Acts 2:14, 36-41; 1Pt 2:20b-25; Jn 10:1-10
Dai ni gaw Good Shepherd Sunday hte Mungkan ting na shaga la ai lam a matu akyu hpyi ai nhtoi rai nga ai. Nawku hpung gaw Karai Kasang a sagu hpung a sagu rem kaja ni tai na matu shaga la hkrum ai lam hpe shadum ya ai hte, jau aya, diacon aya, ap nawng da ai prat hpe shaga la ai lam ni a matu akyu hpyi na matu saw shaga nga ai. Ga Shaka Dingsa hte Ga Shaka Ningnan lahkawng yan hta, Karai Kasang hte Israela ni hte Hkristu a laklai ai hku hkau lam hpe tsun dan na matu, Sagu rem wa hte shi a sagu hpung a hkrang sumla hpe lang da ai. Daw 1 gaw, Pentekoti shani hta San Petru a shawng ningnan na mungga kaw na la ai re. Shi a ga madat ai Yuda masha ni hpe shanhte a teng man ai Sagu rem wa hpe wudang hta jen da sai lam shadum ya nga ai. Dai majaw, Yesu hkang da ai hte maren, Yesu a mying ningsang hta kashin kamun hkam la nna, hkrung rawt ai Yesu hpe shanhte a Madu hte Hkyela Madu hku nna hkap la nna, shanhte a yubak mara raw dat kau ya ai lam hpe hkam la lu na matu ra nga ai. Shakawn Kungdawn (Shk 23) hta, anhte Shi a sagu ni hpe bau maka ai, anhte ra kadawn ai lam ni hpe madi shadaw ya ai Israela a Sagu rem wa kaja hku nna Yahweh hpe shachyen ya nga ai.
Daw Lahkawng hta, Petru gaw, nni nkri hkrum nga ai Hkristan ni hpe, shanhte a Sagu rem wa kaja, “nni nkri hkrum ai mayam” Yesu a lagaw lahkam hpe hkan nang na matu, Yesu a nni nkri hkrum ai hte si hkam ai majaw, Karai Kasang a kashu kasha ni grau nna hkum tsup wa lu ai ngu ai tengman ai lam hpe chye na hkam la na matu n-gun jaw nga ai. Dai ni na Kabu Gara Shiga hta, ga shadawn kadun lahkawng gaw, Yesu hpe madun dan ai, langai ngu na gaw, shi a sagu ni hpe makawp maga ya ai hte asak hkrung lam hpe shi nan lajang ya ai, tinang hkum hpe n myit ai, lanu lahku chye ai “sagu rem wa” hku nna, lahkawng ngu na gaw, anhte a laklai ai chyinghka (“sagu lawng chyinghka”) hku nna, htani htana hkye hkrang la ai lam de du lu na matu re. Tsun mayu ai gaw, Sagu rem wa kaja hku nna shi a sagu hpung hpe Htani Htana Asak de woi sa wa ai hta n-ga, Yesu gaw shi hkum nan Htani Htana Asak de shang wa ai chyinghka rai nga ai.
Lam madun dan ai wa: San Salvador mare hta, 1980 ning March shata 24 ya shani, sat nat ai wa gaw, saradaw Kaba Oscar Romero Missa hkungga nawng nga ai aten, shi hpe kalang ta gap sat kau ai. Dai minit loi mi daram na ai hpang, Saradaw Kaba Romero gaw, myit mada shara hpring ai mungga hta, mung shawa ni hpe langai hte langai daw jau na matu tsun shadut da sai. Saradaw Kaba Romero gaw, dip sha hkrum nga ai shi a amyu masha ni a matu shinggyim ahkaw ahkang hpe hpyi shawn nga ai majaw, shi a asak gaw hkrit tsang hpa rai nga ai hpe chye nga ai. Raitim, shi gaw zingri zingrat ai lam hpe ninghkap nna, lawt lu lam a matu shawa man hta tsun shaga nga ai. hpyen ni shi hpe sat kau tim, shi a amyu sha ni a lapran bai rawt wa na re nga nna kalang mi shiga dap ni hpe tsun lai wa sai.
Sagu rem kaja hte ningbaw ningla kaja ni tai ra ai: Kaga masha ni hpe yu lanu lahku ap da hkrum ai masha shagu gaw sagu rem wa rai nga ai. Dai majaw, hpung woi sara ni, kanu kawa ni, sara/num ni, tsi sarawun ni, asuya magam gun ni, ma ni hpe bau maka ai ni yawng gaw sagu rem ni rai nga ai. Anhte hpe ap da ai ni hpe tsaw ra ai, shanhte a matu akyu hpyi ya ai, shanhte a ngamu ngamai lam a matu anhte a aten, atsam marai, shaman chyeju ni hpe jai lang let, hkum hkrang hte wenyi lam hta hkrit tsang hpa lam ni kaw nna makawp maga ai sagu rem kaja ni tai ra ga ai. Laksan hku nna kanu kawa ni gaw tinang a ma ni a ntsa shanhte a lit hpe gun hpai ai hta sadi maja let, kaja ai kasi ningli hte sharin achyin ya ai hte Hkristan npawt tara ni hpe sharin achyin ya ra ai.
