October praw ( 4 ) ya shani gaw Myitkyina Saradaw Ginwang ting hta Chyoi Pra Ai Chyum Laika Poi Laban hpe galaw na rai nga ai.
Chyum Laika Laban hpe hkap tau, shagrau ai hku nna Myitkyina Jau Ginwang kata na Sasana Ma hpung ni gaw ( 03 October 2026 ) ya shani, St. Columban nawku jawng wang na St. Thomas Parish Hall hta Chyum Laika hti shakrai shing jawng lamang hpe Sasana ma hpung Komiti ni woi awn galaw lai wa ai.
Lamang hpe daw masum garan nna galaw ai hta Wa Sarabyin kaw nna mungkan simsa lam a matu Sasana ma ni Rosary akyu hpyi na lam matsun ai hte maren Rosary akyu hpyi ai lam hpe mung galaw ai.
Lamang daw langai hta Chyum laika hpe shagrau ai, chyum laika kaw na shaman hkam la ai.
Daw lahkawng hta Rosary akyu hpyi ai hte daw masum hta shing jawng lamang hte ka manawt ai lam ni hpe galaw la lu sai.
Shing jawng lamang galaw ai a yaw shada lam gaw;
Ma ni chyum mungga hpe tsawra nna,chyum mungga hte asak hkrung hkawm sa chye na matu, Wenyi makam masham lam hta ngang grin nna mungga lam hte asak hkrung hkawm sa chye na matu yaw shada nna galaw ai re lam Sasana ma hpung woi awn Komiti rai nga ai Sarama Rosa Magawng Chyem Hkawn tsun ai kaw na chye lu ai.
Sasana ma hpung ni a Chyum Mungga shagrau poi hta e Myitkyina Sasana Sagurem, Wa Saradaw John Mung Ngawn La Sam mung sa du n’gun jaw mungga shaga ai.
Wa Saradaw a n’gun jaw mungga;
Nanhte gaw ya ndai aten hta myit mada shara kaba nga ai aten rai nna ningbaw ningla tai na shagan ni rai nga myit dai. Ndai aten nanhte a prat hta Karai Kasang a shaman chyeju gaw hpring nga ai, ndai aten nanhte mani dat ai mani sumsai lam gaw mungkan ga a tsi, machyi ningma kap nga ai masin salum ni a tsi rai nga ai. Dai re majaw masha ni hte hkrum shaga ai aten hta mani sumsai hte tsun shaga ai gaw mungkan ga hpe tsi shamai ya ai ni tai na re.
Daini mungkan gaw machyi hkrum taw nga ai. Gasat gala majan byin ai, makau grup-yin shingra tara ni hten za taw nga ai, majan a majaw masha ni a myit masin salum hta ningma kap nga ai.
Anhte a marin law hpa myit ni a majaw makau grup-yin shingra tara ni hten za ai hte anhte shanu shingbyi nga ai mungkan ga gaw grai kahtet wa ai. Dai re majaw machyi hkrum taw nga ai mungkan ga hpe nanhte a htoi tu nga ai myit mada lam, nanhte a yaw shada lam ni hte tsi tsi shamai ya ra ai.
Nanhte a makau grup-yin hta masha n kau mi jam jau jam hkau amyu myu hkrum sha taw ai, n pyaw n ngawn, masin pawt sindawng, marin law hpa lam ni hte hpring taw ai aten hta nanhte a akyu hpyi ai hte mani sumsai rai tsun shaga ai lam ni gaw nanhte hte hkrum ai masha ni a masin salum hta simsa lam hpe jaw ya lu ai.
Ndai aten hta nanhte Karai Kasang kaw na shaman chyeju hpe hpyi la nna nanhte a myit mada lam, nanhte a yaw shada lam ni a matu kaja dik akyu hpyi shakut ra ai aten rai nga ai.
Shing jawng lamang hta
Kaba pang shing jawng kumhpa lu mat ai ni gaw
No ( 1 ) Du Kahtawng Lawk Sasana ma ni
No ( 2 ) Thida lawk Sasana ma ni
No ( 3 ) Htoi San Lawk Sasana ma ni lu mat ai rai nna,
Kaji pang hta gaw
No ( 1 ) Htoi San Lawk Sasana ma ni,
No ( 2 ) Du Kahtawng Lawk Sasana ma ni
No ( 3 ) Lekone Lawk Sasana ma ni
kumhpa lu mat ai rai nga ai.
Shing jawng lamang hta e Sasana ma ni marai ( 360 ) jan, Sara/ma ni hte kanu kawa ni yawng rai yang marai ( 400 ) jan sa du shang lawm lai wa ai.
