Presentation of The Lord Year-C (Homily)
Malachi 3: 1- 4
Hebrew 2: 14 -18
Luke 2: 22-40 (or) Luke 2: 22-32
Karai Kasang a Mungga
( Ma Yesu Hpe Nawku Htingnu De Ap Ya Ai Poi Laban ) Year – C
Hkristu hta tsawra ai nu/wa hpu nau ni e, ndai Laban gaw Ma Yesu hpe nawku htingnu de ap ya ai poi nhtoi rai nga mali ai. Ma Yesu hpe nawku htingnu de ap ya ai poi hpe galaw ai a marang e, yaw shada ai lam (3) hpe myit dum lu mai nga ai.. No (1) Ma Yesu gaw anhte shingyim masha ni a matu “Nhtoi” rai nga ai. No (2) Ma Yesu gaw ga shaga dingsa na tara ni hpe jahtan na matu n re ai, hkup sup na matu sha rai nga ai. No (3) Nu Maria hte San Yosep gaw Karai Kasang a tara hpe kam sham ai myit hte hkan sa ai lam rai nga ai. Dai ni dai lam ni hpe myit dum lu na matu Chyum mungga ni hku nna anhte hpe shadum ya nga ai.
Chyum mungga daw langai hku nna Myihtoi Malachi a laika 3: 1 – 4 hta. “Madu Karai Kasang gaw shi a kasa hpe Jerusalem nawku htingnu de shangun dat nna Levi amyu na jau ni hte Israel amyu sha ni hpe jasen jaseng ya na rai nga ai. Shi nawng ya ai hkungga hpe mung Madu Karai Kasang gaw sharawng awng ai hte hkap la na ra ai” ngu nna Myihtoi Malachi tsun da hpe mu lu ai rai nga ai.
Chyum mungga daw lahkawng hku nna Kasa Pawlu Hebrew hpung masha ni hpang de shangun dat ai laika 2: 14 – 18 hta. “Madu Yesu Hkristu gaw anhte a matu mara gawng malai hkungga nawng jaw ai hkrinjawng agyi rai nga ai. Shi nawng ya ai hkungga hpe mung Madu Karai Kasang sharawng awng ai hte hkap la ai” ngu nna Kasa Paul a sharin shaga da ai hpe mu lu ai.
Kabu gara shiga Luka ai laika 2: 22-40 (shing nrai yang) Luke 2: 22-32 hpe hti dat yang. Ma Yesu hpe nawku htingnu de ap ya ai shaloi laklai ai mabyin ni byin wa hpe mu lu ga ai. San Yosep hte Nu Maria gaw Ma Yesu hpe Simon a lata hku nna Madu Karai Kasang hpang de ap ya ai. Chyoi Pra ai Wengyi lam woi ya a mareng e, Simon gaw Ma Yesu hpe mu ai shaloi Myihtoi Malachi tau naw hkaw tsun da ai lam dik wa (fulfil) ai hpe dum chye shangun nga ai. Simon gaw “Ma Yesu nawku htingnu de shang wa ai hpe mu ai shaloi hkungga nawng ya ai hkringjawng agyi gaw Madu Yesu Hkristu nan rai nga nna, Shi Jerusalem nawku htingnu de shang wa ai gaw ga shaga dingsa hku nna nawng ya ai jau ni hpe ga shaga ningnan a hkringjawng aya jaw ai lam mung rai nga ai hpe shadum ya ai. Bai, Jerusalem nawku htingnu gaw Israel amyu sha ni a nawku jawng ni a kanu nawku htingnu mung rai nga ai. Ndai kanu nawku htingnu de Ma Yesu shang wa ai a marang e, Jerusalem nawku htingnu hpe jasan jaseng ya ai lam mung rai mat nga ai. Jerusalem nawku htingnu hpe jasan jaseng ya ai lam gaw nawku jawng ni yawng hpe jasan jaseng ya ai lam rai nga ai hte dai nawku jawng kaw sa du akyu hpyi ni yawng mung mara kawn lawt lu ai hte shaman chyeju hkam la lu na rai nga ai ngu nna Simon dum chye lu ai rai nga ai. Dai majaw Simon gaw shi a lata hte dai Ma Yesu hpe pawn la nna Karai Kasang hpe shakawn shagrau let, “N-gawn Madu e, na ga hte maren, na a mayam wa hpe ngwi pyaw ai hte ya wa shangun dat nit ga law; masha amyu myu ni a man e lajang da nna, maigan amyu ni hpe jahtoi dan na nhtoi the, na amyu Israela a hpung shingkang matu rai nga ai, Na a hkye hkrang la ai lam hpe nye a myi hte chyaw ngai mu lu se ai” tsun ai rai nga ai. Ma Yesu hpe mu ai shaloi Simon gaw Karai Kasang a mau hpa hkye hkrang la ai lam hpe dum chye wa ai gaw mau hpa mabyin rai nga ai.
