(5th Sunday of Lent, Cycle C)
LUSHA GAM LADAW LABAN (5)
(5th Sunday of Lent, Cycle C)
Tsawra ai nu wa hpunau ni e ndai Laban gaw Shaning C a Lusha Gam Ladaw hta Laban ( V ) rai nga ai.
Mungkan hta mying kaba nna, Oscar kumhpa lu ai Hollywood sumla hkrung langai mi rai nga ai – Mel Gibson gat yat lai wa ai “The Passion of Christ” ngu ai Madu Yesu a nni nkri sumla hkrung a lam hpe tsun dan mayu ai. Ndai sumla hkrung gaw Yesu a prat hpang jahtum na aten hkying hkum shilahkawng hpe sumrai ka da ai sumla hkrung rai nga ai. Ndai sumla hkrung hta gaw Aramaic ga hte Latin ga hpe – Yesu kawn tsun shaga da ai hte , English ga hku sub-title ni galaw da ya ai rai nga ai. ndai sumla hkrung gaw nhtoi 19 ya laman e US $ wan 264 lu lai wa ai mung rai nga ai.
Texas mungdaw hta, asak 21 ning re ai Dan Leach ngu ai wa gaw, shi a madu jan – Nichole Wilson hpe sat kau nna, tinang hkum tinang sat si mat ai zawn, sumrai gin shalat lai wa ai rai nga ai. moi mang hte seng nna kamatsing da ai sumtang hta tinang hkum tinang sat si kau ai lam re nga nna ka da lai wa ai. dai si mat ai num a kanu gaw 2004 ning January shata 19 ya shani gawk kata kaw si taw ai kdai shi ma a moi mang hpe mu hkrup lai wa ai rai nga ai. Shata lahkawng daram na ai hpang madu wa gaw balik rung de sa nna shi a madu jan hpe sat kau ai wa ngai re ngu nna balik ni a lata hta shi hkum nan sarim hkam lai wa ai rai nga ai, shi hkum shi sat si ai zawn galaw lai wa ai lam re ngu bai tsun dan lai wa ai. Hpa majaw ya na zawn sa rim hkam la ai ngu nna sawk sagawn san ai shaloi, shi gaw, ” – ‘The Passion of Christ’ ngu ai sumla hkrung hpe yu ngut ai hpang, chyoi pra wenyi e myit shadut hkrum nna hkye hkrang la ai lam hpe lu mayu wa ai majaw re ngu nna tsun lai wa ai.
Ndai sumla hkrung gaw, Yuda masha hte Roma hpyen la ni kawn, Yesu hpe Minit 126 tup adup zingri zingrat ai lam rai nga ai. Ndai sumla hkrung ting gaw Yesu a hkam sharang ai hte n hkring n sa zingri zingrat hkrum ai nna sai htaw si wa ai lam rai nga ai . Ndai sumla hkrung hpe yu ngut ai hpang, masha law malawng gaw grai hkam sha lai wa ai.. yu ai ni yawng mung atsin sha nga mat ai (sh) myi prwi si hte hpring rai myi man ni rai mat nga ai. Dai sumla hkrung hpe yu ngut ai hpang masha langai mi gaw, “Nang hpa mi rai rai, Yesu hpe kam sham ai raitim, n kam sham ai raitim, na a matu ndai daram nni nkri hkrum sha lai wa sai Yesu hpe mu ai shaloi nang tsawra wa na re” nga nna tsun lai wa ai.
Anhte Hkristu hpe grau chye wa magang, Shi hpe grau tsawra wa magang; Shi hpe grau tsawra magang, shi a hpang de grau nna hkan nang wa na re. Yesu hta laklai ai lam langai mi nga ai; Shi hta tsaw ra na zawn re ai lam ma nga ai; Shi hta Karai Kasang hkrang masa lam nga ai. Daini na Kabu Gara Shiga gaw, tsin-yam tsindam hkrum sha nga ai num sha langai hpe Hkristu a matsan dum lama ai lam kaba nga ai hpe hpaw shadan dan hkrum lai wa ai lam rai nga ai. kadai mung ndai chyum mungga hpe hti ai ni Hkristu a tsawra matsan dum lama ai myit kaba a majaw shi hpe teng sha tsawra wa na re. Daini e anhte mung Kabu Gara Shiga hta hkrang shala hku nna lawm ai marai masum a lam hpe kachyi tsun dan mayu ai.
