Easter Sunday, Year C, 2025
Hkristu hta tsawra hkungga ai nu wa hpu nau ni ndai Laban gaw Shaning C a PASKA Poi nhtoi rai nga ai..
Teng mabyin lam langai hpe tsun dan mayu ai. n dai teng mabyin gaw si ai lam hte seng nna Htani htana asak hpe kam sham ai ma kaji langai a lam rai nga ai. Dinghku masha ni shana shat sha ai shaloi, asak Sanit ning re ai Jimmy Rogers hpe htani htana asak hpe kam sham ai lam hpe shi a ga hku tsun dan na matu tsun lai wa ai. Shi tsun ai gaw, “Lani mi na aten hta anhte yawng sumsing lamu de du wa ai shaloi, Karai Kasang a lamu kasa kaba gaw sumsing lamu hta tawn da ai asak laika buk jahpan kaba kaw na anhte a mying ni hpe shaga na re. Shawng nnan – ‘Daddy Rogers’ ngu nna shaga na re daddy gaw ‘Here!’ngut nna shi – ‘Mommy Rogers’ ngu nna shaga na re mummy gaw ‘Ndai kaw!’ ngu htai na re. Dai shaloi lamu kasa gaw Susie hte Mavis Rogers hpe shaga nna, shan lahkawng gaw – ‘Ndai kaw!’” ngu htai na re..Shi matut tsun ai gaw, “Hpang jahtum e lamu kasa kaba gaw nye a mying hpe shaga na re – ‘Jimmy Rogers’ ngu nna ngai kaji ai majaw lamu kasa kaba gaw ngai hpe n mu lu na re majaw, ngai gaw gum htawn nna ‘Here!” marawn tsun na re.
Shata loi mi na ai hpang Jimmy kaji gaw accident byin nna, si hkrung si htan daram byin lai wa ai. Shi hpe tsi rung kaw bang da ai shaloi, nta masha yawng shi a makau kaw hpawng nga ma ai. Shi gaw shamu shamawt ai lam n nga ai, malap nna grai sawng ai masa hta rai nga ai. Lama na, jan garai n pru shi yang si mat lu nga ai..
Dinghku masha ni akyu hpyi nna shi a yupku makau e sin nga ma ai. Shana yup tung du wa ai shaloi, ma kaji gaw loi mi shamu hpang wa ai. Dinghku ting gaw yupku mskau de grau ni sa wa ai. Shi a n-gup gaw shamu shamawt hpang wa ai. Ndai mungkan kawn garai npru mat shi yang shi tsun ai ga langai gaw kade daram shalan shabran ya ai hte shalan shabran ya nga ai ga rai nga ai! gaw Ma kaji a asan sha nga ai nsen hte, masha shagu na lu na hte chye na la lu na daram, nsen kaba hte asan sha, Jimmy ngu ai ma kaji gaw, “Ndai kaw!”, ngu nna marawn tsun let..shi gaw n sa hti rai mungkan na pru mat wa ai .Dai ni e anhte gaw Paska poi hpe galaw nga ga ai. Easter Laban jahpawt, Magdalena Mari gaw Yesu a lup de du ai shaloi, lup sung hku kaw na nlung hpaw mahka nga nna, lup sung hku hta hpa hkum sawp mung n taw nga ai hpe mu lai wa ai rai nga ai. Shi hpe kam sham ai ni a matu si hkrung si htan a nsin hpe htani htana yeng seng kau ya matu, shana yup tung hta si ai kaw na bai hkrung rawt wa sai rai nga ai. hkrung rawt ai labau hta Hkristu hpe tsawra ai masha marai masum lawm nga ai hpe mu lu ai. Magdala Mari, Yawhan hte Petru ni rai nga ai. Yesu bai hkrung rawt ai kabu gara shiga hpe shawng nnan hkam la lu ai ni rai ma ai. Dai ni e, ndai masha masum hte Hkristu a hkrung rawt ai lam a lachyum hpe e myit sumru yu ga.
1) Magdala Mari – Magdalena Mari gaw, kaga num ni hte rau, Yesu a moi mang hpe namman chya ya na matu, lup de sa wa ai. Lup sung hku hpaw nna, katsi katsang rai nga ai hpe mu jang, shi gaw lawan gat mat wa nna, Yawhan yan Petru hpe, Madu hpe lup kaw na shaw la kau nna, gara kaw tawn da ai hpe anhte n chye ga ai, ngu nna wa tsun dan ai. magdalena shi langai chyu sha Yawhan a kabu gara shiga hta tsun da ai gaw, Yesu a sape numsha ni hta myit rawt dik ai hte shawng kaw nga nna shawng woi ai wa re majaw nga nna tsun da nga ai.
