(6th Sunday of Easter, Cycle C)
PASKA LADAW LABAN (6), C SHANING
(6th Sunday of Easter, Cycle C)
Hkristu hta tsawra hkungga ainu wa hpu nau ni ndai laban gaw shaning C a paska ladaw hta laban kru rai nga ai.
Tara rap ra ai masha chyu sha myit simsa lam hpe hkam la lu ai – Epicurus Pension lu sai yan la gaw, Nuclear majan a jahkrit shaman lam a majaw hkrit tsang lai wa ai, dai majaw mungkan ntsa masha nga ai shara yawng hpe sawk sagawn na matu myit dawdan lai wa ai. Shan a yaw shada ai lam gaw, mungkan e Nuclear majan n law htum byin wa na shara hpe chye lu na matu rai nga ai. Hpang jahtum shim lum ai shara. shan Hkaja na matu pru hkkkawm sa wa ai. Hpang jahtum shan tam ai shara hpe mu la ma ai. Bai nna, Hkrismat shani hta shanhte a manang hpe shanhte a nta nnan – Falkland Islands kaw na card langai mi sa dat ma ai. Raitim, shanhte a ‘hparadisu’ htang da ai shara kade nna yang, Great British hte Argentina ni gaw majan ginra shatai kau ya sai. Yesu gaw, “Ngwi pyaw ai gaw ngai nanhte hpe tawn da ya made ai; nye a ngwi pyaw ai hpe ngai nanhte hpe jaw made ai. Mungkan ga e jaw ai zawn ngai nanhte hpe jaw na ma de ai n rai. Nanhte myit hkum ru myit, hkum hkrit myit,” nga nna tsun lai wa ai.
Dai ni na Kabu Gara Shiga hta, Yesu gaw Shi a simsa lam hpe sape ni hpe ap ya lai wa ai. Ndai mungkan ga kaw nna n pru mat wa shi yang, Yesu gaw Shi a sut gan yawng hpe garan jaw kau ai. Shi a wenyi hpe Kawa kaw ap ya ai: Shi a moi mang hpe Arimahti mare na Yosep hpe ap ya nna, htuk manu ai hku makoi mayang na matu; Hpyen la ni hpe shi a hpun palawng; San Yawhan hpe Shi a Kanu hte matsan mayan re ai sape ni hpe Shi a simsa lam jaw ya lai wa ai rai nga ai. Shanhte hpe jaw na matu kaga sut gan n nga ai tim, kaja dik htum ai hte shanhte ra kadawn dik ai Shi a simsa lam hpe jaw ya lai wa ai.
1) Shi a Simsa Lam A Sali wunli
Yesu gaw sape ni hpe Shi shanhte hte rau, shanhte hta ayan nga nga na lam tsun lai wa ai. Shi a simsa lam gaw Shi a nga nga ai hte rau du sa ai. Shi gaw anhte a ngwi pyaw simsa lam rai nga ai (Ehp 2:14). Shi nga ai shara shagu hta simsa lam nga ai. Shi a simsa lam gaw Shi a hkum hkrang hte garan n mai nga ai. Shi jaw ya ai simsa lam gaw, Karai Kasang hte anhte a lapran na simsa lam rai nga ai. Karai Kasang hte n bung ai anhte ni gaw, ya ten, Shi a Sai hte Shi hte rau kahkyin gumdin wa saga ai. Sumsing lamu na Kawa hte ginding aga ntsa na gumlau ai dam mat ai ma ni a lapran ndai simsa lam hpe Yesu galaw lai wa ai. Anhte gaw ya kaw nna chasam manam ni n rai, Karai Kasang a kashu kasha ni rai nga ga ai.
Anhte a kata hta simsa lam n nga yang simsa lam hpe n lu hkam sha lu ai. Anhte a shingra tara hte myit mada lam lapran, anhte a kaja ai hte n kaja ai hkum hkrang lapran manghkang ni gaw anhte a simsa lam hpe jahten kau ya ai aten law law nga ai. Anhte a prat hta grau kaja ai lam ni hpe hkap la nna, n kaja ai lam ni hpe galaw chye ai myit jasat gaw, anhte a prat hta simsa lam n nga ai a rudi rai nga ai. Anhte a kata na ndai manghkang ni gaw, law law lang, hkrat sum ai lam ni de woi wa nna, hkrat sum ai lam ni gaw mara hkam sha ai lam ni hpe shabyin ya nna, n-gun ja ai myit masin ni gaw anhte a simsa lam hpe jahten kau ya nga ai.
Ndai manghkang ni hpe hparan lu na lam langai sha nga ai, dai gaw Yesu hpe jum tek da ai lam rai nga ai. Shi gaw anhte a gawng malai jahpu rai nga ai; Shi gaw anhte a prat hta yaw shada ai lam rai nga ai; Shi gaw anhte a kasi kamang rai nga ai. Shi hta anhte hpring tsup ai lam lu la ga ai; Shi hta anhte a hkum tsup ai lam hpe mu lu ga ai. Anhte gawng kya ai raitim, n-gun ja ai raitim, chyoi pra ai raitim, yubak kap ai raitim, sut su ai raitim, matsan ai raitim, Yesu Hkristu anhte hte rau nga yang, anhte simsa lam hpe lu la ga ai. Hkristu n lawm yang mungkan gaw n hkum tsup ai, Hkristu n lawm yang she mungkan gaw hpring zup nga ai.
