November 11–16, 2026

Shi sa du gawan ai lam hta, Kahtawlik makam masham hpe ngang kang hkra galaw na, simsa lam, htinglu htinglai lam, shinggyim wuhpawng tara rap ra lam, myit hkrum kahkyin gumdin lam ni hpe madung tawn nna galaw lai wa sai.

Peru mungdan gaw Wa Sarabyin Leo XIV a myit masin hta laksan shara hpe hkam la lu nga ai. Sarabyin ntai shi yang, shaning law law sasana magam gun lai wa sai rai nna, hpang e Chiclayo mare na Saradaw hku nna magam gun lai wa sai rai nga ai. Shi gaw 2015 ning hta Peru mungchying sha masat hkam lam la lai wa sai mung rai nga ai.

11 November – Lima Muk Lum: Wa Sarabyin Leo XIV gaw Peru mungdan Lima Muk lum de du nna asuya ningbaw ningla ni hte mung masa dat kasa ni hte hkrum shaga lai wa sai. Mungdan kahkyin gumdin lam, bawngban jahkrup ai lam, simsa lam, tara rap ra ai lam, shinggyim sari sadang hpe hkungga ai lam ni hpe n-gun jaw lai wa ai.

12 November: Wa Sarabyin gaw saradaw ni, Jau ni, brother, mama ni, makam masham wuhpung wuhpawng ni, kun dinghku ni, ramma ni hte hkrum shaga lai wa ai. Ramma ni hpe myit mada lam a kumla ni tai nna simsa lam hpe gaw gap ai ni tai na matu n-gun jaw lai wa ai.

13 November – Chiclayo Muk Lum: Wa Sarabyin gaw shi a moi na Sardaw ginwang de bai nhtang wa nna, Chyoi Pra ai Missa hkungga nawng ya ai, makam masham hpung masha ni hte dakkasu jawngma ni hte hkrum zup ai lam galaw lai wa ai. Sasana ap nawng ai lam, Hkristan myit hkrum kahkyin gumdin lam, matsan masha ni hpe daw jau ai lam ni hpe ahkyak shatai tsun lai wa ai.

14 November – Chiclayo hte Santa Cruz: Wa Sarabyin gaw Nu Maria hpe hkawhkam jan, janmau shagup ya ai lamang hpe woi awn nna, Chyoi Pra ai Missa hkungga hpe galaw lai wa sai rai nna, Nu Maria hpe ap nawng na, makam masham hta shakut shaja na, shingdu tawn da hkrum ai wuhpung wuhpawng ni hte rau kahkyin gumdin na matu n-gun jaw lai wa ai.

15 November – Cusco hte Pucallpa: Wa Sarabyin gaw, buga masha ni hte sasana magam gun ni hte hkrum shaga nna, Angelus akyu hpyi ai lam hpe woi awn ai, htunghking sari sadang, kabu gara shiga hkaw tsun ai lam, Amazon hpe yu lanu lahku ai lam ni hpe madi madun let, Chyoi Pra ai Missa hkungga hpe galaw lai wa ai.

16 November – Lima: Wa Sarabyin gaw asak kaba sai ni hpe sa kawan nna, hpang jahtum na Chyoi Pra ai Missa hkungga hpe galaw nhtawm, Roma de bai nhtang wa mat sai lam chye lu ai.

Tsun shaga lai wa ai Sagu rem Mungga ni

Wa Sarabyin Leo XIV gaw, shi a hkrun lam ting hta, makam masham, simsa lam, htinglu htinglai lam, kun dinghku kahkyin gumdin lam, ramma ni hpe n-gun jaw ai lam, sasana magam bungli, shinggyim wuhpawng tara rap ra ai lam, gawngkya ai ni hpe yu lanu lahku ai lam ni hpe ahkyak shatai tsun shalawm lai wa sai. Hkristan ni hpe tsawra myit, matsan dum myit, kahkyin gumdin let Kabu Gara Shiga the maren sak hkrung hkawm sa na matu n-gun jaw lai wa sai rai nga ai.

Leave a Reply

Your email address will not be published. Required fields are marked *