Shi gaw jahpawt jau jau Yesu a lup de hkrap na matu hte Yesu a moi mang hpe manam pyaw ai baw sau chya ya na matu alawan sa wa ai. Shi gaw Hkristu hpe grai tsawra ai, hpa majaw nga yang shi mung Hkristu kaw na law lla ai mara raw dat kau hkrum ai majaw mung rai nga ai. Yesu a prat hkrun lam hta mung, si hkam ai lam hta mung, Yesu hpang e hkan nang lai wa ai. Shi madu ndai dinghta ga ntsa e hkawm sa ai shaloi Shi hpe daw jau ai, Shi si mat ai shaloi mung Shi a lup makau e nga nga ya ai. Anhte a myit masin gaw anhte tsawra ai ni hpang de galoi mung gang shadut ya hkrum ai – hkrung nga ai ni rai tim, si mat sai ni rai tim. Hkrung nga ai shaloi, shanhte a kanawn mazum lam hpe tam nna, si mat ai shaloi, shanhte a moi mang ni hte ni htep hkra nga na matu myit sharawng chye ga ai.
Madalena gaw jahpawt jau jau lup de sa lai wa ai. Hkristu hpe tsaw ra ai ni gaw shi madu hpe jau jau tam ai. Kaga masha ni kaw karum hpyi na matu garai n di shi yang, Shi madu hpang de shawng sit sa nna hpyi nem ra ai. Shi hpe shakut shaja let tam ra ai; Shi hpe hkan shachyut nang ra ai rai yang, hkring sa la ai hte hkring sa ra ai lam hpe pyi anhte hkum nan ningdang kau ra ai. Ndai hku rai wa ai shani gaw tsawm htap ai jahtum byin wa na re. Magdalena Mari gaw Hkristu hpe jahpawt jau e tam nna, shi a prat gaw htani htana prat hpe madu la lu ai rai nga ai.
Easter Laban jahpawt gaw Hkristan ni a shawng nnan na Laban Nhtoi – Madu a Nhtoi rai nga ai. Mari Magdalena gaw jahpawt jau jau aten ni hpe Hkristu hpe tam sawk sagawn ai hta jai lang nga ai. Hkristan hpung masha ni gaw Madu a mying ningsang hpe gang nna shi hpe hkan tam ai hku nna shi a nhtoi hpe hkungga lara di ra ai. Anhte gaw Shi hpe grai sharawng awng ai hte tam ra ga ai, hpa majaw nga yang, Karai Kasang gaw madu hpe shagrau sha-a nna, amying shagu hta grau ai amying jaw da sai majaw, lahput shagu lahput hput di ra ga ai… shinglet shagu gaw Yesu Hkristu gaw Madu re ai hpe yin la ra ai (Hpl 2:9-11).
” Shi a lai wa sai aten hta nsin sin lai wa ai raitim, Mari Magdalena gaw hkrung rawt wa ai Madu hpe shawng nnan mu hkrup ai masha tai wa ai. Ndai langai sha re ai ahkaw ahkang hpe shi hpe jaw ai gaw, Hkristu hpe grai tsawra ai majaw rai nga ai. Tsawra myit gaw yubak mara law law hpe magap kau ya nga ai. Hkristu hpe myit masin mahkra hte tsawra ai shaloi, anhte a lai wa sai aten na yubak mara ni hpe lup kau ya nna, Madu a shaman chyeju anhte hkam la lu ai ni hta lawm wa na rai nga ai.
2) Yawhan hte Petru – Lup sung hku hta hkum sawp n nga ai hpe mu ngut ai hpang, Magdalena Mari gaw dai lam hpe Yawhan yan Petru hpe alawan wa tsun dan lai wa ai. Sape ni yawng rau nga ai rai na re. dai hta e Shi Madu hpe nyet kau ai Petru hpe mung kaga sape ni hte rau mu hkrup ai hpe mu lu ai gaw mau hpa rai nga ai. Shi Sara wa a sape hpung hpe shi n kau da ai. Kam sham ai ni hte ni htep hkra galaw ai gaw shalan shabran ya ai sha n-ga, makawp maga ya ai lam mung rai nga ai. Yubak hpe ninghkap ai tsi zawn galaw nga ai. bai nna Grau kaba ai n hkru n kaja ai lam de hkrat sum mat na kaw na tsan gang shangun na re.