1) Laika ka ai sara ni hte Hparishe ni……Laika ka sara ni ngu ai gaw Babelon kaw na nnan npawt hpang paw pru wa ai rai nga ai. Shanhte gaw shara shagu hta nga ai; grau nna Yerusalem, Yuda mung, Galile mung ni hta nga ai rai nga ai. Shara shagu hta shanhte gaw n nga n mai ahkyak nga ai ni zawn rai nga ai. Shanhte gaw masha ni a dat kasa ni hte tsun shaga ahkang lu ai ni zawn mung rai nga ai. Shanhte gaw tara kasa ni – hpaji ninghkring sara ni hte lachyum shapraw ai ni rai nga ai. Shanhte a ahkaw ahkang gaw makam masham hte tatut galaw ai lam hte seng ai ga san yawng hta tsaw dik ahkaw ahkang lu ai ni rai nga ai. Hparishe ni.. hte Salang ni gaw nawku hpung a tara rung ni hta tara agyi ni rai nga ma ai. Shanhte gaw Hparishe ni hte rau ayan gindun nna nga ai hpe mu lu nga tim, shanhte gaw hparishe ni hte rau bung ai ngu n lu tsun ai. Hparishe ni gaw nawku htung hpung rai nna, laika ka ai sara ni gaw rung langai mi hpe gun hpai ai ni sha rai nga ai.
Hparishe ni Saduke ni ngu nna hpung lahkawng hpe hpaw da nga ai. Hparishe ni a yaw shada ai lam gaw lahkawng rai nga ai: Lewi masha ni a san seng ai lam hte seng ai tara ni yawng hpe htunghking tara hte maren hkan sa na matu, nawku htung hte seng ai lit yawng hpe grai sadi ai hte hkan sa na matu (Tithes and all dues) rai nga ai..
Laika ka ai sara nkau mi hte Hparishe nkau mi gaw Yesu hpe n dawng n yawt wa ai. Shanhte gaw Yesu hpe shut ai hku rim la nna jahten kau mayu ai. Shanhte gaw la shaw ai hku na rim woi wa ai num langai hpe Yesu a man e woi wa ma ai. shanhte gaw Dai numsha a hkam sha lam hpe mung, shi a sari hpe mung n myit yu ya ai. Shi a mying hpe mung n chye ai. dai num sha gaw Yesu hpe hkam na matu shanhte a lata na hkingrai langai mi shatai lai wa ai. shanhte gaw Yesu hpe Dai mying n chye ai numsha gaw, la shaw ai lam galaw nga yang rim hkrum ai a majaw mawshe a hkang da ai ga hte lakap nna dai zawn re ai numsha ni a matu si ari jaw na lam hkang da ai nga nna tsun let, Yesu a ningmu gaw hpa re hpe san lai wa ai. Shanhte gaw Yesu a matu hkalem hkalau ai lam masum hpe tawn da ai. Mawshe tawn da ai hte maren, dai numsha hpe nlung hte kabai sat kau na lam myit hkrum ai rai yang, Yesu gaw matsan dum chye ai sara wa ngu nna mying kaba ai lam hta hkrat sum mat na re; lahkawng hta, Roma asuya ni hta lai nna kadai mung si ari jaw na ahkaw ahkang n nga ai majaw, si ari jaw mai nga tsun yang Roma asuya ni hte mang hkang byin wa na re. Bai masum ngu na hta, lama na yesu gaw dai numsha hpe mara raw ya ra ai ngu tsun ai rai yang, Mawshe a tara hpe tawt lai na matu masha ni hpe sharin ya nga ai lam dan dawng na re ngu ai lam rai nga ai.