Ma Yesu hpe nawku htingnu de ap ya ai mabyin hpe mu lu ai gaw Anna ngu ai gaida jan, myihtoi langai mi mung lawm nga ai. Shi gaw mahkawn prat kaw nna sanit ning du hkra sha madu wa hte nga nhtawm, matsat shi mali ning tup gaida da nga ai rai nna asak grai kaba sai rai nga ai. Shi hta laklai ai lam gaw “nawku htingnu kawn n pru ai sha lusha gam ai, akyu hpi ai hte shani shana dawjau ai hte anga nga ai” lam rai nga ai. Shi gaw Israel amyu sha ni ala nga ai Messiah hpe myi hte chyaw mu lu ai shaman chyeju kam la lu ai. Dai majaw shi gaw kabu ai hte Karai Kasang hpe shakawn nga ai mung rai nga ai. Kam sham myit kaba ai, Karai Kasang a ra sharawng ai hte asak hkrung hkawm sa let Karai Kasang a hkye hkrang la ai lam hpe Anna hpe mu ai lam mau hpa mabyin rai nga ai.
Dai ni Ma Yesu hpe Jerusalem nawku htingnu hpe ap ya ai poi hta myit yu let wenyi ningun la na matu lam (4) hpe tsun dan mayu ai.
(I) Nawku jawng de sa wa ai masha shangu Karai Kasang hpe ap ya na kumhpa la sa wa ra ai. (Bring something to offer when you come to Church!)
San Yosep hte Nu Maria gaw Ma Yesu hpe Jerusalem nawku htingnu de ap ya ai. Ma Yesu gaw shan lahkawng a matu Karai Kasang jaw ai hkum hpa rai nga ai. Dai Karai Kasang jaw ai hkum hpa hpe Karai Kasang hpang de bai ap nawng gwi ai shanhte a tsawra myit hpe mu lu nga ai. Ma Yesu hpe nawku jawng de ap ya ai ngu ai gaw shan lahkawng tsawra dik ai, manu shadan dik htum ai hkum hpa rai nga ai. San Yosep hte Nu Maria zawn anhte mung nawku jawng de sa ai ahkying ten shangu Karai Kasang hpe ap ya na kumhpa la sa wa ra ai hpe sharin ya nga ai. Anhte a tsawra myit hte ap ya ai hkum hpa hpe Karai Kasang ra sharawng ai hpe bai shadum ya nga ai.
(II)Nawku jawng de sa wa ai shaloi tinang a kashau kasha ni, tinang tsawra ai masha ni hpe woi sa ra ai. (Bring your loved ones when you come to Church!)
