San Petru Nawku Htingnu hta galaw ai ‘Pentecost Chyoi Pra Ai Wenyi Yu Hkrat Wa Ai Poi’ Missa hkungga hta, Wa Sarabyin Leo XIV gaw, myit masin hpe htoi tu shangun ai, myit masin hpe n-gun nnan jaw ya ai, shinggyim masha ni hpe Karai Kasang a hkye hkrang la ai lam de hpaw ya ai Chyoi Pra ai Wenyi a galai shai ya lu ai atsam hpe myit sumru let, Shi a munnga hta, Pentecost gaw Paska aten hpe shadik shatup ya ai rai nna, Hkristan ni hpe “mungkan ningnan, mungkan ga a nhtoi hte jum” tai na matu shaga la hkrum ai hpe shadum ya ai.
Kalang mi hta hkrit tsang ai hte Ntsa Gawk kata e makoi nga ai Kasa ni hpe Yesu Chyoi Pra ai Wenyi n-gun jaw ai shaloi, simsa ai hte nden marai hte hpring tsup wa ai lam hpe Wa Sarabyin bai myit dum ai. Daini aten hta Wenyi gaw ahkyak ai lam masum hku nna matut nna bungli galaw nga ai hpe shi sang lang dan ai.
Simsa ai Wenyi: Chyoi pra ai Wenyi gaw mara raw ya ai hku nna Karai Kasang hte shinggyim masha ni a lapran simsa lam hpe bai gram lajang ya nna, kam sham ai ni hpe mungkan ting hta htinglu htinglai lam chyam bra na matu shaga la nga ai.
Wenyi a Sasana: Wenyi gaw Hkristan ni hpe kabu gara myit mada let, matsan dum lama ai hte mai kaja ai magam bungli ni hte Hkristu hpe hkaw tsun lu na matu n-gun atsam jaw ya nga ai. Wa Sarabyin Leo gaw, kashin kamun Baptistma hkam la sai masha shagu gaw, Kabu Gara Shiga hta sasana bungli rau galaw ai wa rai nna, Nawku hpung ting gaw Hkristu a sasana magam bungli hta shang lawm nga ai ngu ai hpe ahkyak shatai tsun shalawm da nga ai.
Tengman ai Wenyi: Chyoi Pra ai Wenyi gaw, kam sham ai ni hpe garan ginhka ai lam, masu hkalem ai lam, shut shai ai myit masa lam ni kaw na makawp maga ya ai sha n-ga, kahkyin gumdin lam, myit hkrum lam, Kabu Gara Shiga hpe sadi dung ai lam ni hpe shabyin ya nga ai.
Wa Sarabyin Leo gaw, Chyoi Pra ai Wenyi gaw, sakramentu ni hku nna, grau nna kashin kamun batistism, N-gun shaja, chyoi pra hkum, hte Jau shatai ai sakramentu ni hku nna, Hkristu a sadi dung ai sakse ni hpe shatai nna, Nawku hpung a akyu ara a matu chyeju kumhpa ni hpe garan gachyan ya nga ai hpe ahkyak shatai tsun shalawm da nga ai.
Wa Sarabyin gaw, Chyoi Pra ai Wenyi hpe mungkan ga hta tengman ai simsa lam jaw ya lu na matu, shinggyim masha ni hpe majan a n hkru n kaja ai lam kaw na hkye la lu na matu, tsin-yam tsindam hte yubak mara kaw na lawt lu shangun na matu, Chyoi Pra ai Nu Maria a akyu hpyi garum shingtau ai lam hku nna Kasa ni hpe jaw ya ai nden marai zawn, kam sham ai ni hpe mung jaw ya lu na matu akyu hpyi ga hte hpungdim dat ai.
Bai nna shana maga na Regina Caeli’ Sumsing lamu a hkawhkam jan akyu hpyi ga tsun ai shaloi mung, Wa Sarabyin gaw, Wenyi gaw simsa lam nga ai hpunau nauna myit rawng ai mungkan hpe gawgap lu na matu akyu hpyi ya lai wa ai. makam masham chyinghka hpaw ya ai hte Nawku hpung hpe “masha yawng hpe hkap hkalum la ai hte manam daw ai nta” byin tai wa hkra n-gun jaw ya ai Chyoi Pra ai Wenyi hpe shaga la na matu yawng hpe tsun shadut da ai. Bai nna, Chyoi Pra ai Wenyi gaw “ningdang kau ai lam, tinang hkum hpe sha myit ai lam, n kam sham ai lam, lachyen lahka ai lam ni hpe” dang kau lu hkra karum ya nna, hpunau nauna myit hpe rawt jat galu kaba wa shangun u ga ngu akyu ya dat ai chye lu ai.