. Dai re majaw daini anhte dum chye da ra ai gaw anhte, nanhte Hksritan tai wa ai aten hta e, mying sha gun ai n re sha, kaja wa nan Madu Yesu ra sharawng ai Hkrsitan arawn alai hte sak hkrung hkawm sa ra ai. Daini na chyum Mungga daw 2 hta nanhte gaw Madu Yesu a mungga hte maren asak hkrung hkawm sa nga mu, nga nna shadum ya nga ai. Daini anhte, nanhte dai hku sak hkrung hkawm sa ai rai yang she Karai Kasang a shaman chyeju lu na re.
Tsawra ai nu wa hpu nau ni e, anhte lai wa sai shaning law law yubak mara hta, n kaja ai akyang lailen, arawn alai ni hte anhte nga lai wa sana re. Nang myit malai ai hte nan, daini kaw na Karai Kasang nang hpe shaman chyeju jaw na jin jin rai nga ai”
Hpyen yen dabang kaw Missa Hkungga galaw ngut ai hpang Namti Myo Oo na St. Dominic Nawku jawng wang hta shanu nga ai St. Paul Mama ni hte boarder jawngma ni hpe mung shang kawan da let jawngma ni hpe n’gun jaw ga tsun nna Wa Saradaw hte wa jau ni akyu hpyi shaman da ya ai.
St. Teresa Catholic IDPs Camp hta Lawa, Wara Zup, Lagawng, Dum Bung, Jahtu Zup, San Pya, Awng Ra, Hkumtsai Yang Mare Kahtawng ( 8 ) kaw hpyen yen htinggaw ( 480 ), hpyen yen masha hkying mi jan shanu shingbyi nga ai lam chye lu ai.