Yesu gaw, masha ni a lapran simsa lam hpe mung galaw ya ai. Hkristu a majaw Yuda masha ni, maigan masha ni, mayam ni hte shanglawt ni nga nna n nga mat sai. Shinggyim masha a majaw byin pru wa ai n bung hkat ai lam yawng hpe yeng seng kau nna, masha shagu hpe kahkyin gumdin shangun ai. San Pawlu tsun ai gaw, “Anhte yawng gaw, Yuda ni rai tim, Heleni ni rai tim, mayam ni rai tim, shanglawt lu ai ni rai tim, hkum hkrang langai sha tai na matu, Wenyi langai sha hta kashin kamun hkam la saga ai rai nna, Wenyi langai sha hpe lu sha nga ga ai (I Kor 12:13).”
Anhte a Madu rai nga ai Yesu gaw anhte langai hte langai hpe masha yawng hpe tsawra na matu hkang da nna, Shi anhte hpe tsawra ai zawn anhte mung tsawra na matu saw shaga la hkrum ga ai. Anhte gaw shada da hpyen hku n nga ai sha, manu dan ai Hkristu a Sai hte hkye hkrang la hkrum ai kahpu hpunau ni hku nna nga sa ra ai.
2) Simsa Lam A Shingra Hkrang
Hkristu jaw ya ai simsa lam gaw, mungkan masha ni jaw ya ai simsa lam hte n bung nga ai. Hkristu gaw ‘ngwi pyaw simsa myit. ga’ ngu tsun ai shaloi, Shi gaw simsa lam hpe kaja jaw ai raitim, masha ni gaw ‘ngwi pyaw simsa ai’ ngu tsun ai shaloi, simsa lam hpe ra sharawng nna hpyi dat lam rai nga ai. Masha gaw kaja ai myit hte simsa lam a masat dingsat ni hpe sha gawgap lu ai, rai tim Hkristu gaw dai simsa lam hpe jaw ya lu ai. Hkristu a mungga gaw anhte hpe simsa lam jaw ya nga ai. Mungkan masha ni ra sharawng ai hpe Hkristu hta e jaw ya lu ai atsam nga ai.
Mungkan e jaw ya ai simsa lam gaw, aten kadun laman sha rai nga ai. Mungkan jaw ai gaw aten kadun laman sha nga na re, rai tim, Yesu jaw ya ai simsa lam gaw, Shi a shaman chyeju yawng zawn, htani htana rai nga ai. Dai simsa lam hpe hpa mung n la kau ya lu ai – machyi makaw, kawsi hpang gara, matsan mayan, lusu ai, asak hkrung ai, si hkrung si htan ni nan n la kau lu nga ai.
3) Shi a Simsa Lam A Tengman Ai Lam
Hkristu hte Shi a simsa lam hpe madu da lu ai gaw, anhte a prat hta byin nga ai n hkru n kaja ai lam ni, manghkang ni hpe hkam sha na matu pat shingdang ai lam n rai nga ai. Mungkan hta, jahtum du hkra anhte hpe myit ru myit tsang shangun na lam ni law law nga ai, anhte a kraw kata kaw na lam law law gaw, anhte a simsa lam hpe jahten kau na matu, rawt jat wa nna, jahkrit shama nga ai. Dai zawn re ai lam ni hpe tut nawng ninghkap gasat ra ai hte Hkristu jaw ya ai simsa lam hpe n sum mat hkra shakut shaja ra ai. Anhte a simsa lam hpe hpa mung n jahten kau u ga, lam shagu hta akyu hpyi ai hte hpyi nem ai, chyeju dum ai hte Karai Kasang hpe anhte a hpyi shawn ai lam ni hpe tsun dan nga ga. Hkristu hpe madu da ai gaw, anhte hpe adawt ai nbung laru ni hpe zim shangun kau na re. Hkristu gaw Shi a sape ni hpe ga sadi jaw da ai ngwi pyaw simsa lam gaw anhte a myit masin hta mung, anhte a dinghku ni hta mung anga nga u ga law.
Shi a ngwi pyaw simsa lam hpe hkam la lu na matu, Hkristu a tsawra myit hte hkang da ai ga gaw anhte a prat shawng lam shagu hta up hkang nga u ga law.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw paska ladaw hta kru ngu na lanban rai nga ai
Hti Ang Ai Ja Chyum Mungga Ni Gaw
Chyum Laika Daw ( I ) Kasa Laiak : 15: 1-2, 22-29
Chyum Laika Daw ( II ) Shr : 21: 10-14,22–23
Kabu Gara Shiga : Yawhan 14: 23-29
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