Shawng nnan e Yesu gaw hpa mahtai mung n jaw lai wa ai. Rai timung shanhte atik anang san ai shaloi, Yesu gaw, “Yubak n kap ai wa
gaw, shi hpe shawng nlung hte kabai mu ga,” ngu nna tsun lai wa ai.
2) numsha langai hpe tsep kaw kaya kahpa jahkrum ai hte sari jahpoi ai lam galaw lai wa ai hpe mu lu ai..Shi a yubak mara gaw shi hpe roi rip ai wa hta grau n kaba ai, rai tim dai wa gaw mara na lawt mat wa nna…dai matsan mayan hkrum nga ai numsha hpe rim la nna mara shagun hkrum lai wa ai. Shaloi dai numsha gaw grai myit daw myit hten lai wa ai. Shi gaw myit mada lam n nga ai a kumla hku hkam sha nga ai. Shi hta shi hkum shi makawp maga na matu pi nden marai hte n-gun atsam n nga mat ai rai nga ai.
Yesu gaw shi hpe hkye la na matu du sa wa ai. Shi gaw yubak kap ai ni a shingbyi shara rai nga ai. Myit daw myit hten ai ni hpe shamai ya na matu hte shanhte a nma ni hpe gyit hkayawp ya na matu du sa ai. Mara shagun ai ni yawng kaya kahpa rai langai hpang langai pru mat wa ai shaloi, Yesu gaw shi hpe, “Numsha e, nang hpe kadai mung tara n jeyang ma ni?” Shi gaw, “Kadai mung n jeyang ai, Madu e,” ngu nna htan tsun wu ai. Yesu gaw, “Ngai mung nang hpe n jeyang na nngai. Wa nna, yubak hkum galaw et,” nga nna tsun lai wa ai. Yesu gaw shi a prat hpe n hkru n kaja ai hku galaw kau sai hpe chye ya ai, raitim shi a prat jahtum tai mat ai n rai nga ai.. shi gaw shi a prat hpe nnan bai gawgap lu nga ai.
3) Yesu . Ndai mabyin hku nna, Yesu a matsan dum lama ai myit kaba nga nga ai hpe mu lu ai. jahtum hta marai lahkawng sha ngam lai wa ai: dai gaw Yesu hte numsha rai nga ai, San Augustine gaw ndai mabyin hpe tsun sang lang dan ai shaloi, “Dai hta tsin-yam tsindam kaba hkrum nga ai (numsha) hte Matsan dum lama ai myit kaba ai (Hkristu) sha ngam nga ai.” Yesu gaw yubak n kap ai wa re – dai majaw shi gaw Yubak kap ai numsha hpe mara shagun na ahkaw ahkang yawng shi hta nga ai, rai tim Shi gaw mara n shagun lai wa ai. madu yesu gaw mungkan masha ni hpe mara shagun na matu du sa wa ai n rai nga ai..hkye mawoi la na matu she du sa ai rai nga ai.
“Anhte hpe dawdan lu ai kadai wa rai ta? Madu Yesu sha rai nga ai ..shi gaw Si hkam ai, rai sa, si mat ai ni kaw na bai hkrung rawt wa ai, Karai Kasang a hkra maga de hkaw dung nga ai, anhte a matu mara hpyi htinglu ya ai wa Hkristu nan rai nga ai (Rom 8:34).” Yubak mara n kap ai Karai Kasang gaw yubak kap ai numsha hpe tara jeyang ai lam n galaw tim yubak kap ai masha ni gaw dai numsha hpe tara jeyang na matu lawan ladan galaw nga ai.
Yesu gaw yubak kap ai ni a shingbyi shara rai nga ai. Shi gaw matsan dum lama chye ai. wa rai nga ai. dai majaw Shi hpang de galoi mung sit sa ra ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw lusha gam ladaw hta. manga.. ngu na lanban rai nga ai
Hti Ang Ai Ja Chyum Mungga Ni Gaw –
Chyum Mungga Daw ( I ) : Esaia laika 43: 16-21
Chyum Mungga Daw ( II ) : Roma philip 3: 8-14
Kabu Gara Shiga : Yawhan 8: 1-11
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