Sagu rem wa kaja Yesu a lawng hta sagu kaja tai ra ai: Anhte a buga nawku jawng ni gaw sagu lawng ni rai nna, anhte a Jau, sara ni gaw anhte a sagu rem ni rai nga ai. Yesu gaw Hkinjawng agyi rai nna, Jau ni gaw Kasa ni a hpang hkan ai ni rai nna, hpung sara ni gaw shanhte hpe karum ai ni rai nna, hpung masha ni gaw sagu ni rai nga ai. Dai majaw, nawku hpung a sagu kaja ni hku nna, nawku hpung masha ni gaw a) Anhte a sagu rem ni a mungga, Chyum Laika sharin hpawng, hpaji jaw ga, hpaji jaw ga ni hku nna, shanhte a nsen hpe madat nna hkan sa ra ga ai. b) Anhte a hpung woi Jau ni jaw ya ai wenyi malu masha hpe Chyoi Pra ai Missa hkungga hta ayan shang lawm ai, Sakramentu ni hpe ayan hkam la ai, anhte a akyu hpyi hpawng ni, gram lajang ai lamang ni, sasana magam bungli ni hta shang lawm hkam la ra ai. c) Anhte a Jau/sara ni hpe, nawku hpung a shimlum lam a matu kaja ai ningmu ni hpe jaw ya nna, shanhte a lit magam hta n-gun jaw ai, shanhte a lit magam hta n kaja ai hku galaw ai (sh) hkrat sum ai hpe mu hkrup ai shaloi, tsawra myit hte, kaja ai hku hpaji jaw ai shanhte a matu galoi mung akyu hpyi ya ai hku nna, jawm galaw sa wa ra ai. d) naw ku hpung zuphpawng, jau ginwang kata na (Association) wuhpung wuhpawng, sasana magam bungli yawng ni hta atsam dat shang lawm ra ga ai.
(Vocations) shaga la ai ni law wa na matu akyu hpyi ra ai: Nawku hpung gaw Mungkan ting hta Vocations ni law wa na matu akyu hpyi ai nhtoi hta, Karai Kasang shaga la hkrum nga ai ni hpe (vocation)) sasana magam gun jau aya, diaconate aya hte ap nawng da ai prat hpe kaja ai mahtai jaw lu na matu n-gun jaw nga ai. Hkristan yawng gaw ndai shaga la ai lam ni hpe n-gun jaw na lit hpe hkam la ra ai: a) Makam masham hpung masha ni gaw Nawku hpung kata hta mung, dinghku kata hta mung shaga la ai lam ni a matu matut manoi akyu hpyi ra ai. b) Kaja ai jau ni, deacon ni, san seng ai prat hpe hkap la ai masha ni gaw, kaja ai Hkristan dinghku ni kaw na pru wa ai ni re majaw, Hkristan kanu kawa yawng gaw, Hkristu hta kam sham ai lam hpe shani shagu sak hkrung hkawm sa ra ai, kanu kawa ni hku nna kasi kaja madun ai sak hkrung lam hpe woi awn ra ai, ma ni hte, shanhte a lapran hta kaja ai hku hkau lam hpe shalat ra ai. c) Jau (sh) deacon tai na matu (sh) san seng ai prat de shang wa na matu myit lawm ai ma ni hpe kanu kawa ni hkungga lara ai hte n-gun jaw ra ai. Kanu kawa ni gaw, shanhte a ma ni hpe, shanhte a ramma ni hpe mung, nawku hpung kata na ma ni hte ramma ni a lamang ni, Laban jawng, ma hpung ni, ramma hpung ni zawn re ai lamang ni hta, atsam dat ai hte shang lawm na matu n-gun jaw ra ai.
Yesu gaw anhte a matu kaja dik ai hta lai nna kaga hpa mung n ra sharawng ai ndai lam gaw myit galu let anhte hpe rem nga ai a lam rai nga ai. Bai nna Shi a jahtum na yaw shada lam gaw, Shi anhte a matu ra sharawng ai hte maren anhte a prat hpe sak hkrung na matu rai nga ai. Raitim, anhte gaw Yesu sagu rem wa kaw na tsan mat wa nna, ndai mungkan a sagu rem ni hpe yawn hpa lata la chye ga ai.