Daini na Ja Chyum Mungga hpe hti sum ru yu ai shaloi e, Yesu hpe kasa Petru nachying tsawra nga ai lam hpe na chye lu ga ai. Daini kasa Yawhan a kabu gara shiga hta, Madu Yesu gaw Petru hpe”DO You Love Me? Ngu ai ga san hpe masum lang ga san san ai rai nga ai. Dai ga san gaw loi ai zawn nga tim mung, htai na matu yak la nga ai re. Dai zawn nga ai ga san hpe anhte ni hpe Madu Yesu san wa yang ganing ngu htan na rai ta? Anhte yawng ja ja sumru yu hpa nan rai nga sai. Madu Yesu tsun ai gaw Petu mung shinggyim masha kaw na shinggyim masha sha rai nga ai. Dai re majaw ra rawng gawng kya ai lam ni gaw nga na re ngu ai hpe chye na ya ai.
Petru tsun ai hta, Madu Yesu gaw, lam shagu hpe dang chye lu ai wa, matsan dum lanu lahku ya chye ai madu re ai hpe chye da nna, Madu Yesu hpe tsawra ai ngu mahtai jaw da ai. Shi kaw e ra rawng gawng kya ai lam nga ai raitim, shi jaw da ai mahtai hte maren, shanhte a sara wa Madu Yesu a prat hpe kasi la nna, madu a kabu gara shiga hpe, mungkan chyam hkra shara shagu de hkaw tsun gat hkai sa sai rai nga ai. Madu a hkye la ai magam bungli ni hpe kaja dik ai hku galaw ap nawng let, shi a prat htum ten hta Madu Yesu a mying ning sang a matu Udang hta e n htang chyaw jen noi si hkam nna, san pra ai masha jan mau hpe hkam la lu sai rai nga ai. Anhte yawng mung Madu Yesu hpe teng sha tsawra ai rai yang, kasa Peru zawn kaja ai madu a hpang hkan ai ni byin hkra shakut sa nga ga law.