Yawhan gaw kaji ai majaw, Petru hpe lai nna, lup de shawng du lai wa ai, rai ti mung, Petru du nna shang mat wa ai aten du hkra, shi n shang shi ai. Shanhte gaw ga ntsa e taw nga ai lachyit sumpan hte kaga sumpan ni hpe mu ma ai. Dai hpun palawng ni hpe Petru mu ai shaloi mau mat ai (Lk 24:12), Yawhan chyawm gaw Hkristu si ai kaw na bai hkrung rawt wa sai ngu ai hpe kam ai. Shi gaw Yesu a hkrung rawt ai lam hpe shawng nnan kam sham ai wa mung rai nga ai. Yesu a hkrung rawt ai lam hpe shawng nnan kam sham ai Yawhan hte hkrung rawt sai Madu hpe shawng mu ai Magdalena Mari a lapran na bung ai lam gaw tsawra myit a majaw sha rai nga ai. Shan lahkawng gaw Hkristu hpe grai tsawra nna, shan a tsawra myit a majaw Hkristu gaw dai langai sha re ai bung pre ai ahkaw ahkang hpe jaw ya lai wa ai.
Yesu gaw shi a lup hpun palawng ni hpe lup sung hku kata kaw tawn da ai gaw, dai hpun palawng ni hpe Shi hta akyu n rawng sai majaw mung rai nga ai ai. Shi a sape ni hpe gara hpun palawng hte dan pru dan ai hpe anhte n chye lu ai, raitim Shi a lup sung hku hpun palawng hte n dan dawng ai lam re gaw teng sha rai nga ai.. Nat ni sha shanhte a lup sung hku na hpun palawng ni hte pru wa chye ai nga nna tsun da ai hpe chye lu nga ai. Yesu a ahpraw nsam shadan dan ai lam gaw nat n rai nga ai. Shi gaw si ai kaw na teng sha hkrung rawt wa sai rai nna, si hkrung si htan gaw Shi hpe n lu up hkang nga ai. Lazaru gaw shi a lup kaw na pru wa ai shaloi, shi a lup hpun palawng ni hte pru wa ai dai gaw shi madu a matu hpang e sakse tai na re majaw rai nga ai… Raitimung Hkristu gaw hkrung rawt nna htani htana asak hkrung nga ai hte, hpung shingkang a hpun palawng hpe htani htana bu hpun da nga ai wa rai nga ai.
3) Hkristu Hkrung Rawt wa Ai A Lachyum – Yesu a hkrung rawt ai lam gaw Hkristan makam masham a madung mungsung lam langai mi rai nga ai. Hkristu si ai kaw na bai n hkrung rawt wa ai rai yang, Hkristan makam masham a npawt nhpang yawng gaw hkrat sum mat na re. San Pawlu gaw Korinhtu hpung masha ni hpe tsun ai hta, “Hkristu gaw si ai kaw na n hkrung rawt a yang gaw, anhte a hkaw dan ai ga mung kaman lila sha rai nga ai, nanhte a makam masham mung kaman lila sha rai nga ai (I Kor 15:14)” nga ai nga nna tsun da nga ai.
Hkristu a si hkam ai hte bai hkrung rawt ai lam gaw Hkristan makam masham a npawt nhpang nan rai nga ai. Anhte a ya aten na dinghpring ai lam hte htawm hpang na hpung shingkang hpe ndai Paschal mungsung lam hta madung tawn da nga ai.
San Pawlu tsun ai gaw, “Hkristu bai n hkrung rawt yang gaw, nanhte a makam masham kaman lila rai nga ai; nanhte gaw tinang a yubak hta naw rai nga na re(I Kor 15:16).” nga nna tsun da ai. Anhte a dinghpring ai lam (mara raw dat hkrum ai lam) sha n rai, anhte a hpung shingkang – htani htana asak hpe myit mada ai lam, Hkristu a hkrung rawt ai lam hta madung rai nga ai. Anhte a Madu Yesu hkrung rawt ai lam gaw lani mi na aten hta anhte mung shi Madu hte bung wa na myit mada lam hpe jaw ya nga ai. San Pawlu tsun ai gaw, “Yesu gaw Madu rai nga ai’ nga nna n-gup hte hkaw tsun dan nna, Karai Kasang shi hpe si ai kaw na hkrung sharawt la sai lam hpe na a myit masin hta kam sham yang, nang hkye hkrang la hkrum na re (Rom 10:9).” tsun da ai hpe mu lu ai. Madu Yesu si ai kaw na bai hkrung rawt sai ngu ai anhte a yin la ai lam gaw, Shi a htani htana asak hta nan anhte hpe hkam la lu shangun nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw paska poi lanban rai nga ai.
Hti Ang Ai Ja Chyum Mungga Ni Gaw
Chyum Mungga Daw ( I ) : Kaasa Laika- 10: 34, 37-43
Chyum Mungga Daw ( II ) Kolo 3: 1–4
Kabu Gara Shiga – Lk 24: 13-35
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
