Daini na Ja Chyum Mungga hpe anhte hti sumru yu ai shaloi e, lusu ai shabrang ma wa hte sumsing mungdan hte seng ai hkan galaw ra ai lam ni hpe na la lu ga ai. Anhte shinggyim masha ni ndai ding hta ga hta, myit dun ai, myit marin ai namak lawhpa ai, ndai zawn re ai myit ni gaw, wenyi lam yan a matu grai dingbai dingna jaw ya ai lam re. Hpa majaw nga yang, madu a sutgan nga ai shara kaw, madu a myit masin galoi mung du taw nga ai. Dai majaw dai sutgan ni gaw madu a wenyi galu kaba na lam hpe, gang jahkrat kau ya nga ai. Hpa wa mi galaw law, lu tim, sha tim, kyu hpyi tim, yup tim anhte a myit gaw, dai kaw chyu sha dum taw nga ai majaw re.
Shingrai Religious ngu ai Karai Kasang a magam gun nga ai jau, ma ma ni gaw matsan jan jau hkam ai ga sadi hpe hkam la nna, Karai Kasang kaw prat tup a matu, ap nawng daw jau nga ai ni re. Shingrai Sut gan ja gumhpraw ni hpe, madu ra ai hku jai sung lang ai n re sha, U hpung / u hpawng hku jai lang ai ladat re majaw, tinang a prat hte sasana magam bungli ni hpe, myit dut dang ai lam n nga ai sha, wanglu wanglang ap nawng gun hpai lu nga ai gaw ya ta tut rai nga ai. Dai majaw sumsing sut gan du lu na matu, anhte yawng myit masin dingman ai hte ap nawng hkawm sa nga ga law.
