
Daini na Ja Chyum Mungga hpe hti sumru yu ai shaloi e, Yerihku mare na myi kyaw ai wa hpe Yesu shamai ya ai lam na la lu ga ai. David a kasha Yesu anhte hpe matsan dum la rit. Anhte a akyu hpyi nsen hpe Karai Kasang madat ya nna, anhte ra nga ai shaman chyeju lu la mayu ai rai yang, ndai ladat ni hpe chye da ra ga ai. Ndai ladat hpe Yerihku mare makau kaw na myi n mu ai wa kaw na sharin la ra nga ai. Dai gaw shi a akyu hpyi ga gaw kadun tawk re ai. Bai makam masham ngang kang marai rawng ai. Shi gaw ya sha ya sha hpyi jahtau tsun ai.
Shawa masha wunawng gaw shi hpe azim sha nga na matu, ginhtim nga ai. Shi hpe pawt tsun ai hpe hkrit tsang lam n nga ai. Shi myit mada kam hpa let marawn tsun ai akyu hpyi ga gaw, David a kasha Yesu e ngai hpe matsan dum la rit nga ai akyu hpyi ga rai nga ai. Shaloi Madu Yesu gaw shi a matu myi mu lu na matu jaw ya na hte, Shi a ntsa tsawra matsan dum lama ai lam madun dan na matu kam sham ai myit hte akyu hpyi ai. Shi hpyi ai chyeju lu la ai hpang, shi a makam masham mung awng dang wa ai. Shing rai, shi ga madat ai ni anhte yawng mung, David a kasha Yesu e ngai hpe matsan dum la rit law ngu ai ndai kyu hpyi ga hpe tsun let shi Madu kaw hpyi la ga law.
