Yesu hkrung rawt sai ngu ai hpe kaga masha ni kam sham na matu nang hpa galaw mai ai kun? Nang gaw na a sak hkrung lam hku nna kabu gara shiga hpe hkaw tsun ra ai. Ndai gaw hpa lachyum rai kun? Ndai hku sha kaga masha ni Yesu hkrung rawt sai ngu ai hpe kam sham lu na re majaw, nang gaw Yesu a prat hhe sak hkrung ra ai.

Kabu gara shiga hta, Maria Magdalena gaw shi a manang ni hpe Yesu hkrung nga ai raitim kadai mung n kam ai lam tsun dan ai. Yesu mung sape ni hpe dan pru wa nna ndai sape ni mung kaga sape ni hpe bai hkrung rawt wa ai Hkristu dan pru wa ai lam hpe tsun dan ai raitim shanhte mung dai zawn n kam sham ma ai.

Yesu hkrung rawt nna hkrung nga ai hpe teng sha madun dan ai gaw nang nan rai nga ai! Nang hku nna she kaga masha ni gaw hkrung rawt wa sai Hkristu a lam hpe kam sham na re. Nang hkrum zup ai ni gaw Yesu teng sha nga ai, hkrung rawt wa sai, hkrung nga ai ngu ai hpe kam sham na matu nang hpa galaw na kun?

Shanhte a matu kaga Yesu langai mi tai ra ai. Yesu shagrit shanem ai zawn shagrit shanem ra ai, Yesu karum shingtau ai zawn nang mung karum shingtau ra ai. Yesu tsawra myit hte mara raw ya ai zawn nang mung tsawra myit hte mara raw ya chye ra ai.

Yesu gaw matsan dum chye ai majaw matsan dum chye ra ai. Yesu kadai hpe mung tara n jeyang ai zawn, kaga masha ni hpe tara jeyang ai hte mara shagun ai hpe jahkring kau ra ai.