Anhte kam sham daw jau nga ai Karai Kasang gaw, Shi hta hkrum zup kanawn na hpe marit ai Karai Kasang rai nga ai. Shi gaw tsan tsan e, Shi hkrai nga ai wa n rai.
Jahpawt manap shagu, simsa nna hkrak jum madun lu ai sak hkrung ai Karai Kasang hte hkrum na matu anhte hpe saw shaga nga ai. Dai majaw Chyum Mungga gaw Karai Kasang hpe tam na matu aja awa shadut ai.
Shi gaw, makoi nga ai Karai Kasang n re ai zawn, anhte a ntsa e adip arip re ai Karai Kasang n rai nga ai. Shi hte ni htep nna, anhte a salum ni hpe hpaw let shi hpe hkap la chye hkra, asim sha rai lata dingsi let shaga nga ai.
1. Hkawhkam Labau 16:11 hta,
“Yahwe hte shi a n-gun atsam hpe tam san mu; shi a myiman hpe tutnawng e hkan tam mu,” nga nna aming jaw nga ai.
Shingran Laika 3:20 hta;
“Yu u ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai ti mung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai. ” nga nna tsun da nga ai.
Dai majaw, anhte mung anhte hpe saw shaga, ala nga ai Karai Kasang hte hkrum zup, kanawn mazum ai prat de du hkra myit masin n-gun atsam ma hkra hte shakut na sut nga ai.
Anhte gaw, tinang a prat hpe tinang hkrai re ai zawn sak hkrung hkawm sa chye ai. Karai Kasang tinang hte kade daram ni htep nga ai ngu ai hpe mung n dum n nchye ai. Anhte kam sham daw jau nga ai Karai Kasang gaw ngai hte rau nga, rau kanawn mazum mayu nga ai hpe n dum n chye ai mahtang law nga ai.
Ngai Karai Kasang hte rau nga ai lam a ningpawt ninghpang gaw, Karai Kasang ngai hte rau nga mayu ai majaw ngu ai rai na re; raitim, shi ngai hpe kaja wa tsawra nga ai, kabu nga ai hpe ngai dum chye ai hte rau, Shi Kawa hta ngai noi nang mat ni ai.
Nang kadai mi rai rai, hpa mi galaw hkrup kau sai rai tim, nang daw jau ai Karai Kasang gaw nang hte hkrum kadup mayu nga ai. Shi hpe hkap tau jashawn la na matu na a salum chyinghka hpe akawk nga ai. “Ngai hpe hkum la shingdang” nga nna tsawra myit hte lajin nga ai.
Na a ntsa shi tawn da ai tsawra myit hpe lani hte lani grau mu mada hkam sha lu ai asak Shi nang hpe jaw mayu ai.
Mungkan ga, nang hpe ningdang kau ai shaloi, nang hpe masu ai shaloi, shi a simsa ai tsawra kaw na nang hpe gare la kau mayu ai shaloi, Karai Kasang gaw na a salum hpe Shi a anga nga ai shingkang hte hkayawp makawp da mayu nga ai.
Hebre 11:6 hta, “makam masham n rawng yang gaw, shi a man e sharawng awng ai lu la na n rai; kaning rai n me law, Karai Kasang kaw sit shang ai wa gaw, Karai Kasang nga nga ai mung, shi e hkan tam ai ni hpe chyeju htang jaw lu ai mung, kamsham lu na rai nga ai”ngu nna tsun da nga ai.
Dai majaw, daini jang, Nang hte rau nga mayu ai Wa Karai Kasang a shanu nga ai lam hpe tam sanu. Shi hpe tam ai ni hpe kum hpa na nga ai Shi a Mungga hpe kam u.
Nang hpe Shi Kawa aten tup la dingda nga ai ngu ai tengman ai lam hta mahta nna grau sung, grau hku hkau ai kanawn mazum lam hpe tam u.
Na a asak hkrun lam hta Shi Kawa anga nga nna Shi hte langai sha jawm pawng ai chyeju hte hpring nga u ga.
Myit sumru akyu hpyi na matu:
1. Shawng ningnan:
Shingran Laika 3:20 hta tsun da ai ga hpe sumru yu ga:
“ Yu u ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw rai ti mung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai. ”
2. Karai Kasang hte hkrum kadup lu ai lam hte seng nna, Shi myit ra ai, shi a mungga hte nhtan shai ai hpa lam ni hpe galaw kau sai kun? Gara daw, gara lam ni hta Karai Kasang hte n hkrum lu ai ngu hkam sha ai kun ngu ai hpe aru yu u.
Na a prat hkrun lam a gara daw ni hta Karai Kasang hte n ni htep ai ngu nna hkam sha ai kun? hpa majaw rai kun?
3. Karai Kasang nang hte rau shanu nga ai lam hpe ya jang tam nu.
Aten la nna na a salum chyinghka hpe hpaw u; nang Karai Kasang hte hkrum lu ai ngu ai hpe mung kam u.
Na a aten hpe Shi shanu nga ai lam hta sha machyu nga nna, dai hte nhtan shai ai lam hpa hpe mung n galaw sana ngu nna myit hkut daw dan u.
Sharung Shayawt Laika 3:25 hta:
“Yahwe gaw, shi hpe ala nga ai ni hte, shi hpe tam ai myit masin hpe chyeju madun nga ai. ” nga nna n-gun jaw da nga ai.