
Si ai hpang na prat/htani htana prat gaw ndai anhte nga ai ya prat hte grai shai ai, ndai shara kaw anhte a prat gaw hpang jahtum nrai nga ai. Htani htana asak gaw jahtum n nga ai dai shara hta anhte a matu tsin-yam tsindam n nga sai.
Dai kaw nga ai anhte yawng a matu sumsing lamu na mahkrum madup langai mi rai na re. Raitim yawn hpa lam gaw ndai hku rai nga ai: Anhte yawng gaw dai Karai Kasang a mahkrum madup hpe n lu la na re. Nkau mi gaw n htum n wai katsi ai kaga maga de sa wa na mara ai; htani htana tsin-yam tsindam ni nga ai shara de.
Kabu gara shiga hta, Yesu hpe Saduke ni (hkrung rawt ai lam hpe n kam sham ai ni) gaw, aten ladaw n bung ai sha, kahpu kanau marai sanit hte hkungran la ai num langai a lam hpe san ai. Shanhte ndai hku tsun ai: “Hpang na prat hta dai numsha gaw kadai a madu jan tai na kun?”
Yesu gaw hkrung rawt ai lam hta hpa re ai hpe shanhte hpe ndai hku tsun dan ai: “Ndai prat na masha ni gaw dinghku de nna, bai hkungran nga ma ai: rai ti mung, du na ra ai prat hte si mat ai ni a bai hkrung rawt wa na matu ging dan ai ni gaw, hkungran nna num n jaw na ma ai: shanhte gaw Karai Kasang a myit ra ai lamu kasa ni zawn rai nga ma ai majaw, n si lu ma ai.
Kaja ai amu galaw nna, Yesu a lam hpe hkan sa ai hku nna, lani mi na aten hta dai shara kaw nga lu na matu shakut ra ai. Ndai mungkan hta anhte lu tawn da ai dinghku prat hku hkau lam hpe sumsing lamu hta naw lu la na kun? Kadai mung n chye ai Karai Kasang chyu sha chye ai.
Anhte gaw nawku hpung a sharin achyin ai lam hpe galoi mung sadi dung let hkan sa ra ai rai yang yawng hpe Karai Kasang a matsan dum lama ai myit hta sha ap da ga. Kaning rai nme law, anhte hta na kadai mung, anhte a matu dai hpe hkam la na matu n ging dan ai. Kaning rai nme law, hkye hkrang la ai lam hte bai hkrung rawt ai lam gaw Karai Kasang kaw na chyeju san san rai nga ai.
