Daini na Ja Chyum Mungga hpe hti sumru yu ai shaloi e, Sumsing mungdan  gaw, nawng hta kabai bang nna, nga amyu myu hpe magawn la lu ai sumgawn hte bung nga ai lam hpe ga shadawn na la lu ga ai. Sumgawn ga shadawn gaw, Madu Karai a shaga la ai lam gaw grai dam lada nga ai. Kadai masha hpe mung shingdu tawn kau da ai lam n nga, yawng a matu akyu rawng nga ai lam tsun da nga ai. Madu Karai a tsawra myit gaw, masha ni a lai mat sai ten na htung hkring lai len ni a labau ni hpa mi byin taw tim, yawng kaw e du mat wa ai. Nga hpan amyu myu hpe lu rim ai sumgawn zawn, sumsing mungdan gaw, kadai wa hpe mung n` ngam kau da ai.

Madu gaw, Yawng mayawng hpe saw shaga nga ai. Dai zawn sha Nawku hpung gaw, yawng a dum n ta rai nna, mara kap ai ni hte Sanpra ai ni yawng arau, san seng chyoi pra ai prat hpe myit mada let, nga nga ai shara rai ra ai. Bai kaja ai Nga hpe lata la hkrum ai, n kaja ai Nga hpe kabai kau hkrum ai zawn, Madu Karai a tsawra matsan dum lama ai myit gaw, galu kaba nga ai raitim, anhte maga de e mung, galaw ra ai magam lam ni hpe galaw sa na lit magam nga nga ga ai. Shingrai Madu Karai a matsan dum lama ai lam, chyeju ni hpe hkam la nna, san seng ai prat hkrun lam hta galu kaba let, ni htep ai ni hpe mung sumsing mungdan de ta gindun shaga la lu hkra akyu hpyi shakut sa ga law.