Anhte a wenyi asak galu kaba ai hkrang gaw n bung nga ai. Atsam nga nga hte shakut sa ai rai yang, anhte a makam masham gaw, grau ngang kang wa nna, machye machyang lam yan hta mung, gara gaw grau ahkyak nga ai ngu ai hpe dan dawng chye wa ai re. Ndai mabyin gaw, Domonican uhpung hpe hpaw hpang ya ai wa, San pra ai Dominic a prat hta dan dawng nga sai. Chyum mungga hte sakramentu ni hpe kamsham daw jau ai, san pra ai Dominic a kyu hpyi ai lam nan rai nga timung, Shi a prat hpang de e, Karai Kasang hpe tsawra kam hpa ai lam ni galai shai mat wa ai.

Udang sumla gaw no.1 kaw du mat ai. Udang a shawng kaw kyu hpyi sumru ai gaw shi a prat hta makam masham sha n rai, tsawra ai myit ni lawm nga ai ngu ai hpe shadum ya ai. Anhte mung San. Domonic zawn, Udang hpe yu mada let, Madu Yesu a ap nawng daw jau ai lam ni hpe sumru ding lik yu mai nga ai. Anhte mung Madu Yesu a matu ap nawng lu na kun? San jep yu ga. Shi tsun nga ai gaw, Nye a hpang hkan mayu yang, tinang a hkum hpe nyet kau nna, tinang a udang hpai let, nye a hpang hkan rit.

Anhte sak hkrung nga ai gaw, tinang a matu chyu sha kun? Madu Yesu hte kaga masha ni a matu kun? Udang ntsa kaw na Yesu anhte hpe san taw nga ai.