San Yosep hte Nu Maria gaw Ma Yesu hpe Jerusalem nawku htingnu de woi sa wa ai rai nga ai. Shan lahkawng a makam sham nga ai hpe shadan shalen dan na matu nawku dawjau ai amu hta shang lawm ai. Nawku dawjau ai lam gaw shan lahkawng a matu asak ngu na daram manu dan ai lam hpe shan chye nga ai. Dai majaw Ma Yesu hpe Jerusalem nawku htingnu de woi sa wa ai rai nga ai. Anhte ni mung tinang a kashu kasha ni hpe nawku jawng de sa shangu woi sa ra ai lam hpe Ma Yesu hpe nawku htingnu de ap ya ai poi nhtoi laban hku nna shadum ya nga ai.
(III) Missa Hkungga hta sa lawm shagu gaw anhte hkum nan Ma Yesu zawn Karai Kasang hpe ap ya ai lam rai nga ai. (Every Holy Mass in which we participate is our presentation)
Anhte Kashin Kamun kam la ai shani hta anhte a hkum hpe Karai Kasang kaw tara shang ap sai rai nga ai. raitim Missa Hkungga hta Madu Yesu gaw anhte a myit masin wenyi hpe tawn hkungri hta Kawa Karai Kasang hpang de ap ya nga ai. Madu Karai Kasang gaw anhte hpe jasan jaseng ya nga ai. Anhte hpe shaman chyeju jaw ya nga ai. Dai majaw, anhte ni yawng gaw Karai Kasang hpe ap ya ai amyu masha ni (consecrated people) tai wa sai majaw dai lam hpe myit dum let shani shangu asak hkrung hkawm sa ra ai. Karai Kasang hpe ap nawng da sai amyu sha ni tai wa sai majaw anhte ni yawng gaw san seng sanpra ai prat hku hkawm sa na lit nga ai hpe mung shadum ya nga ai.
(IV) Anhte gaw Madu Yesu nga ai hpe dum chye na matu Chyoi Pra ai Wenyi a garum ya ai shaman chyeju ra nga ai. (We need the assistance of Holy Spirit to recognize the presence of Jesus!)
Simon hte Anna gaw makam masham rawng ai, Karai Kasang hpe myit mada let hkawm sa ai hte dawjau ai magam hpe tsawra myit hte gun hpai ai ni rai nga ai. Raitimung, shanhte a atsam hte Ma Yesu hpe masha yawng hpe hkye hkrang la na Massiah ngu nna chye lu ai n rai nga ai. Chyoi Pra ai Wenyi a garum ai shaman chyeju hte sha Ma Yesu hpe “Massiah” ngu nna chye lu ai rai nga ai. Karai Kasang gaw shi a hkye hkrang la ai amu hta ndai Simon hte Anna zawn rai nga ai yu maya masha hpe jai lang ai, hkye hkrang la ai amu hpe chye shangun nna masha yawng hpe sakse tai na matu lata la ai rai nga ai. Chyoi Pra ai Wenyi gaw shan lahkawng hpe Ma Yesu gaw Massiah ngu nna madun dan ai gaw shan lahkawng Karai Kasang a yaw shada lam hpe hkap la mayu ai myit masin a majaw rai nga ai. Madu Yesu anhte hta rawng nga ai, masha ni kaw mung shanu nga ai hpe dum chye na matu Chyoi Pra ai Wenyi a garum chyeju hkam la na matu anhte a myit masin wenyi hpe paw da ga.
Hpang jahtum hku nna, Ma Yesu hpe nawku htingnu de ap ya ai zawn anhte hkum nan Missa hkungga hta ap nawng let Simon hte Anna zawn akyu hpyi ai, lusha gam ai, tinang a ra marit ai lam ni hpe nyet kau nna, Karai Kasang a ga hpe madat mara let hkawm sa ai rai yang gaw anhte hpe hkye hkrang la ai Madu Yesu Hkristu hpe mu lu na rai nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw ma Yesu hpe nawku htingnu hta ap ya ai poi nhtoi lanban rai nga ai hti ang ai ja chyum mungga ni gaw chyum mungga daw langai ..Mal laika 3: 1-4 .chyum mungga daw lahkawng Hebre laika 2: 14-18 kabu gara shiga Lk 2: 22-40
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law